អង្គការឃ្លាំមើលសិទ្ធិមនុស្ស (Human Rights Watch) នៅថ្ងៃពុធនេះ អំពាវនាវដល់រដ្ឋាភិបាលកម្ពុជា ទម្លាក់ចោលការចោទប្រកាន់និងដោះលែងអតីតសកម្មជនបក្សប្រឆាំងនៅខេត្តពោធិ៍សាត់ ជាបន្ទាន់និងដោយឥតលក្ខខណ្ឌ។
សេចក្តីថ្លែងការណ៍របស់អង្គការឃ្លាំមើលសិទ្ធិមនុស្ស ដែលបានផ្សព្វផ្សាយនៅថ្ងៃទី១៤ ខែតុលា ឆ្នាំ២០២០ បានលើកឡើងថា អតីតក្រុមប្រឹក្សាឃុំអន្លង់រាប លោក ជុំ សារ៉ាត់ ត្រូវសមត្ថកិច្ចខេត្តពោធិ៍សាត់ បានចាប់ខ្លួនកាលពីថ្ងៃទី៦ ខែតុលា ឆ្នាំ២០២០ ពាក់ព័ន្ធនឹងករណីជម្លោះដីធ្លីដែលបានកើតឡើងតាំងពីឆ្នាំ២០១៤ រវាងប្រជាពលរដ្ឋនិងក្រុមហ៊ុន MDS របស់លោកឧកញ៉ា ទ្រី ភាព។
សេចក្តីថ្លែងការណ៍បន្តថា អំឡុងពេលនោះ ក្រុមហ៊ុនបានប្តឹងលោក ជុំ សារ៉ាត់ ថាបានឈូសឆាយបំផ្លាញព្រៃឈើ ហើយនៅក្នុងរឿងក្តីដែលបានសើរើឡើងវិញនេះ តុលាការខេត្តពោធិ៍សាត់ បានសម្រេចចោទប្រកាន់លោក ពាក់ព័ន្ធនឹងបទកាន់កាប់ដីរដ្ឋដោយខុសច្បាប់និងប្រើប្រាស់ហិង្សាទៅលើអ្នកកាន់កាប់ដី និងបានបញ្ជាឱ្យឃុំខ្លួនបណ្តោះអាសន្ននៅពន្ធនាគារខេត្ត កាលពីថ្ងៃទី០៨ ខែតុលា ឆ្នាំ២០២០។
អនុប្រធានអង្គការឃ្លាំមើលសិទ្ធិមនុស្សប្រចាំតំបន់អាស៊ី លោក Phil Robertson បានលើកឡើងក្នុងសេចក្តីប្រកាសព័ត៌មានថា ការជីកកកាយយកសំណុំរឿងចាស់ ដើម្បីបំបិទសំឡេងអ្នករិះគន់នេះ ជារឿងមិនសមហេតុសមផលនោះទេ។
លោកបន្តថា៖ «អាជ្ញាធរគួរទម្លាក់ចោលការចោទប្រកាន់ប្រឆាំងនឹងលោក ជុំ សារ៉ាត់ និងសកម្មជនផ្សេងទៀតដែលរងនូវអំពើអយុត្តិធម៌»។
ឆ្លើយតបនឹងការអំពាវនាវនេះ អ្នកនាំពាក្យក្រសួងយុត្តិធម៌កម្ពុជា លោក ជិន ម៉ាលីន បានជំរុញឱ្យអង្គការឃ្លាំមើលសិទ្ធិមនុស្ស ពិនិត្យមើលច្បាប់របស់កម្ពុជាឡើងវិញ។
លោកបានគូសបញ្ជាក់ថា៖ «គ្មានសមត្ថកិច្ចណាអាចដោះលែងជនជាប់ឃុំបានទេ ទាល់តែតុលាការ ប្រសិនបើចង់ដោះលែងទាល់តែចូលរួមក្នុងដំណើរនីតិវិធីតុលាការ ហើយធ្វើការការពារតាមផ្លូវច្បាប់។ ឱ្យគាត់ពិនិត្យមើលច្បាប់របស់កម្ពុជាក្នុងនីតិប្រតិបត្តិ គ្មានសិទ្ធិទៅដោះលែងជនជាប់ឃុំ មានតែចូលរួមនីតិវិធីតុលាការដើម្បីបញ្ចប់ការជាប់ឃុំ»។
លោក សំ សុគង់ មេធាវីការពារក្តីឱ្យអតីតសកម្មជនគណបក្សសង្គ្រោះជាតិ ធ្លាប់បានបញ្ជាក់កាលពីសប្តាហ៍មុនថា លោក ជុំ សារ៉ាត់ ធ្លាប់បានរត់គេចខ្លួនកាលពីអំឡុងឆ្នាំ២០១៩ ក្រោយពីជាប់ពាក់ព័ន្ធនឹងករណីប្រកាសវិលត្រឡប់មកកម្ពុជាវិញដោយអតីតប្រធានគណបក្សសង្គ្រោះជាតិ លោក សម រង្ស៊ី៕
