គណៈកម្មាធិការជាតិរៀបចំការបោះឆ្នោត (គ.ជ.ប) បង្ហាញលទ្ធផលចុះឈ្មោះបោះឆ្នោតមុនបិទបញ្ចប់១ថ្ងៃថា លទ្ធផលនេះត្រូវបានកោតសរសើរពីភាគីពាក់ព័ន្ធ ទោះដំណើការទៅមិនបានល្អឥតខ្ចោះក៏ដោយ។
ការពិនិត្យបញ្ជីឈ្មោះបោះឆ្នោតនិងចុះឈ្មោះបោះឆ្នោតសម្រាប់ឆ្នាំ២០២០នេះ គ.ជ.ប ប្រើពេល១៩ថ្ងៃ គឺចាប់ពីថ្ងៃទី១ ដល់ថ្ងៃទី១៩ ខែតុលា។
គ.ជ.ប បានលើកឡើងតាមសេចក្តីប្រកាសព័ត៌មាន កាលពីថ្ងៃចន្ទម្សិលមិញថា ១៨ថ្ងៃមកនេះ អ្នកទៅចុះឈ្មោះបោះឆ្នោតថ្មីមានជាង២៥ម៉ឺននាក់ (២៥៦ ៥៤៥) ស្មើនឹងជាង៨៥% (៨៥,៤០) នៃចំនួនប្រជាពលរដ្ឋដែលត្រូវចុះឈ្មោះជាង៣០ម៉ឺននាក់ (៣០០ ៣៩០នាក់)។
គ.ជ.ប ថ្លែងទៀតថា៖ «ដំណើរការនៃការពិនិត្យបញ្ជីឈ្មោះនិងការចុះឈ្មោះបោះឆ្នោតឆ្នាំនេះ បើទោះបីជាមិនទទួលបានលទ្ធផលល្អឥតខ្ចោះក៏ដោយ ប៉ុន្តែភាគីពាក់ព័ន្ធការបោះឆ្នោតបានសម្តែងការកោតសរសើរនិងអបអរសាទរចំពោះលទ្ធផលនៃការពិនិត្យបញ្ជីឈ្មោះនិងការចុះឈ្មោះបោះឆ្នោតឆ្នាំ២០២០»។
សមាជិកនិងជាអ្នកនាំពាក្យ គ.ជ.ប លោក ឌឹម សុវណ្ណារុំ បានលើកឡើងក្នុងសេចក្តីប្រកាសព័ត៌មានថា ពុំមានការងារណាល្អឥតខ្ចោះនោះទេ ដែលករណីនេះចាំបាច់ណាស់ត្រូវមានការចូលរួមពីភាគីពាក់ព័ន្ធ ដើម្បីជំរុញឱ្យដំណើរការចុះឈ្មោះបោះឆ្នោត ក៏ដូចជាការបោះឆ្នោត កាន់តែល្អប្រសើរថែមទៀត។
លោកបានបន្ថែមថា៖ «គិតត្រឹមថ្ងៃទី១៨ ខែតុលា បណ្តឹងសរុបមានចំនួន១០៣បណ្តឹង ដែលជាបណ្តឹងមកពីគណបក្សសម្ព័ន្ធដើម្បីប្រជាធិបតេយ្យ គណបក្សប្រជាជនកម្ពុជា និងក្រុមចុះឈ្មោះបោះឆ្នោត»។
លោក សំ គន្ធាមី នាយកប្រតិបត្តិអង្គការគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (ហៅកាត់ថា NICFEC) បានគាំទ្រចំពោះកិច្ចខិតខំប្រឹងប្រែងរបស់មន្ត្រីបោះឆ្នោត។
តែយ៉ាងណា លោកថា ភាគីពាក់ព័ន្ធ ក៏បានចោទសួរនិងស្នើសុំឱ្យ គ.ជ.ប ធ្វើវិសោធនកម្មលើប្រការមួយចំនួននៅក្នុងបទបញ្ជានិងនីតិវិធីនៃការពិនិត្យបញ្ជីឈ្មោះនិងការចុះឈ្មោះបោះឆ្នោត, ស្នើឱ្យមានការផ្លាស់ប្តូរសម្ភារសម្រាប់បម្រើឱ្យការពិនិត្យបញ្ជីឈ្មោះនិងការចុះឈ្មោះបោះឆ្នោត ជាពិសេសកុំព្យូទ័រ ដែលសម្ភារទាំងនោះចាស់ៗប្រើយូរឆ្នាំហើយ និងចោទសួរថា តើ គ.ជ.ប មានផែនការពន្យារពេលបោះឆ្នោតដែរឬយ៉ាងណា។
ទោះជាយ៉ាងណា មន្ត្រី គ.ជ.ប បានបញ្ជាក់ថា មិនមានការពន្យារពេលការពិនិត្យបញ្ជីឈ្មោះនិងចុះឈ្មោះបោះឆ្នោតទេ និងថា បច្ចុប្បន្ន គ.ជ.ប មានគម្រោងប្តូរសម្ភារដែលចាស់ៗទាំងនោះដែរ ដោយបានធ្វើសំណើទៅកាន់ភាគីជប៉ុន តាមរយៈក្រុមប្រឹក្សាអភិវឌ្ឍន៍កម្ពុជា ដើម្បីជួយដោះស្រាយបញ្ហានេះ។
សហរដ្ឋអាមេរិកនិងសហភាពអឺរ៉ុប នៅដើមឆ្នាំ២០១៨ បានផ្តាច់ជំនួយពី គ.ជ.ប វិញ ក្រោយពីអតីតគណបក្សសង្គ្រោះជាតិដែលមានអ្នកបោះឆ្នោតគាំទ្រជាង៤០ភាគរយ ត្រូវបានផាត់ចេញពីឆាកនយោបាយ តាមរយៈសាលដីកាថ្ងៃទី១៦ ខែវិច្ឆិកា ឆ្នាំ២០១៧ ពោលគឺមុនការបោះឆ្នោតជាតិអាណត្តិទី៦ចូលមកដល់។
ពេលនោះ ក្បាលម៉ាស៊ីន គ.ជ.ប ត្រូវបានរុះរើ ដោយសមាជិក គ.ជ.ប ៣រូប កូតាមកពីគណបក្សប្រឆាំង បានសម្រេចដើរចេញ។ ស្របពេលនោះដែរ សង្គមស៊ីវិលនិងស្ថាប័នពាក់ព័ន្ធមួយចំនួន រួមទាំងអង្គការឃ្លាំមើលការបោះឆ្នោតខុមហ្វ្រែលផង បានប្រកាសដកខ្លួនឈប់ឃ្លាំមើលការបោះឆ្នោតចាប់ពីពេលនោះមក ក្រោមហេតុផលថា បានរងនូវការគំរាមកំហែង៕