សមត្ថកិច្ចខេត្តស្ទឹងត្រែង នៅថ្ងៃចន្ទនេះ បានបញ្ជូនជនសង្ស័យ២នាក់ទៅតុលាការ បន្ទាប់ពីរកឃើញថា ជាប់ពាក់ព័ន្ធនឹងគ្រឿងញៀនជិត៤គីឡូក្រាម និងថ្នាំគ្រវីចំនួន២កញ្ចប់តូច។
មន្ត្រីនគរបាលនៃស្នងការដ្ឋាននគរបាលខេត្តស្ទឹងត្រែងដែលសុំមិនបញ្ចេញឈ្មោះ បានប្រាប់វីអូឌីនៅថ្ងៃចន្ទថា កាលពីល្ងាចថ្ងៃសៅរ៍ សមត្ថកិច្ចបានបង្ក្រាបជនសង្ស័យម្នាក់ពាក់ព័ន្ធនឹងបទល្មើសគ្រឿងញៀន នៅចំណុចសង្កាត់ស្រះឫស្សី ក្រុងស្ទឹងត្រែង និងបានឈានដល់កំណត់អត្តសញ្ញាណនិងឃាត់ខ្លួនបានជនសង្ស័យម្នាក់ទៀតនៅព្រឹកថ្ងៃអាទិត្យ នៅជិតច្រកអន្តរជាតិត្រពាំងក្រៀល ជាប់ព្រំដែនប្រទេសឡាវ។
ជនសង្ស័យដែលសមត្ថកិច្ចបានបង្ក្រាបពាក់ព័ន្ធនឹងបទល្មើសគ្រឿងញៀននោះ លោកថា មានឈ្មោះ អ៊ិន ថា ភេទស្រី អាយុ៤៧ឆ្នាំ និងម្នាក់ទៀតឈ្មោះ វ៉ាន ភូ ភេទប្រុស អាយុ២៧ឆ្នាំ។
លោកបន្តថា ការបង្ក្រាបបទល្មើសគ្រឿងញៀននេះ សមត្ថកិច្ចបានដកហូតគ្រឿងញៀនបាន៤កញ្ចប់ធំ និងថ្នាំគ្រវីចំនួន២កញ្ចប់តូច។
មន្ត្រីនគរបាលរូបនេះ បានបញ្ជាក់ថា ក្រោយការសាកសួរពីមន្ត្រីជំនាញ ជនសង្ស័យត្រូវបានមន្ត្រីជំនាញបញ្ជូនទៅសាលាដំបូងខេត្តស្ទឹងត្រែង នៅថ្ងៃចន្ទនេះ ដើម្បីបន្តចំណាត់ការតាមនីតិវិធីច្បាប់។
អ្នកនាំពាក្យសាលាដំបូងខេត្តស្ទឹងត្រែង លោក ឈុំ ស៊ាងហាក់ បានឱ្យដឹងថា មន្ត្រីជំនាញបានបញ្ជូនជនសង្ស័យទាំងពីរនាក់នេះមកដល់សាលាដំបូងខេត្តហើយ ហើយកំពុងស្ថិតក្រោមការសាកសួរនិងស៊ើបអង្កេតបន្ថែមពីសំណាក់អយ្យការអមសាលាដំបូងខេត្ត មុននឹងបន្តបញ្ជូនទៅចៅក្រមស៊ើបសួរ។
លោកនិយាយថា៖ «គេទើបតែបញ្ជូនមកព្រឹកមិញនៅតុលាការ […] ខាងអយ្យការកំពុងតែអនុវត្តរឿង កំពុងធ្វើនីតិវិធី»។
យោងតាមរបាយការណ៍បង្ក្រាបបទល្មើសគ្រឿងញៀនរបស់ក្រសួងមហាផ្ទៃ ក្នុងរយៈពេល៩ខែ ឆ្នាំ២០២០នេះ កម្លាំងសមត្ថកិច្ចបានបង្ក្រាបបទល្មើសគ្រឿងញៀនចំនួន៧ ៧៨៨ករណី ដោយឃាត់ខ្លួនជនសង្ស័យចំនួន១៥ ៧៧០នាក់ (ស្រី៩៨០នាក់) ក្នុងនោះមានជនបរទេស២២៤នាក់ (ស្រី៣៣នាក់)។
របាយការណ៍បន្តថា ក្នុងប្រតិបត្តិការបង្ក្រាបនោះ សមត្ថកិច្ចបានរឹបអូសថ្នាំញៀនគ្រប់ប្រភេទជាង៧០២គីឡូក្រាម និង៥៤៦កញ្ចប់តូច កញ្ឆាជាង២៨៧គីឡូក្រាមនិង១៩៩ ៥៥៩ដើម៕