លោក Abe Shinzo កាន់តំណែងយូរជាងគេ គឺធ្វើជានាយករដ្ឋមន្ត្រីជិត៨ឆ្នាំ ជួយជំរុញឱ្យជប៉ុន មានការរីកចម្រើនទាំងក្នុងប្រទេសនិងមានពង្រីកឥទ្ធិពលនៅលើឆាកអន្តរជាតិ ប៉ុន្តែលោកជាមនុស្សដាក់ខ្លួនមិនទាមទារឱ្យប្រជាពលរដ្ឋចងចាំគុណសម្បត្តិរបស់លោកនោះទេ។
លោក Abe Shinzo វ័យ៦៥ឆ្នាំ បានដាក់ពាក្យលាលែងពីតំណែងជានាយករដ្ឋមន្ត្រីកាលពីចុងខែសីហា ក្រោមហេតុផលជំងឺរលាកសួត។ ត្បិតតែលោកប្រើហេតុផលលាលែងដោយសារជំងឺ ប៉ុន្តែមិនដល់ថ្នាក់ដេកដួលនោះទេ គឺលោកនៅតែធ្វើដំណើរនិងចូលរួមកម្មវិធីសំខាន់ៗរបស់ជាតិបានធម្មតា។
សមិទ្ធផល
ចំពោះសមិទ្ធផលការងារ គឺលោកបានប្រឹងប្រែងបំពេញការងារក្នុងពេលកាន់តំណែង ដោយពង្រឹងបន្ថែមការិយាល័យសន្តិសុខជាតិ ធ្វើឱ្យជប៉ុនក្លាយជាអ្នកចូលរួមបង្កើតច្បាប់ឬគោលការណ៍អន្តរជាតិឆ្ពោះទៅរកការពង្រឹងសណ្តាប់ធ្នាប់នៅក្នុងតំបន់និងពិភពលោក ការពារពីការវាយប្រហារទាំងខាងក្នុងនិងខាងក្រៅ។
កាលពីខែកញ្ញា ឆ្នាំ២០១៥ ជប៉ុនបានសម្រេចរៀបចំច្បាប់និងសម្របសម្រួលជាមួយស្ថានភាពនយោបាយអន្តរជាតិ ឈានដល់ជប៉ុនអាចបញ្ជូនកងទ័ពរបស់ខ្លួនទៅធ្វើសង្គ្រាមនៅលើឆាកអន្តរជាតិបានវិញ ក្នុងគោលបំណងថែរក្សាសន្តិសុខពិភពលោក។ ក្នុងចំណោមហេតុផលជាច្រើន គឺការប្រឹងប្រែងរៀបចំឱ្យមានសិទ្ធិបញ្ជូនកងទ័ពទៅក្រៅប្រទេសបាននេះ ក៏ជាការបង្ហាញឥទ្ធិពលរបស់ខ្លួនទប់ទល់ការគំរាមកំហែងពីចិននិងកូរ៉េខាងជើងជាប្រទេសក្បែរខាងដែរ។
លោក Abe បានដើរតួនាទីសម្រេចក្នុងការពង្រឹងភាពជាដៃគូអន្តរប៉ាស៊ីហ្វិក (TPP 11) ទទួលបានកិច្ចព្រមព្រៀងពាណិជ្ជកម្មលេចធ្លោមួយជាមួយសហភាពអឺរ៉ុបនៅឆ្នាំ២០១៩ និងបានចរចាកិច្ចព្រមព្រៀងហិរញ្ញវត្ថុនិងអភិវឌ្ឍន៍មួយចំនួនជាមួយប្រទេសចិនក្នុងឆ្នាំ២០១៨។
នៅពេលដែលលោក ដូណាល់ ត្រាំ ដើរចេញពីកិច្ចព្រមព្រៀង TPP គឺជប៉ុននៅតែដើរតួនាទីក្នុងការសម្របសម្រួលសម្ព័ន្ធមិត្តនេះឱ្យដើរទៅមុខរួចដូចធម្មតា។
ត្បិតជប៉ុនហាក់ស្និទ្ធជាមួយសហរដ្ឋអាមេរិក ប៉ុន្តែនៅពេលដែលលោក ដូណាល់ ត្រាំ ដាក់សម្ពាធលើប្រទេសផ្សេងៗរួមទាំងជប៉ុនផងនោះ លើការធ្វើពាណិជ្ជកម្មដែកថែប ក៏លោក អាបេ បានចេញតវ៉ាតាមការទូតយ៉ាងស្វិតស្វាញផងដែរ។
ចំពោះសេដ្ឋកិច្ច ត្បិតតែជប៉ុនជួបគ្រោះធម្មជាតិដោយការរញ្ជួយដី រលកស៊ូណាមិ ជាបន្តបន្ទាប់ ប៉ុន្តែជប៉ុននៅតែឈរនៅសេដ្ឋកិច្ចធំលើពិភពលោកលំដាប់លេខ៣ បន្ទាប់ពីសហរដ្ឋអាមេរិកនិងប្រទេសចិន។ ជាពិសេសស្ថានភាពសេដ្ឋកិច្ចនៅក្នុងអំឡុងពេលនៃការឆ្លងរាលដាលមេរោគកូវីដ១៩នេះ សេដ្ឋកិច្ចនៅតែរក្សាបានភាពល្អប្រសើរនិងមានកំណើន។
របាយការណ៍ផ្លូវការមួយបានចេញផ្សាយកាលពីថ្ងៃពុធ ទី៣០ ខែកញ្ញា ថា ទិន្នផលរោងចក្របានកើនឡើង១,៧ភាគរយកាលពីខែសីហាកន្លងមក ដោយសារការកើនឡើងនៃការផលិតផលរថយន្តនិងគ្រឿងបន្លាស់រថយន្ត ក៏ដូចជាដែកថែប ដែក និងលោហធាតុដែលមិនមែនផលិតពីដែក។ នេះបើតាមទីភ្នាក់ងារសារព័ត៌មានរ៉យទ័រ។
ក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន បាននិយាយថា អ្នកផលិតរំពឹងថា ទិន្នផលនឹងអាចកើនឡើង៥,៧ភាគរយនៅក្នុងខែកញ្ញា និង២,៩ភាគរយនៅក្នុងខែតុលា។
លោក Tom Learmouth សេដ្ឋវិទូជប៉ុនប្រចាំក្រុមហ៊ុន Capital Economics បានថ្លែងថាប្រសិនបើការព្យាករក្នុងខែកញ្ញាមានការកើនឡើង គឺត្រូវបានព្យាករថា ទិន្នផលផលិតកម្មនឹងស្ទុះឡើង១០ភាគរយពីមួយត្រីមាសទៅមួយត្រីមាសនៅក្នុងត្រីមាសខែកញ្ញានេះ។
លក្ខណៈសម្បត្តិ
បើទោះជាលោក Abe ជាមេដឹកនាំដែលកាន់តំណែងក្នុងប្រវត្តិសាស្ត្រ គឺរយៈពេលជិត៨ឆ្នាំ នៅតែមានការគាំទ្រច្រើន ហើយលោកកសាងសមិទ្ធផលច្រើនសម្រាប់ប្រទេស កិត្តិយសប្រទេស និងពិភពលោកក៏ដោយ ប៉ុន្តែមេដឹកនាំរូបនេះមិនដែលអួតអាងទាមទារគុណសម្បត្តិ គំរាមកំហែងក្រុមផ្សេងទៀតឬទាមទារឱ្យប្រជាពលរដ្ឋអរគុណរូបនោះទេ។
ផ្ទុយទៅវិញ លោក Abe Shinzo តែងតែសម្តែងការគោរពដល់ប្រជាពលរដ្ឋ ហើយប្តេជ្ញាបំពេញការងារឱ្យអស់ពីលទ្ធភាព។ បើទោះជាមួយរយៈកាលចុងក្រោយលោកមានជំងឺ ហើយប្រជាពលរដ្ឋជប៉ុនសម្តែងការបារម្ភពីលោកក៏ដោយ ក៏លោក អាបេ បង្ហាញសារដោយបញ្ជាក់ថា សុខភាពលោកមិនធ្ងន់ធ្ងរទេ ហើយលោកអាចបំពេញការងារបាន មិនឱ្យប៉ះពាល់ដល់ជាតិនោះទេ។
នៅថ្ងៃធ្វើសន្និសីទសារព័ត៌មានស្តីពីការលាឈប់ពីតំណែង កាលពីថ្ងៃទី២៨ ខែសីហា ឆ្នាំ២០២០ លោក Abe បានសុំទោសប្រជាពលរដ្ឋដែលលោកសម្រេចលាឈប់ចំពេលដែលប្រទេសជាតិជួបវិបត្តិមេរោគកូវីដ១៩ ហើយគោលនយោបាយរបស់លោកមិនទាន់បានសម្រេចអស់។
លោក Abe៖ «សូមអភ័យទោសដល់ប្រជាជនពីបេះដូងខ្ញុំ ដែលបានចាកចេញពីការងារចំពេលមានការរីករាលដាលនៃជំងឺឆ្លងវីរុសនេះ ខណៈពេលដែលគោលនយោបាយជាច្រើនទើបតែឈានដល់ពាក់កណ្តាលនៃការសម្រេចបាន»។
ការទទួលខុសត្រូវ
ការទទួលខុសត្រូវរបស់មេដឹកនាំជប៉ុនរូបនេះ គឺលោកប្រឹងប្រែងធ្វើការងាររហូតដល់ថ្ងៃលោកប្រកាសលាលែងពីតំណែង ហើយលោកប្តេជ្ញាបំពេញការងារបន្តរហូតដល់ជ្រើសរើសមេដឹកនាំថ្មីបាន។
លោក Abe ផ្តល់សិទ្ធិឱ្យសភាជាអ្នកជ្រើសរើសមេដឹកនាំថ្មី រហូតដល់ថ្ងៃទី១៦ ខែកញ្ញា សមាជិករដ្ឋសភាបានបោះឆ្នោតជ្រើសរើសលោក Yoshihide Suga វ័យ៧១ឆ្នាំ អតីតរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ឱ្យកាន់តំណែងជានាយករដ្ឋមន្ត្រីជំនួសលោក Abe។ លោក Abe បានជូនបាច់ផ្កាដល់មេដឹកនាំថ្មី ភ្ជាប់ជាមួយពាក្យជូនពរឱ្យបំពេញការងារបានជោគជ័យ ធ្វើឱ្យបរិយាកាសនៃការផ្ទេរតំណែងពោរពេញដោយកិត្តិយសនិងអត្ថន័យ។
លោក Abe ធ្លាប់ទទួលរងការចោទប្រកាន់ថា លោកមានកំហុសក្នុងពេលដែលប្រកួតប្រជែងការបោះឆ្នោត គឺលោកបានសហការជាមួយស្ថាប័នអយ្យការ បើកឱ្យស៊ើបអង្កេតដោយសេរីដើម្បីស្វែងរកការពិត។
កាលពីអំឡុងខែឧសភា ឆ្នាំ២០១៧ លោក Abe Shinzo និងភរិយារបស់លោក គឺលោកស្រី Akie Abe ត្រូវបានចោទប្រកាន់ថា មានរឿងអាស្រូវក្នុងការឈរមុខឱ្យសាលាមត្តេយ្យមួយមានប្រជាប្រិយភាព ហើយទទួលអំណោយដោយសម្ងាត់។ ករណីនេះ ក៏តុលាការជប៉ុនបើកការស៊ើបអង្កេតដោយគ្មានការរារាំងណាមួយដែរ។
ជារួមមក មិនមានមនុស្សឬមេដឹកនាំណាមួយល្អឥតខ្ចោះនោះទេ ប៉ុន្តែលោក Abe Shinzo ប្រឹងប្រែងបំពេញការងារ មានការអំណត់ ទទួលខុសត្រូវ មិនអួតអាង ចេះដាក់ខ្លួន ហើយគោរពច្បាប់ គោរពអំណាចតុលាការ នេះជាគំរូមួយដែលមេដឹកនាំផ្សេងៗទៀតអាចសិក្សាស្វែងយល់និងរៀនសូត្រតាម៕