លោក ជា សុធា មានប្រសាសន៍ថា កាលពីមុនលោករស់នៅដោយសប្បាយរីករាយជាមួយភរិយារបស់លោកនៅឯខេត្តសៀមរាប ដែលជាកន្លែងលោកធ្វើការជាប្រធានសន្តិសុខសណ្ឋាគារមួយហើយនាងជាអ្នករបាំប្រពៃណីដែលសម្តែងនៅកម្មវិធីអាហារពេលល្ងាចជាច្រើន។
ប៉ុន្តែកាលពីចុងសប្តាហ៍មុន ចំពេលមានព្យុះកំពុងវាយលុកក្នុងប្រទេស ខ្ទមដែលគ្រួសារអ្នកទាំងពីរបានសាងសង់នៅកន្លែងដែលពួកគេធ្វើស្រែចម្ការក្រោយបាត់បង់ការងារដោយសារកូវីដ១៩ បានបាក់រលំទៅលើស្រ្តីជាប្រពន្ធ។ លោក សុធា នៅពេលនោះកំពុងឃ្វាលពពែនៅចម្ងាយប្រហែល៣០ម៉ែត្រ។ គាត់បានឮកូនប្រុសអាយុ៤ឆ្នាំរបស់គាត់កំពុងយំនៅក្នុងគំនរបាក់បែក។
សុធា បាននិយាយកាលពីថ្ងៃព្រហស្បតិ៍ថា៖ «វាគ្រាំងតែម្ដងទៅ»។
លោកប្រាប់បន្តថា៖ «ខ្ញុំហែករោងចូលទៅក្នុង រោងលិច ខ្ញុំក៏យកខ្នងទល់ផង ចាប់ទាញផង ចាប់លើកផង […] ខ្ញុំគិតថា ពួកគាត់ស្លាប់ចោលខ្ញុំហើយ ប៉ុន្តែមកពីខ្ញុំនៅម្នាក់ឯងផង ក៏ស្ទុះស្ទា ប៉ប្រះលើកទាញៗ»។
កូនរបស់គាត់បានរួចផុតជីវិត ប៉ុន្តែ សួស សម្ផស្ស អាយុ២៧ឆ្នាំ ដែលជាភរិយារបស់លោក បានស្លាប់បាត់ទៅហើយ។
សម្ផស្ស មិនត្រូវបានចុះបញ្ជីក្នុងចំណោមអ្នកស្លាប់ជាផ្លូវការចំនួន១៣នាក់ដោយសារខ្យល់ព្យុះនិងទឹកជំនន់នៅក្នុងប្រទេសកម្ពុជាកាលពីសប្តាហ៍មុននោះទេ ដោយអាជ្ញាធរបានផ្តល់សារចម្រុះអំពីមូលហេតុដែលនាងមិនត្រូវបានរាប់បញ្ចូល។
លោក សុធា អាយុ៤០ឆ្នាំ បាននិយាយថា៖ «ខ្ញុំនៅស្លុតនៅឡើយទេ»។
គ្រួសារនេះបានចាប់ផ្តើមធ្វើស្រែលើផ្ទៃដី៣ហិកតាដែលពួកគេមាននៅខេត្តកំពង់ធំ បន្ទាប់ពីការរាតត្បាតជាសកលនៃជំងឺកូវីដ១៩ ដែលវាក៏បានបំផ្លាញឧស្សាហកម្មទេសចរណ៍នៅខេត្តសៀមរាប។ ប្តីរបស់នាងបាននិយាយថា សម្ផស្ស បានធ្វើការជាអ្នករាំចាប់តាំងពីនាងមានអាយុ១៤ឆ្នាំ។
ដារ៉ា រាជ្យ មិត្តរួមការងារនៅឯភោជនីយដ្ឋានគូលែនទី២ បាននិយាយថា សម្ផស្ស បានសម្តែងរបាំអប្សរា របាំក្ងោក និងសុវណ្ណមច្ឆា នៅទីនោះអស់រយៈពេលជាច្រើនឆ្នាំមកហើយ។
លោក រាជ្យ និយាយថា៖ «ការសម្ដែងរបស់នាងស្អាតណាស»។
លោកបន្តថា ភ្ញៀវទេសចរស្រឡាញ់ការសម្តែងបែបប្រពៃណីទាំងនោះ ហើយលោកបាននិយាយថា លោកមានការសោកសៅយ៉ាងខ្លាំងចំពោះមរណភាពរបស់នាង។
មេប៉ុស្តិ៍នគរបាលឃុំពពក ស្រុកស្ទោង លោក ឈឹម លីណា បាននិយាយថា មានភ្លៀងរលឹមស្រិចៗ មុនពេលមានខ្យល់បក់បោកខ្លាំងទៅលើកសិដ្ឋានរបស់ប្តីប្រពន្ធនេះកាលពីថ្ងៃសៅរ៍។
លោកបាននិយាយថា៖ «ព្យុះនេះបានបោកបក់ទៅលើកសិដ្ឋានរបស់ពួកគេ ហើយក៏បាក់រលំខ្ទមសង្កត់លើនាង។ ពួកគេទើបតែមកស្នាក់នៅបណ្តោះអាសន្នប៉ុណ្ណោះ»។
លោក ប៉ ប៊ុនហួត ឪពុកក្មេករបស់ សម្ផស្ស បាននិយាយថា សសរខ្ទមបានបាក់ស្រុតចូលទៅក្នុងដី បន្ទាប់ពីមានភ្លៀងធ្លាក់ជាច្រើនថ្ងៃ។
លោកបានបន្ថែមថា ប្តីប្រពន្ធទាំងពីរដាំដំឡូងមីលើចម្ការ ពីព្រោះពួកគេទាំងពីរបានបាត់បង់ការងារដោយសារកូវីដ១៩។
លោក ប៊ុនហួត មានប្រសាសន៍ថា៖ «ខ្ញុំវាសោកស្ដាយឥតឧបមាទៅទៀតណា នឹកឃើញតូចចិត្តថា កូននេះដោយសារតែរឿងកូវីដនេះឯង បានជាវាធ្លាក់ខ្លួនដល់ប៉ុណ្ណឹង»។
លោកបាននិយាយថា រាងកាយរបស់ សម្ផស្ស ត្រូវដឹកនៅក្រោមដំណក់ទឹកភ្លៀងចម្ងាយ១០គីឡូម៉ែត្រ ទើបដល់ផ្លូវដែលរថយន្តអាចទៅចូលដល់។ នាងត្រូវបានគេនាំទៅស្រុកកំណើតរបស់នាងក្នុងខេត្តសៀមរាប ដើម្បីធ្វើពិធីបូជាសព។
ទោះយ៉ាងណា អភិបាលខេត្តកំពង់ធំ លោក សុខ លូ បានមានប្រសាសន៍ថា ខេត្តរបស់លោកស្ទើរតែមិនមានផលប៉ះពាល់អ្វីសោះពីទឹកភ្លៀងដែលកំពុងកើតឡើងទូទាំងប្រទេស។
លោក សុខ លូ បាននិយាយពីការស្លាប់របស់ សម្ផស្ស ថា៖ «ខ្ញុំអត់ទាន់បានទទួលព័ត៌មានទេ»។
ក្រៅពីនេះ លោកក៏បានបដិសេធចំពោះព័ត៌មាននៃការលង់ទឹករបស់ក្មេងប្រុសម្នាក់នៅឯសាលាមួយក្នុងខេត្ត ដែលអាជ្ញាធរជាតិបានចុះបញ្ជីក្នុងចំណោមអ្នកស្លាប់ដោយទឹកជំនន់។
លោក សុខ លូ បាននិយាយថា ក្មេងប្រុសកំពុងលេងនៅក្នុងទឹកហើយរអិលជើង ដោយសារតែការធ្វេសប្រហែសរបស់គេ មិនមែនដោយសារតែទឹកជំនន់ទេ។ លោកបានបន្ថែមថា មិនមានសាលារៀននៅខេត្តរបស់លោកណាត្រូវទឹកជន់លិចទេ។
អាជ្ញាធរជាតិមានទស្សនៈផ្សេងៗគ្នា
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា មានប្រសាសន៍ថា មរណភាពរបស់ សម្ផស្ស គួរតែត្រូវបានរាប់ក្នុងចំណោមអ្នករងគ្រោះដោយសារទឹកជំនន់ ដោយលោកនិយាយថា៖
«ព្រោះនៅក្នុងព្រឹត្តិការណ៍ហ្នឹង វាមានភ្លៀងមានខ្យល់»។
លោក សុខា បាននិយាយថា ការស្លាប់របស់អ្នកនេសាទម្នាក់ដែលត្រូវបានទឹកកួចក្នុងទឹកជំនន់នៅខេត្តបាត់ដំបង ដែលអភិបាលរងខេត្តបានប្រាប់ VOD កាលពីថ្ងៃពុធថា មិនមែនដោយសារទឹកជំនន់ទេ ក៏គួរតែត្រូវបានរាប់បញ្ចូលដែរ។
ទោះយ៉ាងណាក៏ដោយ លោក សុខា មិនធ្វើអត្ថាធិប្បាយលើទស្សនៈខុសគ្នាជាមួយអាជ្ញាធរខេត្តទាំងនោះទេ។
លោកបន្ថែមថា ខេត្តចំនួន១៩បានរងផលប៉ះពាល់ដោយទឹកជំនន់ ដោយខេត្តបន្ទាយមានជ័យបាត់ដំបង ប៉ៃលិន ពោធិ៍សាត់ និងភ្នំពេញ បានរងការប៉ះពាល់ខ្លាំងជាងគេ។
របាយការណ៍របស់អាជ្ញាធរជាតិគ្រប់គ្រងគ្រោះមហន្តរាយដែលចេញនៅថ្ងៃសុក្រនេះ បង្ហាញថាប្រជាជនជាង៥ម៉ឺន៣ពាន់គ្រួសារត្រូវរងផលប៉ះពាល់ដោយសារជំនន់ទឹកភ្លៀង។
នាយកប្រតិបត្តិអង្គការតម្លាភាពអន្តរជាតិកម្ពុជា លោក ប៉ិច ពិសី មានប្រសាសន៍ថា អាជ្ញាធរជាតិនិងថ្នាក់ក្រោមជាតិ គួរតែធ្វើការរួមគ្នាដើម្បីធ្វើយ៉ាងណាធ្វើឱ្យប្រាកដចិត្តថា គេរាយការណ៍អំពីចំនួនមនុស្សស្លាប់ពិតប្រាកដ។
លោក ពិសី បាននិយាយថា តួលេខច្បាស់លាស់នឹងជួយក្នុងការឆ្លើយតបទាន់ពេលវេលា។
លោកបានមានប្រសាសន៍ថា៖ «យើងគួរតែតាមដានបន្តអំពីចំនួនពិតប្រាកដនៃចំនួនអ្នករងគ្រោះហ្នឹង ហើយឮព័ត៌មានដែលទទួលបានពីគេមក មានអ្នកខ្លះរងគ្រោះដែរ ប៉ុន្តែមិនត្រូវបានរាប់បញ្ចូលនៅក្នុងបញ្ជី»។
លោក សុធា ដែលជាប្តីរបស់ សម្ផស្ស បាននិយាយថា លោកមានការក្រៀមក្រំយ៉ាងខ្លាំងចំពោះមរណភាពរបស់ភរិយាលោក ហើយបានកំពុងប្រើថ្នាំសម្រាប់ទប់ទល់នឹងការថប់បារម្ភនិងការធ្លាក់ទឹកចិត្ត។
លោកនិយាយថា៖ «វាដូចជាលឿនពេក ហើយណាមួយប្រពន្ធខ្ញុំទើបតែអាយុ២៧ឆ្នាំ»។
គាត់បាននិយាយថា រូបភាពនៃការរកភរិយាក្នុងគំនរកម្ទេចកម្ទីខ្ទមបាក់បែករបស់ខ្លួន នឹងមិនបាត់ចេញពីក្នុងចិត្តរបស់លោកឡើយ។ ក្បាលរបស់ប្រពន្ធរបស់លោកបានត្រូវទង្គិចនឹងកំណាត់ឈើដែលវាក៏បានសង្កត់កូនរបស់លោកដែរនៅពេលនោះ។
លោកថា៖ «ខ្ញុំវាទទួលយកអាកន្លែងហ្នឹងវាមិនទាន់បាន រូបភាពវានៅតែដក់នឹងភ្នែកខ្ញុំនៅឡើយ»៕
ប្រែសម្រួលពីអត្ថបទដើមដែលជាភាសាអង់គ្លេសដោយ សំ ដារ៉ា