លោកនាយករដ្ឋមន្ត្រី ហ៊ុន សែន អំពាវនាវដល់ប្រជាពលរដ្ឋឱ្យឈប់ឆ្លងដែនខុសច្បាប់ទៅរកការងារធ្វើនៅប្រទេសជិតខាងតាមរយៈការអូសទាញរបស់មេខ្យល់ ក្នុងអំឡុងពេលមានវិបត្តិកូវីដ១៩នេះ ដោយថា ស្ថានភាពបែបនេះនឹងបង្កឱ្យជួបហានិភ័យខ្ពស់។
ការថ្លែងរបស់ថ្នាក់ដឹកនាំរូបនេះ ធ្វើឡើងនៅក្នុងពិធីចែកអំណោយដល់ពលរដ្ឋរងគ្រោះដោយទឹកជំនន់ នៅស្រុកថ្មពួក ខេត្តបន្ទាយមានជ័យ នាថ្ងៃទី២២ ខែតុលានេះ។
លោកនាយករដ្ឋមន្ត្រី ហ៊ុន សែន ថ្លែងសំដៅដល់សារសំឡេងអំពាវនាវតាមបណ្តាញសង្គមរបស់ព្រះសង្ឃខ្មែរសុរិន្ទមួយព្រះអង្គដែលគង្គនៅវត្តមួយក្នុងខេត្តសុរិន្ទ ប្រទេសថៃ ដែលមានសង្ឃដីកាថា ពលរដ្ឋខ្មែរកំពុងចាញ់បោកមេខ្យស់នាំចូលទៅធ្វើការ ខណៈប្រទេសជិតខាងមួយនេះ នៅបិទព្រំដែន ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩នៅឡើយ ។
លោកថា៖ «លោកតា ស៊ុច [ព្រះសង្ឃខ្មែរសុរិន្ទ] បានផ្ញើជាសារសំឡេង ដែលលោកថតបានជាវីដេអូថា កុំឱ្យចាញ់បោកគេ គេនាំទៅ អ៊ីចឹងទេ យើងខិតខំធ្វើការនៅក្នុងប្រទេសរបស់យើង ទៅណោះ [ប្រទេសថៃ] ចាញ់បោកគេ ជួនកាលត្រូវបានគេ [អាជ្ញាធរថៃ] ចាប់ដាក់គុក ហើយគេចាប់បញ្ជូនត្រឡប់មកវិញ ហើយសម័យកូវីដនេះទៀត ក្រែងទៅឆ្លងគេឆ្លងឯង ឬនាំជំងឺពីគេចូលមកយើង […] ប៉ុន្តែសុំកុំឱ្យចាញ់បោកបន្ថែមទៀត»។
គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លោកស្រី ជូ ប៊ុនអេង មានប្រសាសន៍ថា បញ្ហាវាបានកើតឡើងក្រោយពេលភាគីថៃប្រកាសបិទព្រំដែនដោយឯកតោភាគី ក្រោមហេតុផលទប់ស្កាត់ជំងឺកូវីដ១៩។
លោកស្រីបន្តថា ពេលមានវិបត្តិកូវីដ១៩ ថៃបានដឹកពលករខ្មែរមកទុកតាមព្រំដែន ធ្វើឱ្យពលករខ្មែរដែលកំពុងនឹកស្រុកកំណើតស្រាប់ បានសម្រុកចូលមកកម្ពុជាវិញ រហូតមកដល់ពេលនេះ មានជាង១០ម៉ឺននាក់ ។
លោកស្រីបន្តទៀតថា ក្រោយមក ថៃខ្វះកម្លាំងពលកម្ម ក៏ឃោសនាតាមរយៈមេខ្យល់ឱ្យមកអូសទាញពលរដ្ឋខ្មែរត្រឡប់ទៅធ្វើការវិញ ដែលជាហេតុធ្វើឱ្យលំហូរចំណាកស្រុកតាមរយៈមេខ្យល់ច្រើន ខណៈប្រទេសជិតខាងនៅមិនទាន់បើកច្រកព្រំដែនវិញនៅឡើយ។
លោកស្រី ជូ ប៊ុនអេង មានប្រសាសន៍ទៀតថា គិតមកដល់ពេលនេះ ពលករខ្មែរប្រមាណ២០០ទៅ៣០០នាក់ ដែលត្រូវបានអាជ្ញាធរថៃចាប់បញ្ជូនមកវិញ។
ទោះជាយ៉ាងណា លោកស្រីបានអំពាវនាវដល់ពលរដ្ឋឱ្យមានការអត់ធ្មត់និងចាប់យកអាជីវកម្មនៅក្នុងស្រុក ដើម្បីបង្កើនជីវភាពរស់នៅប្រចាំថ្ងៃ ជាជាងធ្វើចំណាកស្រុកតាមមេខ្យល់ទាំងប្រឈមនឹងគ្រោះថ្នាក់។
លោកស្រីថា៖ «កម្ពុជាជាប្រទេសដែលគាត់រស់នៅរាប់ឆ្នាំមកហើយ ទើបនឹងចេញទៅប្រទេសគេបានប៉ុន្មានខែប៉ុន្មានឆ្នាំហ្នឹង អ៊ីចឹងរឿងអីដែលយើងរស់នៅក្នុងស្រុកយើងអត់កើត។ តាំងពីដូនតាមក យើងមិនដែលរស់ពឹងទៅលើទេសន្តប្រវេសន៍ឯណា យើងរស់នៅក្នុងស្រុកយ៉ាងសប្បាយរីករាយ ដោយយើងគិតថា កន្លែងនេះជាមាតុភូមិរបស់ខ្លួនឯង អ៊ីចឹងយើងសួរថា អ្នកដែលនៅក្នុងស្រុកគាត់រស់បានរបៀបម៉េច អ៊ីចឹងយើងនាំគ្នារស់ដូចគ្នាទៅ»។
លោកស្រី ជូ ប៊ុនអេង ថាពលករចំណាកស្រុកទាំងនោះត្រូវបានរដ្ឋាភិបាលជួយដោះស្រាយជីវភាព តាមរយៈគោលនយោបាយគាំពារសង្គមដូចពលរដ្ឋមិនចំណាកស្រុកដែរ។
ពលករចំណាកស្រុកធ្វើការលើទូកនេសាទសមុទ្រនៅប្រទេសថៃ លោក សួង សង និយាយថា គាត់បានវិលត្រឡប់មកកាន់ស្រុកកំណើតជិត៤ខែហើយ មិនទទួលបានការឧបត្ថម្ភជាសាច់ប្រាក់ណាមួយពីអាជ្ញាធរមូលដ្ឋានទេ។
បុរសអាយុ២៧ឆ្នាំ រស់នៅស្រុកចុងកាល់ ខេត្តឧត្តរមានជ័យ ដែលមានប្រពន្ធជិតគ្រប់ខែផងនោះ និយាយទៀតថា គាត់នឹងសច្រេចចិត្តទៅធ្វើការលើទូកនេសាទនៅប្រទេសថៃវិញ ដើម្បីដោះបំណុល ទោះដឹងថា ការត្រឡប់ទៅវិញនោះជួបការចាប់ខ្លួនពីអាជ្ញាធរថៃក៏ដោយ។
លោកថា៖ «ធ្វើម៉េងបើយើងមិនមាន មានតែរកគេ ខ្ចីគេ ហើយបើខ្ចីគេហើយ នៅផ្ទះយើងរកអីបានសងគេទេ! អាការចាប់ចង វាខ្លាចណាស់ តែបើយើងចាល់ [ទាល់] មិនដឹងធ្វើម៉េច»។
អ្នកគ្រប់គ្រងកម្មវិធីការងារនៅមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ មានប្រសាសន៍ថា ឫសគល់នៃការធ្វើចំណាកស្រុកទាំងប្រថុយប្រថានរបស់ពលរដ្ឋខ្មែរ គឺបញ្ហាបំណុលនិងឱកាសការងារក្នុងស្រុកពុំសូវសម្បូរ។
លោកថា៖ «កត្តាក្រពះនិងបំណុលហ្នឹងហើយដែលជំរុញឱ្យគាត់ត្រឡប់ទៅវិញ យើងអត់អាចទប់ស្កាត់គាត់បានទេ អាចំណុចមួយហ្នឹង តែបើចង់ទប់ស្កាត់បាន ទាល់តែរដ្ឋាភិបាលមានកម្មវិធីឧបត្ថម្ភគាំទ្រសង្គមច្បាស់លាស់»។
ទោះជាយ៉ាងណា លោកថា លំហូរចំណាកស្រុកខុសច្បាប់នឹងមិនអាចទប់ស្កាត់បានទេ បើរដ្ឋាភិបាលមិនអាចដោះស្រាយបញ្ហាបំណុល ផ្តល់ឱកាសការងារឱ្យបានកាន់តែច្រើនទេនោះ ខណៈកម្មកររោងចក្រក្នុងវិស័យកាត់ដេរជាង៤ម៉ឺននាក់រួចហើយបានបាត់បង់ការងារ និងការធ្លាក់ចុះនៃវិស័យទេសចរណ៍ រួមទាំងបញ្ហាទឹកជំនន់ដែលកំពុងគំរាមកំហែងដល់វិស័យកសិកម្មថែមទៀតនោះ៕
