មន្ត្រីក្រសួងមហាផ្ទៃ ឱ្យដឹងថា ពន្ធនាគារចំនួនពីរនៅរាជធានីភ្នំពេញនិងខេត្តបាត់ដំបង អាចប្រឈមនឹងការជន់លិចដោយជំនន់ទឹកភ្លៀង ប្រសិនបើកម្រិតទឹកនៅបន្តកើនឡើង ខណៈពន្ធនាគារខេត្តបន្ទាយមានជ័យដែលរងការជន់លិច បានជម្លៀសអ្នកជាប់ឃុំអស់ហើយគិតមកដល់ថ្ងៃពុធនេះ។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សាវនា បានប្រសាសន៍ថា ពន្ធនាគារដែលប្រឈមនឹងគ្រោះទឹកជំនន់ រួមមាន ពន្ធនាគារខេត្តបាត់ដំបង និងពន្ធនាគារព្រៃស នៅរាជធានីភ្នំពេញ។
លោកបន្តថា កម្លាំងសមត្ថកិច្ចបានត្រៀមខ្លួនរួចជាស្រេចហើយសម្រាប់ការពារនិងជម្លៀសអ្នកជាប់ឃុំទៅកាន់ពន្ធនាគារផ្សេង ប្រសិនបើជំនន់ទឹកភ្លៀងនៅបន្តកើនឡើង។ លោកបន្តថា អ្វីដែលជាក្តីបារម្ភនោះ គឺអ្នកជាប់ឃុំនៅពន្ធនាគារទាំងពីរនេះមានចំនួនច្រើន និងភាគច្រើនជាឧក្រិដ្ឋជន។
លោកថា៖ «សង្ឃឹមថា វានឹងស្រកទៅវិញ ពីព្រោះ [ពន្ធនាគារ] ព្រៃស វាជាទីតាំងធំ ហើយវានៅក្នុងរាជធានីភ្នំពេញ ដល់អ៊ីចឹងបើមានបញ្ហា កម្លាំងអន្តរាគមន៍បម្លាស់ទីមក វាពេញទឹកពេញដី ប៉ុន្តែត្រូវរកកន្លែងដើម្បីផ្ទុកពួកគាត់ ហើយមនុស្សសរុប២កន្លែងហ្នឹងទៅ “ម១” និង “ម២” ចង់១ម៉ឺននាក់ ហើយ១ម៉ឺននាក់សុទ្ធតែឧក្រិដ្ឋជន តើយើងគ្រប់គ្រងយ៉ាងម៉េច អ៊ីចឹងទាមទារឱ្យកម្លាំងសមត្ថកិច្ចរាប់ពាន់នាក់ដែរ ដើម្បីជួយសហការគ្នាក្នុងពេលបណ្ដោះអាសន្ន រកកន្លែងផ្ទុកពួកគាត់ឱ្យមានសុវត្ថិភាព»។
លោក នុត សាវនា បានបន្ថែមថា៖ «បើមានបញ្ហាហ្នឹងមែន យើងត្រូវរកទីទួលសុវត្ថិភាពដែលជិតបំផុត ហើយអាចផ្ដល់លទ្ធភាពអាចឱ្យយើងបម្លាស់ទីតាំងបាន ហើយអាហ្នឹងទើបយើងអាចចាត់ការបានភ្លាមៗហើយសង្គ្រោះបន្ទាន់បាន ព្រោះបាត់ដំបងយើងដឹងហើយ ផ្លូវទាំងអស់ទាំងខេត្តបន្ទាយមានជ័យ ពោធិ៍សាត់ គឺសុទ្ធតែមានបញ្ហាទាំងអស់ ដល់អ៊ីចឹងពិបាកចេញពិបាកចូល»។
ចំពោះអ្នកជាប់ឃុំចំនួន១ ៦១០នាក់ នៅពន្ធនាគារខេត្តបន្ទាយមានជ័យ លោក នុត សាវនា បានបញ្ជាក់ថា កម្លាំងសមត្ថកិច្ចពាក់ព័ន្ធ បានជម្លៀសពួកគេទៅកាន់ពន្ធនាគារនៅខេត្តចំនួន៤ រួមមាន ខេត្តសៀមរាប ចំនួន៨១១នាក់, កំពង់ធំ ២០០នាក់, ឧត្ដរមានជ័យ ២០០នាក់ និងត្បូងឃ្មុំជាង៤០០នាក់។ លោកបន្តថា ការដែលអាជ្ញាធរយកអ្នកជាប់ឃុំទៅដាក់ទីតាំងផ្សេងៗគ្នា ដើម្បីកាត់បន្ថយភាពចង្អៀតក្នុងពន្ធនាគារ។
លោកថា៖ «បងប្អូនជនជាប់ឃុំច្រើនទៅ ការរស់នៅរបស់គាត់ក៏វាពិបាកដែរ ក្នុងអំឡុងពេលហ្នឹង។ បារម្ភពេលមានភាពចង្អៀតណែនកាន់តែខ្លាំង ផលប៉ះពាល់លើសុខភាពរបស់គាត់ក៏អាចមានដែរ ហើយអ្នកទោស! ហើយបើមានអ្នកទោសឈឺ មន្ត្រីរបស់ខ្ញុំក៏រវល់ទៅតាមហ្នឹងដែរ»។
បើតាមមន្ត្រីរូបនេះ ពន្ធនាគារខេត្តបន្ទាយមានជ័យ ធ្លាប់បានលិចទឹកម្ដងរួចមកហើយកាលពីឆ្នាំ២០១៣ ប៉ុន្តែក្រោយពីទឹកលិចចូល អាជ្ញាធរបានចាត់វិធានការលើកទំនប់ផ្លូវទឹកខ្ពស់ជាងមុននិងធ្វើរបងបិទជិត ដើម្បីកុំឱ្យមានទឹកជ្រាបចូលជាដើម។
ប្រធានពន្ធនាគារខេត្តបាត់ដំបង លោក សំអុល ធារិទ្ធ បានបដិសេធអត្ថាធិប្បាយ ដោយប្រាប់ឱ្យអ្នកសារព័ត៌មានវីអូឌីដាក់លិខិតស្នើសុំសម្ភាសជាមុនសិន។
នាយករងអង្គការការពារសិទ្ធិមនុស្សលីកាដូ លោក អំ សំអាត កាលពីថ្ងៃម្សិលមិញ បានបង្ហាញការព្រួយបារម្ភពីស្ថានភាពសុខភាពអ្នកជាប់ឃុំ ខណៈពន្ធនាគារទាំងនោះមានភាពចង្អៀតណែនស្រាប់ទៅហើយ។
លោកថា៖ «វាអាចនឹងបង្កើនភាពចង្អៀតណែនសម្រាប់គាត់ [អ្នកជាប់ឃុំ] នៅពន្ធនាគារផ្សេង។ មិនមែនតែគាត់ទេ ក៏វាប៉ះពាល់ដល់អ្នកដែលជាប់ពន្ធនាគារមាននៅក្នុងនោះស្រាប់ទៀត។ កាលណាកាន់តែចង្អៀតទៅ ក៏វាក៏ប៉ះពាល់ដល់សុខភាពដែរ ប៉ុន្តែខ្ញុំគិតថា វាអត់មានជម្រើស»។
មន្រ្តីឃ្លាំមើលបញ្ហាសិទ្ធិមនុស្សរូបនេះ ផ្តល់ជាយោបល់ថា ក្រសួងមហាផ្ទៃគួរតែផ្លាស់ប្តូរទីតាំងពន្ធនាគារដែលប្រឈមនឹងការជន់លិច ទៅកាន់ទីទួលមានសុវត្ថិភាពពីទឹកជំនន់ ដើម្បីកុំឱ្យមានបញ្ហាលំបាកក្នុងការជម្លៀសអ្នកជាប់ឃុំនៅរដូវភ្លៀងនាពេលខាងមុខទៀត ខណៈការជម្លៀសនេះ លោកថា ធ្វើឡើងចំនួន៣លើកមកហើយ៕
