ក្រុមអ្នកជំនាញឱ្យដឹងថា ក្នុងរយៈពេល៣ឆ្នាំចុងក្រោយនេះ សត្វផ្សោតនៅកម្ពុជាមានចំនួនជិត១០០ក្បាល ដោយតួលេខនេះមិនមានការកើនឡើងឬថយចុះនោះទេ ប៉ុន្តែសត្វផ្សោតចំនួន២៥ក្បាលបានបាត់ដានពីការអង្កេត ស្របពេលដែលសត្វផ្សោតទាំងនោះនៅតែប្រឈមនឹងការគំរាមកំហែងពីអ្នកនេសាទខុសច្បាប់។
ក្នុងកិច្ចប្រជុំផ្សព្វផ្សាយរបាយការណ៍បច្ចេកទេស ស្តីពី «ការសិក្សាលើចំនួនសរុបនៃសត្វផ្សោតទន្លេមេគង្គក្នុងឆ្នាំ២០២០ ដោយប្រើគំរូវិភាគ Mark-Resight Models» អគ្គនាយករងនៃរដ្ឋបាលជលផល និងជាអគ្គលេខាធិការរងនៃគណៈកម្មាធិការជាតិ ESCAP លោក ស្រ៊ុន លឹមសុង បានថ្លែងថា បច្ចុប្បន្ននេះ សត្វផ្សោតរស់នៅរាយប៉ាយតាមដងទន្លេមេគង្គ រួមមាន ទន្លេសេកុង ទន្លេសេសាន និងទន្លេស្រែពក រួមទាំងបឹងទន្លេសាប ជាដើម។
លោកបន្តថា ចាប់ពីឆ្នាំ២០១៧ ដល់ឆ្នាំ២០២០នេះ ចំនួនសត្វផ្សោតមិនមានការថយចុះឬកើនឡើងនោះទេ ពោលនៅមានចំនួនថេរប្រហែលជា៨៩ក្បាល ហើយសត្វទាំងនោះកំពុងរស់នៅតាមដងទន្លេមេគង្គក្នុងចន្លោះចម្ងាយ១៨០គីឡូម៉ែត្រ ចាប់ពីអន្លង់កាំពី ក្នុងខេត្តក្រចេះ បន្តឡើងដល់ល្បាក់ទឹកខោនក្នុងប្រទេសឡាវ ដែលជាប់ទៅនឹងព្រំប្រទល់ខេត្តស្ទឹងត្រែង។
លោក លឹមសុង ថ្លែងទៀតថា បច្ចុប្បន្ន សត្វផ្សោតទាំងនោះ កំពុងប្រឈមនឹងការគំរាមកំហែងជាច្រើនពីសកម្មភាពអ្នកនេសាទខុសច្បាប់និងទំនប់វារីអគ្គិសនីនៅចរន្តទឹកខាងលើជាដើម។
លោកថា៖ «សត្វផ្សោត៨៩ក្បាលកំពុងប្រឈមនឹងការគំរាមកំហែងជាច្រើន ដូចជា ការទាក់ជាប់ទៅនឹងមងនេសាទនៅតំបន់ការងារសត្វ នេសាទខុសច្បាប់ ប្រើឧបករណ៍ឆក់ នុយនេសាទដែលមានជាតិពុល និងទំបន់វារីអគ្គិសនីនៅចរន្តទឹកខាងលើ»។
បន្ថែមពីនេះ នាយកអង្គការមូលនិធិសកលសម្រាប់ធម្មជាតិ ហៅកាត់ WWF លោក សេង ទៀក ដែលសហការធ្វើការងារជាមួយរដ្ឋបាលជលផល បានថ្លែងថា រយៈពេល៣ឆ្នាំកន្លងទៅនេះ បទល្មើសនេសាទខុសច្បាប់ដែលប្រព្រឹត្តនៅតាមដងទន្លេមេគង្គស្ថិតនៅតំបន់សត្វផ្សោតរស់នៅនោះ ក្រុមការងារជំនាញទាំងរដ្ឋាភិបាលនិងអង្គការបានសហការគ្នាទប់ស្កាត់និងរឹបអូសបានមង២២ម៉ឺនម៉ែត្រ និងឧបករណ៍ឆក់ រួមទាំងបញ្ជូនជនល្មើសទៅតុលាការចំនួន១៣នាក់ផងដែរ។
លោកមានប្រសាសន៍ថា៖ «បើយើងពិនិត្យមើលការអនុវត្តច្បាប់កន្លងមករយៈពេល៣ឆ្នាំនេះ គ្រាន់តែមងជាបញ្ហាប្រឈមរបស់យើង ប្រហែល២២ម៉ឺនម៉ែត្រ ត្រូវបានរឹបអូសពីអន្លង់ផ្សោត ហើយសន្ទូចរនោង១២ម៉ឺនម៉ែត្រ ឧបករណ៍ឆក់៦៤ករណី ហើយជនល្មើសដែលបង្កបទល្មើសជលផល១៣នាក់ បានចងក្រងនិងបញ្ជូនទៅតុលាការដើម្បីផ្តន្ទាទោសទៅតាមច្បាប់»។
មន្ត្រីរដ្ឋបាលជលផលនិងសង្គមស៊ីវិលដែលធ្វើការងារអភិរក្សសត្វផ្សោត ក៏បានបង្ហាញការប្តេជ្ញាថា ទប់ស្កាត់បទល្មើសនេសាទខុសច្បាប់នានានៅតំបន់ពួកគេរស់នៅ ពីព្រោះសត្វទាំងនោះត្រូវបានរដ្ឋាភិបាលចាត់ទុកជារតនសម្បត្តិជាតិមានជីវិត បន្ទាប់ពីប្រាសាទអង្គវត្ត។
សត្វផ្សោតទន្លេមេគង្គ ត្រូវបានអង្គការសហភាពអន្តរជាតិដើម្បីអភិរក្សធនធានធម្មជាតិ ហៅកាត់ថា IUCN ចាត់ថ្នាក់ក្នុងបញ្ជីក្រហមជាប្រភេទជិតផុតពូជ។
របាយការណ៍បច្ចេកទេសរបស់រដ្ឋបាលជលផលចេញផ្សាយនៅថ្ងៃទី២២ ខែតុលា ឆ្នាំ២០២០នេះ រកឃើញថា ក្នុងទសវត្សនៃឆ្នាំ១៩៧៤ ឬឆ្នាំ១៩៧៥ សត្វផ្សោត Irrawaddy រាប់ពាន់ក្បាលបានរស់នៅរាយប៉ាយតាមដងទន្លេមេគង្គ។ ក្រោយមក នៅចន្លោះឆ្នាំ១៩៧៥ ដល់ឆ្នាំ១៩៧៩ សត្វផ្សោតរាប់រយក្បាល ត្រូវបានរបបខ្មែរក្រហមប្រមាញ់សម្លាប់រាប់រយក្បាល ដើម្បីចម្រាញ់យកប្រេង (MAFF, 2005. The Mekong Dolphin Conservation Strategy) ការទម្លាក់គ្រាប់បែកចំនួន២,៧លានតោនក្នុងប្រទេសកម្ពុជា តាមដងទន្លេមេគង្គក្នុងអំឡុងសង្គ្រាមរវាងអាមេរិកនិងវៀតណាម រួមទាំងសកម្មភាពនេសាទបំផ្លិចបំផ្លាញខុសច្បាប់ជាដើម៕
