ក្រសួងសាធារណការ និងដឹកជញ្ជូន បានឱ្យដឹងថា គិតមកដល់ព្រឹកថ្ងៃពុធនេះ ផ្លូវថ្នល់ប្រវែងជិត២៥០គីឡូម៉ែត្រ នៅក្នុងខេត្តចំនួន១៣ បានរងផលប៉ះពាល់ដោយសារទឹកជំនន់។
រដ្ឋមន្ត្រីក្រសួងសាធារណការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុល មានប្រសាសន៍ក្នុងពេលចុះត្រួតពិនិត្យស្ថានភាពទឹកជំនន់នៅក្នុងខណ្ឌដង្កោ រាជធានីភ្នំពេញ ថា ជំនន់ទឹកភ្លៀង បានបង្កផលប៉ះពាល់ដល់ផ្លូវចំនួន ៨៧ខ្សែ ប្រវែង២៤៣គីឡូម៉ែត្រ ស្មើនឹង១៩៩កំណាត់ នៅក្នុងខេត្តចំនួន១៣។
លោកថា៖ «មន្ត្រីជំនាញយើងកំពុងរកមធ្យោបាយធ្វើម៉េចកុំឱ្យទឹកហូរកាត់ផ្លូវ»។
លោក ស៊ុន ចាន់ថុល បន្តថា មកដល់ពេលនេះ ក្រុមការងារក្រសួងកំពុងបន្តចុះតាមដាននិងវាយតម្លៃស្ថានភាពផ្លូវដែលរងការខូចខាត ដើម្បីត្រៀមជួសជុលឡើងវិញក្រោយពេលជំនន់ទឹកភ្លៀងស្រកចុះវិញ។
កាលពីថ្ងៃអង្គារម្សិលមិញ ក្រសួងសាធារណការ បានចេញសេចក្តីណែនាំមួយដល់មន្ត្រីក្រោមឱវាទ ឱ្យចូលរួមសហការជាមួយស្ថាប័ននិងអាជ្ញាធរពាក់ព័ន្ធ ដើម្បីឆ្លើយតបទៅនឹងគ្រោះអាសន្នទឹកជំនន់។
ក្រសួងបន្តថា៖ «ក្នុងករណីមានការកាត់ផ្តាច់ផ្លូវ-ស្ពាន [ការផ្តាច់ចរាចរណ៍] សូមចាត់កម្លាំងជាបន្ទាន់ ចុះជួសជុលនិងតភ្ជាប់ផ្លូវស្ពាន ដើម្បីធានាឱ្យមាននិរន្តរភាពចរាចរណ៍ […] ត្រូវចូលរួមស្តារឡើងវិញនូវហេដ្ឋារចនាសម្ព័ន្ធផ្លូវថ្នល់-ស្ពានដែលកំពុងទទួលរងផលប៉ះពាល់ដោយសារជំនន់ទឹកភ្លៀង និងស្ថិតក្រោមសមត្ថកិច្ចរបស់ក្រសួង»។
ក្រសួងក៏បានណែនាំឱ្យទប់ស្កាត់មធ្យោបាយដឹកជញ្ជូនធុនធ្ងន់ដែលឆ្លងកាត់ទីតាំងកំពុងរងគ្រោះដោយទឹកជំនន់ និងចាត់កម្លាំងដំឡើងស្លាកសញ្ញាចរាចរណ៍និងស្លាកសញ្ញាសុវត្ថិភាពនៅតាមទីតាំងដែលកំពុងនិងងាយរងគ្រោះដោយទឹកជំនន់ ដើម្បីចៀសវាងនូវគ្រោះថ្នាក់ដល់អ្នកដំណើរ៕