កម្លាំងមន្ទីរប្រឆាំងបទល្មើសគ្រឿងញៀន បានបញ្ជូនជនសង្ស័យជនជាតិចិនចំនួន៤នាក់ ទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមច្បាប់ ពាក់ព័ន្ធនឹងករណីជួញដូរគ្រឿងញឿននិងសារធាតុផ្សំឆ្លងដែនជិត៣តោន ដែលមានតម្លៃជាង៣០លានដុល្លារអាមេរិក។
គេហទំព័រអគ្គស្នងការដ្ឋាននគរបាលជាតិ បានផ្សព្វផ្សាយថា កម្លាំងជំនាញបទល្មើសគ្រឿងញៀន បានបញ្ជូនជនសង្ស័យទាំង៤នាក់នោះទៅសាលាដំបូងរាជធានីភ្នំពេញ កាលពីរសៀលថ្ងៃម្សិលមិញ ក្រោយពីបានបង្ក្រាបករណីដឹកជញ្ជូន ជួញដូរឆ្លងដែន និងរក្សាទុកកែច្នៃ គ្រឿងញៀនខុសច្បាប់ ទម្ងន់២ ១០៦គីឡូក្រាម និង២១៥,៨៩ក្រាម រួមនឹងសារធាតុគីមីផ្សំ៦០០គីឡូក្រាម នៅក្នុងភូមិសាស្ត្រខេត្តព្រះសីហនុ និងរាជធានីភ្នំពេញ កាលពីថ្ងៃទី០៧ ខែតុលា ឆ្នាំ២០២០។
អគ្គស្នងការ បានបន្តថា កិច្ចប្រតិបត្តិការនេះ មន្ត្រីជំនាញរបស់មន្ទីរប្រឆាំងបទល្មើសគ្រឿងញៀន សហការជាមួយស្នងការដ្ឋាននគរបាលខេត្តព្រះវិហារ រាជធានីភ្នំពេញ ខេត្តព្រះសីហនុ នាយកដ្ឋានស៊ើបការណ៍ខាងក្រៅនិងបច្ចេកទេស ព្រមទាំងមានការសម្របសម្រួលដឹកនាំពីព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ខេត្តព្រះវិហារ ខេត្តព្រះសីហនុ បានដំណើរការស្រាវជ្រាវ បង្ក្រាបករណីដឹកជញ្ជូននិងជួញដូរគ្រឿងញៀនឆ្លងដែនដោយខុសច្បាប់ពីប្រទេសឡាវ ឆ្លងកាត់ប្រទេសកម្ពុជា ទៅប្រទេសចិន (តៃវ៉ាន់)។
អគ្គស្នងការ បានឱ្យដឹងអត្តសញ្ញាណបុរសជនសង្ស័យទាំង៤នាក់ ជាជនជាតិចិនតៃវ៉ាន់ រួមមាន ឈ្មោះ ចិន ជឺជា (CHEN CHIH CHIEH), ឈ្មោះ ចាង ឈិជឺ (Zhan Qi Zhi), ឈ្មោះ យ៉ូវ យ៉ាវជុង (YU Yao Tsung) និងឈ្មោះ ឈិន ប៉ាវជីន (Chen Pao Jiun) ខណៈជនសង្ស័យម្នាក់ទៀត ឈ្មោះ វូ ឈីសុន (WU Chi Hsun) បានកាន់គ្រឿងញៀន លួចសម្រូតតាមបង្កាន់ដៃអាគារ ហើយធ្លាក់បណ្ដាលឱ្យស្លាប់ ។
ករណីនេះ មន្ទីរប្រឆាំងបទល្មើសគ្រឿងញៀន កំពុងបន្តស្រាវជ្រាវរកបក្ខពួកដែលនៅសេសសល់ និងសហការជាមួយសមត្ថកិច្ចនៃប្រទេសពាក់ព័ន្ធ ដើម្បីស្រាវជ្រាវបង្ក្រាបឧក្រិដ្ឋជនជាមេខ្លោង។
វីអូឌី ពុំអាចសុំការបញ្ជាក់ពីអ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង បាននៅឡើយទេ នៅថ្ងៃព្រហស្បតិ៍នេះ៕