លោកនាយករដ្ឋមន្ត្រី ហ៊ុន សែន អំពាវនាវជាថ្មីទៀតទៅស្ថាប័នផ្តល់ប្រាក់កម្ចី កុំឱ្យរឹបអូសទ្រព្យសម្បត្តិពីកូនបំណុលដែលរងគ្រោះដោយទឹកជំនន់ ដោយថា បញ្ហានេះវាជាការឈឺចាប់ផ្ទួនៗរបស់ប្រជាពលរដ្ឋកម្ពុជាក្រោយពីការវាយប្រហារដោយកូវីដ១៩។
ការថ្លែងរបស់មេដឹកនាំរូបនេះ ធ្វើឡើងក្នុងពេលចុះចែកអំណោយជាស្បៀងអាហារនិងថវិកាដល់ប្រជាពលរដ្ឋជួបគ្រោះទឹកជំនន់នៅខេត្តបន្ទាយមានជ័យ នៅព្រឹកថ្ងៃពុធនេះ។
លោកនាយករដ្ឋមន្ត្រី ហ៊ុន សែន ថ្លែងទៀតថា ធនាគារធំៗនិងគ្រឹះស្ថានមីក្រូហិរញ្ញវត្ថុ គួរយោគយល់ចំពោះអ្នកដែលលិចលង់ពិតប្រាកដនៅគ្រប់ទីកន្លែង។ ការយោគយល់ លោកសំដៅដល់ការពន្យារពេលសងប្រាក់ឬការកាត់បន្ថយអត្រាការប្រាក់ ក្នុងរយៈពេលដែលកូនបំណុលជួបការលំបាកដោយទឹកជំនន់។
លោក ហ៊ុន សែន ថ្លែងថា៖ «ព្រោះរឿងនេះជារឿងដែលបានកើតឡើង ហើយផ្តល់ការឈឺចាប់ណាស់ទៅហើយសម្រាប់ប្រជាពលរដ្ឋរបស់យើង ហើយខ្ញុំសូមអំពាវនាវកុំឱ្យមានការរឹបអូសទ្រព្យសម្បត្តិ ផ្ទះសម្បែង ដីធ្លីរបស់ប្រជាពលរដ្ឋនៅក្នុងដំណាក់កាលកូវីដនិងដំណាក់កាលនៃទឹកជំនន់»។
តែយ៉ាងណា លោកនាយករដ្ឋមន្ត្រីបង្ហើបផ្លូវឱ្យម្ចាស់បំណុលអាចរឹបអូសទ្រព្យសម្បត្តិកូនបំណុលទាំងឡាយណាដែលលោកយល់ថា ធ្វើសកម្មភាពបម្រើឱ្យអ្នកនយោបាយក្រុមប្រឆាំងដែលធ្លាប់អំពាវនាវកុំឱ្យពួកគេសងប្រាក់ត្រឡប់ទៅម្ចាស់បំណុលវិញ។
អ្នកនាំពាក្យសមាគមមីក្រូហិរញ្ញវត្ថុកម្ពុជា (CMA) លោក កាំង តុងងី ប្រាប់ថា សមាគមធ្លាប់បានជជែកជាមួយសមាជិករបស់ខ្លួនរួចមកហើយថា ក្នុងកាលៈទេសៈដែលកូនបំណុលរងផលប៉ះពាល់ដោយកូវីដ១៩និងរងគ្រោះដោយទឹកជំនន់ មិនអនុញ្ញតឱ្យសមាជិកណាមួយរឹបអូសដីធ្លីនិងផ្ទះសម្បែងកូនបំណុលទេ។
លោកថា ចាប់ពីដើមឆ្នាំ២០២០មក មិនមានអ្នកប្រើប្រាស់កម្ចីណាម្នាក់ត្រូវបានសមាជិករបស់ខ្លួនរឹបអូសទ្រព្យសម្បត្តិ ដីធ្លី ឬទ្រព្យបញ្ចាំនោះទេ។
លោក កាំង តុងងី ប្រាប់ថា៖ «គ្រប់គ្រឹះស្ថានទាំងអស់ យើងទាមទារឱ្យគាត់មានភាពទន់ភ្លន់ មានភាពបត់បែន ធ្វើម៉េចជួយរកដំណោះស្រាយឱ្យអតិថិជន ហើយយើងឱ្យគាត់ចៀសពីជម្រើសរឹបអូសផ្ទះសម្បែង មិនឱ្យកើតឡើងទេក្នុងឆ្នាំ២០២០»។
លោក កាំង តុងងី បញ្ជាក់ថា មកដល់ពេលនេះ សមាគមបានរៀបចំកម្ចីឡើងវិញជូនអតិថិជនបាន២៦ម៉ឺន៥ពាន់កម្ចីរួចមកហើយ ក្នុងចំណោមអ្នកស្នើសុំកម្ចីឡើងវិញ២៨ម៉ឺននាក់ គិតជាប្រាក់សរុប១ ៣០០លានដុល្លារ។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា ការរួមគ្នាសង្គ្រោះពលរដ្ឋដែលកំពុងរងគ្រោះ ជាការចូលរួមចំណែកលើកកម្ពស់សិទ្ធិរស់រានមានជីវិត តបតាមស្មារតីនៃរដ្ឋធម្មនុញ្ញ។
ប៉ុន្តែលោកគូសបញ្ជាក់ថា បើពលរដ្ឋរងគ្រោះដូចគ្នា តែទទួលបានកិច្ចគាំពារពីរដ្ឋាភិបាលខុសគ្នា វាជាការរើសអើងផ្នែកនយោបាយ ផ្ទុយទៅនឹងច្បាប់កំពូលរបស់កម្ពុជា។
លោក អំ សំអាត ប្រាប់ថា៖ «បើសិនជាប្រជាពលរដ្ឋគាត់រងគ្រោះដោយកូវីដកន្លងមក ហើយបច្ចុប្បន្នគាត់រងគ្រោះដោយទឹកជំនន់ទៀត ដែលជាវិបត្តិធ្ងន់ធ្ងរ គួរតែអនុវត្តឱ្យស្មើភាពគ្នា ពីព្រោះអាហ្នឹងមិនអាចប្រកាន់និន្នាការនយោបាយបានទេ ពីគ្រោះគាត់ជាប្រជាពលរដ្ឋខ្មែរដូចគ្នា ត្រូវទទួលបានការសម្របសម្រួលដូចគ្នា បើគាត់ជួបវិបត្តិទាំងអស់ហ្នឹង»។
មាត្រា៣៥ នៃរដ្ឋធម្មនុញ្ញចែងថា៖ «ពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ»។
បើតាមលោកនាយករដ្ឋមន្ត្រី ហ៊ុន សែន គិតត្រឹមថ្ងៃពុធនេះ ទឹកជំនន់បានសម្លាប់មនុស្សអស់៣៤នាក់ បង្កផលប៉ះពាល់ជាង១០ម៉ឺនគ្រួសារ ស្មើនឹងជាង៤១ម៉ឺននាក់ (៤១៧ ៣៩២នាក់)។
តាមរយៈរបាយការណ៍ចុះថ្ងៃទី២៧ ខែមេសា ឆ្នាំ២០២០ អង្គការសមាគម១៣៥ស្ថាប័ន បានថ្លែងថា វិបត្តិកូវីដ១៩ ក្រៅពីបង្កផលប៉ះពាល់ដល់ប្រជាពលរដ្ឋខ្មែររាប់លាននាក់ វាបានជំរុញឱ្យមានការកើនឡើងនូវវិបត្តិបំណុលច្រើនលើសលុប ដែលថា កើតចេញពីកម្ចីឥណទានជាង១០ពាន់លានដុល្លាររបស់គ្រឹះស្ថានមីក្រូហិរញ្ញវត្ថុមួយចំនួន។
ក្រុមអ្នកតាមដានទាំងនោះ និយាយទៀតថា៖ «បច្ចុប្បន្ននេះ ប្រជាពលរដ្ឋកម្ពុជាច្រើនជាង២លាន៥សែននាក់ មានជាប់ជំពាក់កម្ចីខ្នាតតូចជាមធ្យមមានទំហំ៣ ៨០០ដុល្លារ ដែលជាចំនួនច្រើនជាងគេនៅលើពិភពលោក។ ការណ៍នេះធ្វើឱ្យជីវភាពរស់នៅ សុខភាព និងសុវត្ថិភាពកម្មសិទ្ធិដីធ្លីរបស់ប្រជាពលរដ្ឋកម្ពុជារាប់លាននាក់ ប្រឈមនឹងហានិភ័យ»៕
