អគារថ្មីមួយទៀតកំពុងលេចរូបរាងឡើងនៅលើដីពហុកីឡដ្ឋានជាតិអូឡាំពិក ដែលរដ្ឋាភិបាលបានប្រគល់ទៅឱ្យអគ្គិសនីកម្ពុជា។
អនុស្ថានីយអគ្គិសនីកំពុងត្រូវបានសាងសង់នៅប៉ែកខាងកើតនៃពហុកីឡដ្ឋាននេះ ដោយផ្អែកលើសេចក្ដីប្រកាសកាលពីមួយឆ្នាំមុនរបស់ក្រសួងអប់រំ យុវជន និងកីឡា។ ឯកសាររបស់រដ្ឋាភិបាលបានឱ្យដឹងថា គម្រោងនេះគឺជាផ្នែកមួយនៃការងាររបស់ទីភ្នាក់ងារជំនួយរបស់ជប៉ុន JICA ដើម្បីពង្រីកការបញ្ជូននិងចែកចាយបណ្ដាញអគ្គិសនី។
កញ្ញា សយ បូរ៉ា អាយុ១៨ឆ្នាំ បាននិយាយថា កញ្ញាពិបាកក្នុងការហាត់ប្រាណនៅពហុកីឡដ្ឋាននេះណាស់ ដោយសារតែការសាងសង់និងចំណតរថយន្ត។ កញ្ញាបាននិយាយថា ទីធ្លានេះមានមនុស្សកកកុញច្រើន ហើយក្រុមបាល់ទាត់បានយកទីធ្លាមួយផ្នែកដែលកញ្ញាធ្លាប់ប្រើហាត់ប្រាណនៅពេលព្រឹកទៀតផង។
កញ្ញាត្រូវបានបង្ខំឱ្យផ្លាស់ប្តូរទីតាំងហាត់ប្រាណរបស់ខ្លួន ដោយទៅដើរលើជណ្ដើរដែលជាកន្លែងអង្គុយរបស់អ្នកគាំទ្របាល់ទាត់ និងវាលនៅខាងក្នុងនៃពហុកីឡដ្ឋាន។ អគារខ្ពស់ៗដែលព័ទ្ធជុំវិញ បានធ្វើឱ្យកញ្ញាពិបាកដកដង្ហើមបន្ទាប់ពីរត់ហាត់ប្រាណរួច។
កញ្ញានិយាយថា៖ «វារាងស្អុះស្អាប់ ពីព្រោះអាគារ វាខ្ពស់ វាបិទជិត។ វាអត់សូវជះពន្លឺព្រះអាទិត្យមកត្រូវយើង។ ពីមុន យើងមកហាត់ព្រលឹមឡើង បើថ្ងៃចឹង! ពេលយើងហាត់ទៅ វាស្រស់ស្រាយ តែឥលូវ វារាងស្អុះស្អាប់អ៊ីចឹង »។
ការសាងសង់អនុស្ថានីយអគ្គិសនី និងការអភិវឌ្ឍខុនដូដែលគ្រប់គ្រងដោយជនជាតិចិនបានលយទៅលើផ្លូវ ហើយកម្ទេចកម្ទីបាក់បែកបានធ្លាក់ទៅលើកំណាត់ផ្លូវនោះ។ ផ្លូវនោះកំពុងត្រូវបានប្រើប្រាស់ទាំងអ្នកហាត់ប្រាណនិងរថយន្តដែលបើកទៅរកចំណត។
អ្នកលក់ទឹកក្រូចនៅក្បែរពហុកីឡដ្ឋាន អ្នកស្រី គឹម ម៉ៃអេង អាយុ៥៦ឆ្នាំ កំពុងយួរថង់ដែលមានទឹកចំនួន៥ដប ដើរសំដៅទៅក្រុមមនុស្សវ័យចំណាស់ដែលកំពុងរាំហាត់ប្រាណ ដើម្បីសាកសួរក្រែងមានអ្នកស្រេកទឹក ហើយត្រូវការទឹករបស់គាត់។ អ្នកស្រីបាននិយាយថា អ្នកស្រីធ្លាប់មានតង់លក់ខាងក្នុងពហុកីឡដ្ឋាន ប៉ុន្តែមន្ត្រីបានហាមប្រាមអ្នកលក់មិនឱ្យលក់អាហារសម្រន់និងភេសជ្ជៈនៅក្នុងបរិវេណនោះទៀតទេ។
អ្នកស្រី ម៉ៃអេង បាននិយាយថា «វាអត់ដូចមុនទេ» នៅពេលដែលពហុកីឡដ្ឋានមិនមានការអភិវឌ្ឍ។ អ្នកស្រីបន្តថា អ្នកហាត់ប្រាណក៏បានត្អូញត្អែរដែរ ពីព្រោះពួកគាត់បាត់បង់កន្លែងសម្រាប់រត់ ដោយសារតែចំណតនិងសំណង់។ អ្នកស្រីបារម្ភថា អ្នកដែលមករាំនៅព្រឹកព្រហាមនិងព្រលប់ ដើម្បីរាំហាត់ប្រាណជាក្រុមនិងហាត់ថៃជី (Tai Chi) នឹងមិនមានទៀតទេនៅពេលឆាប់ៗខាងមុខ។
អ្នកស្រីនិយាយថា៖ «គេថា គេធ្វើដូចនៅស្រុកក្រៅ។ គេបំបិទទាំងអស់តែម្តង បន្តិចទៀតកន្លែងហាត់ប្រាណដែលគេរាំហ្នឹង ក៏គេបិទដែរ។ គេធ្វើឱ្យយើងទៅហាត់ក្នុងក្លឹបវិញ។ យើងមិនដឹងយ៉ាងម៉េចទេ ចាំមើលតទៅមុខមើ! វាពិបាក់ណាស់សព្វថ្ងៃហ្នឹង»។
យោងតាមលិខិតដែលចុះហត្ថលេខាដោយរដ្ឋមន្រ្តីក្រសួងអប់រំ យុវជន និងកីឡា លោក ហង់ ជួនណារ៉ុន កាលពីខែតុលា ឆ្នាំ២០១៣ ក្រសួងបានផ្ទេរដីទំហំ៦០គុណនឹង២៦ម៉ែត្រ ទៅឱ្យអគ្គិសនីកម្ពុជា ដើម្បីឱ្យអង្គការ JICA អាចសាងសង់អនុស្ថានីយដែលជាផ្នែកមួយនៃកញ្ចប់ជំនួយប្រមាណ១៣៤លានដុល្លារ ដើម្បីគាំទ្រនូវគម្រោងអភិវឌ្ឍន៍ចំនួន៣ ដែលលោកនាយករដ្ឋមន្រ្តី ហ៊ុន សែន បានចុះហត្ថលេខាកាលពីខែធ្នូ ជាមួយអតីតនាយករដ្ឋមន្ត្រីជប៉ុន ស៊ិនហ្សូ អាបេ។
លោក ផៃ ស៊ីផាន អ្នកនាំពាក្យរដ្ឋាភិបាល បានថ្លែងថា ទីតាំងនេះជាយុទ្ធសាស្ត្រសម្រាប់ការចែកចាយអគ្គិសនី។
លោកថ្លែងថា៖ «ទីមួយ! យើងដឹងហើយ ជាសេចក្តីត្រូវការរបស់សាធារណៈ ដូច្នេះការផ្តល់ សម្បទានដីកន្លែងហ្នឹងសម្រាប់ឱ្យអគ្គិសនីកម្ពុជា វាជាការសមស្របហើយសម្រាប់ផលប្រយោជន៍សាធារណៈ»។
នៅពេលត្រូវបានគេសួរអំពីការព្រួយបារម្ភរបស់សាធារណជនទាក់ទងនឹងការពង្រួមទីសាធារណៈ និងសំណង់ដែលកំពុងកើតមានឡើង លោក ស៊ីផាន បាននិយាយថា អគារទាំងនោះនឹងជួយបន្ថែមទៀតដល់ទេសភាពក្រុង។
លោកបន្តថា៖ «សោភ័ណភាពនៅទីក្រុងគឺអាគារខ្ពស់នេះឯង ហើយទីពីរយើងធ្វើឆ្លើយតបទៅនឹងសេចក្តីត្រូវការជាអាទិភាពរបស់សាធារណៈ មិនមែនដើម្បីផ្គាប់ជនណាម្នាក់នោះទេ»។
អគ្គលេខាធិការគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បានទទួលស្គាល់ការស្ថាបនានេះ ប៉ុន្តែមិនបានឆ្លើយតបនឹងសំណួរថា តើបញ្ហានេះនឹងជះឥទ្ធិពលដល់អត្តពលិកនិងពលរដ្ឋដែលប្រើប្រាស់ពហុកីឡដ្ឋានអ្វីខ្លះទេ ដោយបង្វែរសំណួរឱ្យទៅសួរក្រសួងអប់រំ យុវជន និងកីឡា ។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចារ បានបដិសេធសុំមិនធ្វើអត្ថាធិប្បាយជុំវិញរឿងនេះ។
នាយករងភ្នាក់ងារអចលនទ្រព្យ CBRE កម្ពុជា អ្នកស្រី អាន ធីតា មានប្រសាសន៍ថា ដីនៅជុំវិញពហុកីឡដ្ឋាននេះមានតម្លៃគួរឱ្យកត់សម្គាល់ ដែលឥលូវមានតម្លៃរហូតដល់៤ ៥០០ដុល្លារក្នុងមួយម៉ែត្រការ៉េ ដោយសារទីតាំងនេះនៅចំកណ្តាលក្រុង និងការជួលរយៈពេលវែងដែលរដ្ឋាភិបាលផ្តល់ជូនក្រុមហ៊ុនអភិវឌ្ឍលើដីរដ្ឋ។
អ្នកស្រីបាននិយាយថា តំបន់នេះក៏មានមនុស្សរស់នៅច្រើនកុះករ រួមជាមួយនឹងការអភិវឌ្ឍ ដែលវាជាកត្តាជំរុញឱ្យមានតម្រូវការកាន់កើនឡើង។
អ្នកស្រីបាននិយាយថា៖ «ប្រសិនបើអ្នកវិនិយោគទិញរស់នៅម្ដុំហ្នឹង គួរតែទិញឱ្យហើយ ពីព្រោះបន្តិចទៀតអាចនឹងពិបាករក»។
យោងតាមតារាងរបស់ CBRE ផ្ទះអាជីវកម្មក្នុងគម្រោងទីក្រុងអូឡាំព្យារបស់ក្រុមហ៊ុន OCIC មានតម្លៃ៧សែនដុល្លារ រីឯស្កាយវីឡា (Sky Villa) ដែលជាផ្នែកមួយនៃ MCC Land គ្រប់គ្រងដោយជនជាតិចិន មានតម្លៃចាប់ពី ៧០ ៧២០០ ដុល្លារ។
មគ្គុទ្ទេសក៍ជាន់ខ្ពស់ក្រុមហ៊ុនទេសចរណ៍ស្ថាបត្យកម្មខ្មែរ អ្នកស្រី ហ៊ុន សក្កណា បាននិយាយថាពហុកីឡដ្ឋានជាតិអូឡាំពិក គឺជាវិមានដ៏សំខាន់មួយនៅក្នុងរាជធានី ដោយកត់សម្គាល់ថា វាត្រូវបានរចនាដោយស្ថាបត្យករល្បីឈ្មោះ លោក វណ្ណ ម៉ូលីវណ្ណ ដើម្បីប្រើក្នុងការប្រកួតកីឡាអាស៊ីអាគ្នេយ៍ឆ្នាំ១៩៦៣ ដែលត្រូវបានលុបចោលវិញដោយសារតែស្ថានភាពនយោបាយ។
អ្នកស្រីបានកត់សម្គាល់ឃើញថា សំណង់បានជះឥទ្ធិពលដល់ពហុកីឡដ្ឋាន ព្រោះតែការខួងនិងការស្ទូចរបស់ផ្សេង «ធ្វើឱ្យវារញ្ជួយ ដូច្នេះ ខ្ញុំកត់សម្គាល់ថា ជុំវិញពហុកីឡដ្ឋានដែលវាមានស្នាមប្រេះនៅកន្លែងជាច្រើន»។
ឥលូវនេះ ការសាងសង់ទីលានកីឡាជាតិមរតកតេជោទំហំ៨៥ហិកតាកំពុងដំណើរការ ហើយពលរដ្ឋម្នាក់ទៀតឈ្មោះ បញ្ញា បារម្ភថា ពហុកីឡដ្ឋានជាតិអូឡាំពិកនឹងរុះរើបន្តិចម្តងៗ។
អ្នកស្រីនិយាយថា៖ «ខ្ញុំបារម្ភថា ពួកគេនឹងសាងសង់ពហុកីឡដ្ឋានថ្មី សម្រាប់ពេលអនាគតហើយពួកគេនឹងឈប់ប្រើប្រាស់ពហុកីឡដ្ឋាននេះសម្រាប់ការធ្វើជាម្ចាស់ផ្ទះព្រឹត្តិការណ៍ ដូច្នេះខ្ញុំបារម្ភថា ថ្ងៃណាមួយពួកគេនឹងបំផ្លាញវាចោល»។
អ្នកស្រីបន្តថា៖ «ខ្ញុំមិនដឹងថា [ផែនការរបស់ពួកគេជាអ្វីទេ] ប៉ុន្តែខ្ញុំពិតជាបារម្ភអំពីវា ពីព្រោះពួកគេបានបំផ្លាញវាជាលក្ខណៈប្រយោលដោយការសាងសង់អាគារ»៕