មន្ត្រីពន្ធនាគារឱ្យដឹងថា អ្នកទោសជាស្ត្រីនិងអនីតិជនជាង១ ៤០០នាក់ ត្រូវបានជម្លៀសចេញពីមណ្ឌលអប់រំកែប្រែ«ម២» ទៅកាន់ពន្ធនាគារចំនួនពីរនៅក្នុងរាជធានីភ្នំពេញ ខណៈដែលមណ្ឌលអប់រំកែប្រែ«ម២»នេះ បានរងការជន់លិចដោយជំនន់ទឹកភ្លៀង។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សាវនា បានប្រាប់ VOD កាលពីថ្ងៃម្សិលមិញថា មណ្ឌលអប់រំកែប្រែម២ នៃពន្ធនាគារព្រៃស ក្នុងខណ្ឌដង្កោ រាជធានីភ្នំពេញ បានរងនូវការជន់លិចខ្លាំង ដោយសារជំនន់ទឹកភ្លៀង ដែលករណីបាននេះធ្វើឱ្យមន្ត្រីពន្ធនាគារសម្រេចជម្លៀសអ្នកជាប់ឃុំជាស្ត្រីនិងអនីតិជននៅទីនោះ ចេញទៅកាន់ពន្ធនាគារចំនួន២។
លោកបន្តថា អ្នកជាប់ឃុំប្រមាណ៩០០នាក់ បានជម្លៀសទៅកាន់មណ្ឌលអប់រំកែប្រែម១នៃពន្ធនាគារព្រៃសដែលនៅក្បែរនោះ ខណៈអ្នកជាប់ឃុំជាង៥០០នាក់ទៀត ត្រូវបានជម្លៀសទៅកាន់ពន្ធនាគាររាជធានីភ្នំពេញប៉េស៊ី (PJ)។
លោក សាវនា បានបញ្ជាក់ថា៖ «នេះជារឿងបន្ទាន់ អ្នកជាប់ឃុំទាំងអស់ត្រូវបានជម្លៀសចេញហើយ»។
លោកបានបន្ថែមថា កាលពីថ្ងៃអង្គារ កម្រិតជំនន់ទឹកភ្លៀងនៅតំបន់ព្រៃស បានកើនឡើង៨សង់ទីម៉ែត្រទៀត ដោយសារមានភ្លៀងខ្លាំងកាលពីយប់ថ្ងៃចន្ទ ប៉ុន្តែលោកមិនបានដឹងពីទំហំនៃផលប៉ះពាល់បន្ថែមទៀតនោះទេ។
មន្ត្រីអ្នកនាំពាក្យរូបនេះ បានទទួលស្គាល់ពីភាពចង្អៀតណែនខ្លាំងជាងមុននៅក្នុងពន្ធនាគារ នៅពេលមានការជម្លៀសអ្នកជាប់ឃុំនេះ ប៉ុន្តែនៅចំពោះមុខ មន្ត្រីពន្ធនាគារចាំបាច់ត្រូវជួយសង្គ្រោះអ្នកជាប់ឃុំឱ្យរួចផុតពីទីតាំងដែលមានការជន់លិច។
លោកបានថ្លែងថា៖ «វាមានភាពចង្អៀតណែន ប៉ុន្តែអ្វីដែលយើងត្រូវតែធ្វើ គឺជួយមនុស្សចេញពីជំនន់ទឹកភ្លៀង»។
អនុប្រធានអង្គការការពារសិទ្ធិមនុស្សលីកាដូ លោក អំ សំអាត បានបង្ហាញពីការព្រួយបារម្ភចំពោះសុខភាពនិងអនាម័យសម្រាប់អ្នកជាប់ឃុំ នៅពេលមានការជម្លៀសអ្នកជាប់ឃុំបន្ថែមទៅកាន់ពន្ធនាគារដែលមានអ្នកជាប់ឃុំច្រើនរួចទៅហើយនោះ។
លោកមានប្រសាសន៍ថា៖ «បើសិនជាយើងនិយាយពីបន្ទប់ យើងឃើញថា មណ្ឌលអប់រំកែប្រែទី១ និងពន្ធនាគារប៉េស៊ី មានភាពចង្អៀតណែនរួចហើយ ហើយឥលូវត្រូវបន្ថែមអ្នកជាប់ឃុំច្រើនទៀត អ៊ីចឹងនឹងកាន់តែចង្អៀតណែនទៅទៀត»។
លោក អំ សំអាត បន្តថា ប្រសិនបើជំនន់ទឹកភ្លៀងនៅបន្តកើតមាន នោះមណ្ឌលអប់រំកែប្រែទី១ និងពន្ធនាគារប៉េស៊ី ក៏អាចនឹងរងការជន់លិចដែរ ដែលករណីនេះនឹងធ្វើឱ្យអ្នកជាប់ឃុំកាន់តែមានភាពលំបាក ហើយមន្ត្រីពន្ធនាគារក៏នឹងមានការពិបាកក្នុងការគ្រប់គ្រងដែរ។
លោកបញ្ជាក់ថា៖ «នៅពេលដែលមានមនុស្ស [អ្នកជាប់ឃុំ] កាន់តែច្រើន អាហ្នឹងក៏អាចនឹងមានហានិភ័យផ្សេងៗកើតឡើងច្រើនដែរ»។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា មានប្រសាសន៍កាលពីថ្ងៃអង្គារថា ជំនន់ទឹកភ្លៀងនៅខណ្ឌដង្កោ បានស្រកខ្លះៗហើយ ប៉ុន្តែនៅតែស្ថិតក្នុងកម្រិតគ្រោះថ្នាក់នៅឡើយ។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា គិតចាប់ពីថ្ងៃទី១ ខែកញ្ញា ដល់ថ្ងៃទី១៩ ខែតុលា ជំនន់ទឹកភ្លៀង បានប៉ះពាល់ដល់១៩រាជធានី-ខេត្ត និងប៉ះពាល់ប្រជាជន៧៨ ០៥៦គ្រួសារ ស្មើប្រមាណជាង៣១ម៉ឺននាក់ និងមានមនុស្សចំនួន២៥នាក់បានស្លាប់។
របាយការណ៍ដដែលបន្តថា ផ្ទះជាង៧ម៉ឺន៣ពាន់ខ្នង បានរងផលប៉ះពាល់ និងស្រូវប្រមាណជាង២១ម៉ឺនហិកតា ដំណាំរួមផ្សំជិត៨ម៉ឺនហិកតា រួមនឹងហេដ្ឋារចនាសម្ព័ន្ធជាច្រើនទៀត ក៏ត្រូវបានទឹកជន់លិចផងដែរ៕
ប្រែសម្រួលពីអត្ថបទភាសាអង់គ្លេសដោយ សុខ ហាំងឃាង
