លោកនាយករដ្ឋមន្ត្រី ហ៊ុន សែន នៅថ្ងៃអង្គារនេះ កំពុងធ្វើដំណើរទៅកាន់ខេត្តបន្ទាយមានជ័យ ដើម្បីសួរសុខទុក្ខប្រជាពលរដ្ឋប្រមាណ២ម៉ឺនគ្រួសារដែលរងគ្រោះដោយសារទឹកជំនន់ ខណៈអតីតមេដឹកនាំបក្សប្រឆាំង លោក កឹម សុខា កំពុងចែកអំណោយជូនពលរដ្ឋនៅខេត្តនោះ។
លោកនាយករដ្ឋមន្ត្រី បានលើកឡើងក្នុងទំព័រហ្វេសប៊ុករបស់លោកថា រូបលោកកំពុងធ្វើដំណើរទៅខេត្តបន្ទាយមានជ័យ ដើម្បីសួរសុខទុក្ខនិងជួយឧបត្ថម្ភដល់ប្រជាពលរដ្ឋប្រមាណ២ម៉ឺនគ្រួសារដែលកំពុងរងគ្រោះដោយជំនន់ទឹកភ្លៀង។ លោកបន្តថា ខេត្តបន្ទាយមានជ័យជាខេត្តដែលរងគ្រោះធ្ងន់ជាងគេនិងយូរជាងគេ ដែលចាំបាច់ត្រូវផ្តល់អាទិភាពសង្រ្គោះផងនិងស្តារឡើងវិញក្រោយទឹកជំនន់ផង។
លោកបន្តថា៖ «ខ្ញុំនឹងបំពេញការងារពីរថ្ងៃនៅខេត្តបន្ទាយមានជ័យ គឺថ្ងៃទី២១និងថ្ងៃទី២២ ខែតុលា ឆ្នាំ២០២០ មុននឹងត្រឡប់មកភ្នំពេញវិញ ដើម្បីដឹកនាំការប្រជុំគណៈរដ្ឋមន្ត្រី នៅថ្ងៃទី២៣ខែតុលា ឆ្នាំ២០២០»។
លោកនាយករដ្ឋមន្ត្រី ហ៊ុន សែន បានថ្លែងអំណរគុណដល់សប្បុរសជនដែលបានជួយផ្តល់ជាថវិកា សម្ភារ ស្បៀងអាហារ ជាដើម តាមរយៈរាជរដ្ឋាភិបាល ឬកាកបាទក្រហម ឬអាជ្ញាធរថ្នាក់់ក្រោមជាតិ ឬចុះចែកផ្ទាល់ដល់ប្រជាពលរដ្ឋដែលរងគ្រោះ។
លោកបានបន្ថែមថា៖ «សូមបងប្អូនប្រជាពលរដ្ឋដែលរងគ្រោះដោយទឹកជំនន់ទាំងអស់ ត្រូវមានការប្រុងប្រយ័ត្នដោយខ្លួនឯង ជាពិសេសត្រូវមានការប្រុងប្រយ័ត្នចំពោះកុមារតូចៗ ត្រូវរស់នៅស្អាត ហូបស្អាត អំឡុងពេលទឹកជំនន់និងក្រោយពេលទឹកជំនន់»។
ស្របពេលគ្នានេះដែរ លោក កឹម សុខា អតីតប្រធានបក្សប្រឆាំង នៅព្រឹកថ្ងៃអង្គារនេះ កំពុងចែកអំណោយជូនប្រជាពលរដ្ឋចំនួន២០០គ្រួសារ នៅក្រុងសិរីសោភ័ណ ខេត្តបន្ទាយមានជ័យ។
លោក កឹម សុខា បានលើកឡើងក្នុងទំព័រហ្វេសប៊ុកថា៖ «ខ្ញុំ និងសហការី បាននាំយកស្បៀងនិងសម្ភារមួយចំនួន [អង្ករ តង់កៅស៊ូ ទឹកសុីអ៊ីវ ទឹកក្រូច សាប៊ូ និងជែលលាងដៃ] ចែកជូនប្រជាពលរដ្ឋខ្មែរយើងដែលរងគ្រោះដោយទឹកជំនន់ចំនួន២០០គ្រួសារ នៅសង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ នាថ្ងៃទី២០ ខែតុលា ឆ្នាំ២០២០»។
រដ្ឋបាលខេត្តបន្ទាយមានជ័យ បានឱ្យដឹងថា នៅម៉ោងជាង៥ភ្លឺថ្ងៃអង្គារនេះ ទំនប់អាងខៃដន ត្រូវបានបាក់១៥ម៉ែត្រ នៃប៉ែកខាងជេីងទំនប់អាង ហេីយទឹកបានហូរកាត់ថ្នល់ជាតិលេខ៥ ប្រវែង៥៦០ម៉ែត្រ និងមានជម្រៅ២តឹក។
រដ្ឋបាលខេត្តបានបន្តថា ទឹកដែលហូរមកពីស្រុកអារញ្ញ ខេត្តស្រះកែវ ប្រទេសថៃ បានធ្វើឱ្យស្ថានភាពទឹកអូរព្រំដែនកើនឡើង និងបានបង្កឱ្យមានការជន់លិចភូមិមួយចំនួនក្នុងក្រុងប៉ោយប៉ែត ក្នុងនោះ ក្រុមការងាររដ្ឋបាលខេត្តបានជម្លៀសប្រជាពលរដ្ឋប្រមាណ១០០០គ្រួសារទៅកាន់ទីទួលសុវត្ថិភាព។
រដ្ឋបាលខេត្តក៏បានអំពាវនាវដល់ប្រជាពលរដ្ឋដែលរស់នៅក្រុងប៉ោយប៉ែតឱ្យបង្កើនការប្រុងប្រយ័ត្នខ្ពស់បន្ថែមទៀត ហើយក្នុងករណីមានហេតុការណ៍ណាមួយកើតឡើង ត្រូវរាយការណ៍ទៅកាន់អាជ្ញាធរមូលដ្ឋាននិងសមត្ថកិច្ចកងកម្លាំងឱ្យបានទាន់ពេលវេលា។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា គិតចាប់ពីថ្ងៃទី១ ខែកញ្ញា ដល់ថ្ងៃទី១៩ ខែតុលា ជំនន់ទឹកភ្លៀងបានប៉ះពាល់ដល់១៩រាជធានី-ខេត្ត និងប៉ះពាល់ប្រជាជន៧៨ ០៥៦គ្រួសារ ស្មើប្រមាណជាង៣១ម៉ឺននាក់។
របាយការណ៍ដដែលបញ្ជាក់ថា ប្រជាជន៩ ៣៤៩គ្រួសារ ត្រូវបានជម្លៀសចេញទៅកាន់ទីទួលសុវត្ថិភាព ខណៈនៅទូទាំងប្រទេសមានមនុស្សស្លាប់កើនឡើងដល់២៥នាក់ ផ្ទះជាង៧ម៉ឺន៣ពាន់ខ្នង បានរងផលប៉ះពាល់ និងខូចខាត៥៦ខ្នង។ ក្រៅពីនោះ សាលារៀនប្រមាណ៥៦៨កន្លែង ស្រូវប្រមាណជាង២១ម៉ឺនហិកតា និងដំណាំរួមផ្សំជិត៨ម៉ឺនហិកតា ក៏ត្រូវបានទឹកជន់លិចផងដែរ៕