សាលាដំបូងរាជធានីភ្នំពេញ សម្រេចឃុំខ្លួនជនជាតិចិនតៃវ៉ាន់ចំនួន៤នាក់ ដាក់ពន្ធនាគារព្រៃស ពីបទ «ដឹកជញ្ជូន ជួួញដូរ កែច្នៃ និងរក្សាទុកគ្រឿងញៀន» ក្រោយពីកម្លាំងមន្ត្រីជំនាញបានរកឃើញថា ពួកគេជាប់ពាក់ព័ន្ធនឹងគ្រឿងញៀននិងសារធាតុផ្សំសរុបជិត៣តោន។
អ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង មានប្រសាសន៍នៅថ្ងៃសុក្រនេះថា បុរសជាជនសង្ស័យទាំង៤នាក់នេះ ត្រូវបានចៅក្រមស៊ើបសួរសម្រេចឃុំខ្លួនតាមនីតិវិធីនៅពន្ធនាគារព្រៃស ក្រោមការចោទប្រកាន់ពីបទ «ដឹកជញ្ជូន ជួញដូរ កែច្នៃ និងរក្សាទុកគ្រឿងញៀនខុសច្បាប់»។
លោកបាននិយាយថា៖ «អាហ្នឹងគឺបានសម្រេចចោទប្រកាន់ពីបទ រក្សា ដឹកជញ្ជូន ជួញដូរ[គ្រឿងញៀន] ហើយបានសម្រេចឃុំខ្លួនរួចហើយ សាកសួរហើយ ចោទប្រកាន់ហើយ បានឃុំខ្លួនពីម្សិលមិញហើយ»។
កាលពីរសៀលថ្ងៃពុធ កម្លាំងជំនាញបទល្មើសគ្រឿងញៀន បានបញ្ជូនជនសង្ស័យទាំង៤នាក់នោះទៅសាលាដំបូងរាជធានីភ្នំពេញ ក្រោយពីបានបង្ក្រាបករណីដឹកជញ្ជូន ជួញដូរឆ្លងដែន និងរក្សាទុកកែច្នៃគ្រឿងញៀនខុសច្បាប់ ទម្ងន់២ ១០៦គីឡូក្រាមនិង២១៥,៨៩ក្រាម រួមនឹងសារធាតុគីមីផ្សំ៦០០គីឡូក្រាម នៅក្នុងភូមិសាស្ត្រខេត្តព្រះសីហនុ និងរាជធានីភ្នំពេញ។
អគ្គស្នងការដ្ឋាននគរបាល បានឱ្យដឹងអត្តសញ្ញាណបុរសជនសង្ស័យជាជនជាតិចិនតៃវ៉ាន់ទាំងនោះ រួមមាន ឈ្មោះ ចិន ជឺជា (CHEN CHIH CHIEH), ចាង ឈិជឺ (Zhan Qi Zhi), យ៉ូវ យ៉ាវជុង (YU Yao Tsung) និង ឈិន ប៉ាវជីន (Chen Pao Jiun) ខណៈជនសង្ស័យម្នាក់ទៀត ឈ្មោះ វូ ឈីសុន (WU Chi Hsun) បានកាន់គ្រឿងញៀន លួចសម្រូតតាមបង្កាន់ដៃអាគារ ហើយធ្លាក់បណ្ដាលឱ្យស្លាប់ ។
អគ្គស្នងការ បន្តថា បច្ចុប្បន្ន មន្ទីរប្រឆាំងបទល្មើសគ្រឿងញៀន កំពុងបន្តស្រាវជ្រាវរកបក្ខពួកដែលនៅសេសសល់ និងសហការជាមួយសមត្ថកិច្ចនៃប្រទេសពាក់ព័ន្ធ ដើម្បីស្រាវជ្រាវបង្ក្រាបឧក្រិដ្ឋជនជាមេខ្លោង។
យោងតាមរបាយការណ៍បង្ក្រាបបទល្មើសគ្រឿងញៀនរបស់ក្រសួងមហាផ្ទៃ ក្នុងរយៈពេល៩ខែ ឆ្នាំ២០២០នេះ កម្លាំងសមត្ថកិច្ចបានបង្ក្រាបបទល្មើសគ្រឿងញៀនចំនួន៧ ៧៨៨ករណី ដោយឃាត់ខ្លួនជនសង្ស័យចំនួន១៥ ៧៧០នាក់ (ស្រី៩៨០នាក់) ក្នុងនោះ មានជនបរទេស២២៤នាក់ (ស្រី៣៣នាក់)។
របាយការណ៍បន្តថា ក្នុងប្រតិបត្តិការបង្ក្រាបនោះ សមត្ថកិច្ចបានរឹបអូសថ្នាំញៀនគ្រប់ប្រភេទជាង៧០២គីឡូក្រាម និង៥៤៦កញ្ចប់តូច, កញ្ឆាជាង២៨៧គីឡូក្រាម និង១៩៩ ៥៥៩ដើម៕