លោកប្រាយុទ្ធ ចាន់អូចា មិនចុះចេញពីតំណែងតាមការទាមទាររបស់យុវជនទេ

នាយករដ្ឋមន្ត្រីថៃលោក ប្រាយុទ្ធ ចាន់អូចា ប្តេជ្ញាមិនចុះចេញពីតំណែងតាមការទាមទាររបស់ក្រុមយុវជននោះទេ ដោយបញ្ចាក់ថា លោកមិនបានធ្វើអ្វីខុស ហើយនឹងប្រើច្បាប់ចាត់ការលើក្រុមអ្នកតវ៉ាទាំងនោះ។​

រយៈពេល៣ខែចុងក្រោយនេះសិស្ស-និស្សិតថៃរាប់ម៉ឺន រាប់សិននាក់នាក់តវ៉ានៅក្នុងទីក្រុងបាងកកជាបន្តបន្ទាប់ទាមទារ៣ចំណុចគឺ ទាមទារឱ្យលោកប្រាយុទ្ធ ចុះចេញពីតំណែងជានាយករដ្ឋមន្ត្រី ទាមទារឱ្យសរសេររដ្ឋធម្មនុញ្ញឡើងវិញ និង ទាមទារឱ្យធ្វើកំណែទម្រង់អំណាចព្រះមហាក្សត្រ។​

មូលហេតុមួយក្នុងចំណោម៣ចំណុចដែលយុវជនថៃទាមទារឱ្យលោក ប្រាយុទ្ធចុះចេញពីតំណែងគឺយុវជនចោទលោកប្រាយុទ្ធថា ឡើងកាន់តំណែងដោយមិនត្រឹមត្រូវ និង មិនមានសមត្ថភាពក្នុងការដោះស្រាយបញ្ហា។​

លោកប្រាយុទ្ធ ចាន់អូចា បញ្ជាក់ជំហរនៅថ្ងៃសុក្រម្សិលមិញថា លោក មិនចុះចេញពីតំណែងតាមការទាមទាររបស់ក្រុមយុវជននោះទេ ព្រោះលោកមិនបានធ្វើអ្វីខុស។ លោកបញ្ចាក់ថា ចំពោះអ្នកដែលនៅតែទាមទារបំពានច្បាប់ទៀត លោកនឹងប្រើច្បាប់ដើម្បីដោះស្រាយ៕​