អាជ្ញាធរខេត្តបន្ទាយមានជ័យ សម្រេចជម្លៀសអ្នកជាប់ឃុំជាង១ពាន់នាក់ទៅកាន់ពន្ធនាគារខេត្តផ្សេងៗដែលនៅក្បែរ ខណៈជំនន់ទឹកភ្លៀងបានជន់លិចពន្ធនាគារខេត្តនេះ។
ស្នងការរងនគរបាលខេត្តបន្ទាយមានជ័យ លោក ប៊ុន ផេង ប្រាប់វីអូឌីនៅថ្ងៃនេះថា អាជ្ញាធរបានជម្លៀសអ្នកជាប់ឃុំក្នុងពន្ធនាគារខេត្តបន្ទាយមានជ័យ ទៅកាន់ពន្ធនាគារខេត្តផ្សេងដែលនៅក្បែរ ដើម្បីគេចចេញពីជំនន់ទឹកភ្លៀងដែលកំពុងជន់លិចពន្ធនាគារនេះ។
លោកថា៖ «ពិតមានការជម្លៀសមែន! ចង់ដឹងព័ត៌មានលម្អិត សួរអ្នកពាក់ព័ន្ធ ព្រោះហើយខាងខ្ញុំគ្រាន់តែមកការពារទេ»។
វីអូឌី ពុំអាចសុំការអត្ថាធិប្បាយបញ្ជាក់ពីប្រធានពន្ធនាគារខេត្តបន្ទាយមានជ័យ លោក អ៊ុង ស៊ីផាន បានទេនៅរសៀលនេះ។
ប៉ុន្តែលោកបានបញ្ជាក់ប្រាប់សារព័ត៌មានក្នុងស្រុកថា អ្នកជាប់ឃុំក្នុងពន្ធនាគារនេះមានចំនួន១ ៦០០នាក់ ក្នុងនោះមានស្រី១០០នាក់។ លោកបន្តថា ជំនន់ទឹកភ្លៀងបានហូរចូលក្នុងពន្ធនាគារ បណ្តាលឱ្យលិចអគាររដ្ឋបាលនិងអគារស្នាក់នៅរបស់អ្នកជាប់ឃុំ។
នៅថ្ងៃអង្គារនេះដែរ រដ្ឋបាលខេត្តបន្ទាយមានជ័យ ក៏បានអំពាវនាវដល់ប្រជាពលរដ្ឋ ឱ្យមានការប្រុងប្រយ័ត្នខ្ពស់បន្ថែមទៀត ដោយសារក្នុងរយៈពេលប៉ុន្មានថ្ងៃមកនេះ ស្ថានភាពទឹកបាននឹងកំពុងហូរធ្លាក់មកពីព្រំដែនកម្ពុជា-ថៃ ដោយសារមានការបើកទំនប់អាងអូខៃដន ក្រុងប៉ោយប៉ែត និងទឹកធ្លាក់មកពីខេត្តបាត់ដំបង។
រដ្ឋបាលខេត្តបានបន្តថា ស្ថានភាពនេះបានធ្វើឱ្យកម្ពស់ទឹកនៅភូមិសាស្រ្តមួយផ្នែកនៃក្រុងសិរីសោភ័ណ និងឃុំមួយចំនួនក្នុងស្រុកមង្គលបូរី និងកន្លែងផ្សេងៗទៀតផ្នែកខាងក្រោម មានការកើនឡើងគួរឱ្យព្រួយបារម្ភ។
រដ្ឋបាលខេត្ត បានបញ្ជាក់ថា៖ «អាជ្ញាធរខេត្តសូមធ្វើការអំពាវនាវជាថ្មីបន្ថែមទៀត ដល់ពុកម៉ែបងប្អូនប្រជាពលរដ្ឋ សូមមានការយកចិត្តទុកដាក់ ប្រុងប្រយ័ត្នខ្ពស់ បើមានបញ្ហាអ្វីកើតឡើង ត្រូវរាយការណ៍មកកាន់អាជ្ញាធរមូលដ្ឋានឱ្យបានទាន់ពេលវេលា ជាពិសេសត្រូវយកចិត្តទុកដាក់ថែទាំសុខភាព និងរស់នៅប្រកបដោយអនាម័យ ដើម្បីចៀសវាងកើតមានជំងឺផ្សេងៗ»។
បើតាមគណៈកម្មាធិការជាតិគ្រប់គ្រងគ្រោះមហន្តរាយ ប្រាប់នៅថ្ងៃនេះថា ចាប់តាំងពីថ្ងៃទី១ ដល់ថ្ងៃទី១៣ ខែតុលានេះ ជំនន់ទឹកភ្លៀងបានបង្កផលប៉ះពាល់ដល់រាជធានី-ខេត្តចំនួន១៧ និងបានសម្លាប់មនុស្ស១០នាក់ ខណៈប្រជាពលរដ្ឋជាង១ម៉ឺននាក់ ត្រូវបានជម្លៀសទៅកាន់ទីទួលសុវត្ថិភាព៕