លោកនាយករដ្ឋមន្ត្រី ហ៊ុន សែន បានឱ្យដឹងថា គិតត្រឹមយប់ម្សិលមិញរដ្ឋាភិបាលទទួលថវិកាពីសប្បុរសជន បានចំនួនជិត៧លានដុល្លារ ហើយលោកថា នឹងយកលុយនោះជួយសង្គ្រោះបន្ទាន់ដល់ប្រជាជនដែលរងគ្រោះដោយសារទឹកជំនន់។
ក្នុងគេហទំព័រហ្វេសប៊ុករបស់លោកនាយករដ្ឋមន្ត្រីហ៊ុន សែន បានបញ្ជាក់ថា គិតត្រឹមម៉ោង៩និង៥៣នាទីយប់ ថ្ងៃ១៧ ខែតុលា ឆ្នាំ២០២០ សរុបជនដែលបានចូលរួមបរិច្ចាកថវិកាជួយដល់ប្រជាពលរដ្ឋដែលរងគ្រោះដោយសារជំនន់ ទឹកភ្លៀងមានចំនួន ៦ ៨៣០ ០៤៩ ដុល្លារ លុយខ្មែរមានចំនួន៤៣៤ ៤០០ ០០០រៀល និងលុយអឺរ៉ូមានចំនួន ៥ ០០០€ (ប្រាំពាន់អឺរ៉ូ) បើគិតជាលុយដុល្លារទាំងអស់មានចំនួនសរុប ជិត៧លានដុល្លារ (៦ ៩៤០ ៩៩៧ដុល្លារ) ។
លោកនាយករដ្ឋមន្ត្រីឲ្យដឹងទៀតថា ថវិកាដែលសប្បុរសជនចូលរួមនេះនឹងចាត់ចែងជួយសង្រ្គោះបន្ទាន់ដល់អ្នករងគ្រោះដោយសារជំនន់ទឹកភ្លៀង តាមរយៈគណៈកម្មាធិការជាតិគ្រប់គ្រងគ្រោះមហន្តរាយ។
បន្ថែមពីនេះលោកនាយករដ្ឋមន្ត្រីបានសរសេរខ្លឹមសារបែបជាកំណាព្យខ្លីថា `«ស្រឡាញ់គ្នាក្នុងគ្រាក្រ ស្គាល់មិត្តល្អក្នុងគ្រាលំបាក »។
ទោះជាបែបនេះក្តី នៅព្រឹកថ្ងៃនេះ វីអូឌី មិនអាចសុំការបំភ្លឺពីអ្នកនាំពាក្យគ្រោះមហន្តរាយលោក ឃុន សុខា ជុំវិញការយកថវិកាចំណាយលើផ្នែកអ្វីខ្លះនៅឡើយ៕