ក្រសួងអប់រំ យុវជន និងកីឡា បានអនុញ្ញាតឱ្យបើកដំណើរការឡើងវិញ សេវារថយន្តដឹកសិស្ស សេវាបណ្ណាល័យ សកម្មភាពអប់រំកាយនិងកីឡា និងសេវាអាហារដ្ឋាន នៅតាមគ្រឹះស្ថានសិក្សាឯកជន ប៉ុន្តែត្រូវគោរពគោលការណ៍ប្រតិបត្តិស្តង់ដារដើម្បីបង្ការការឆ្លងជំងឺកូវីដ១៩។
យោងតាមលិខិតរបស់ក្រសួងអប់រំ ទៅកាន់ប្រធានសមាគមគ្រឹះស្ថានឧត្តមសិក្សាកម្ពុជា នៅថ្ងៃទី២២ ខែតុលា ឆ្នាំ២០២០នេះ បានលើកឡើងថា ក្រសួងសម្រេចអនុញ្ញាតជាគោលការណ៍ឱ្យគ្រឹះស្ថានសិក្សាទាំងអស់ដែលទទួលបានលិខិតអនុញ្ញាតឱ្យបើកដំណើរការឡើងវិញ អាចដំណើរការនូវសេវាទាំងនេះបាន ដើម្បីឆ្លើយតបតាមតម្រូវការចាំបាច់របស់គ្រឹះស្ថានសិក្សា សិស្សានុសិស្ស និងអាណាព្យាបាល ក្នុងការប្រើប្រាស់សេវារថយន្តដឹកសិស្ស សេវាបណ្ណាល័យ សកម្មភាពអប់រំកាយនិងកីឡា និងសេវាអាហារដ្ឋាន។
លិខិតដដែលបានបន្តថា ប៉ុន្តែគ្រឹះស្ថានសិក្សាទាំងនោះ ត្រូវអនុវត្តតាមគោលការណ៍ប្រតិបត្តិស្តង់ដារ (SOP) ឱ្យបានម៉ឺងម៉ាត់និងខ្ជាប់ខ្ជួនបំផុត ដើម្បីបង្ការការឆ្លងជំងឺកូវីដ១៩ បើពុំនោះទេ ក្រសួងនឹងអនុវត្តវិធានការនានាដែលមានជាធរមាន។
បើតាមគោលការណ៍ប្រតិបត្តិស្តង់ដារ (SOP) របស់ក្រសួងអប់រំដែលបានរៀបចំឡើងនោះ មានគោលបំណងណែនាំអំពីវិធានការអនាម័យ រួមទាំងវិធានការសុខាភិបាល ដើម្បីគ្រឹះស្ថានសិក្សាអាចរៀបចំនិងត្រៀមលក្ខណៈដំណើរការសេវានានាក្នុងគ្រឹះស្ថានសិក្សាពេញលេញ ក៏ដូចជាការបន្តអភិវឌ្ឍគ្រឹះស្ថានសិក្សានីមួយៗឱ្យមាននិរន្តរភាព ធានាបាននូវសុវត្ថិភាព សុខភាពសម្រាប់បុគ្គលិកសិក្សា គ្រូបង្រៀន និងសិស្សានុសិស្សក្នុងបរិបទកូវីដ១៩ និងទៅអនាគត៕