លោកនាយករដ្ឋមន្ត្រី ហ៊ុន សែន នៅព្រឹកថ្ងៃព្រហស្បតិ៍នេះ ឱ្យដឹងថា អ្នកស្លាប់ដោយសារគ្រោះមហន្តរាយជំនន់ទឹកភ្លៀងនៅកម្ពុជា បានកើនដល់៣៦នាក់ ក្នុងនោះខេត្តបន្ទាយមានជ័យមានអ្នកស្លាប់និងរងគ្រោះច្រើនជាងគេ។
ក្នុងជំនួបសួរសុខទុក្ខនិងជួយឧបត្ថម្ភដល់ប្រជាពលរដ្ឋនៅខេត្តបន្ទាយមានជ័យ នៅថ្ងៃទី២២ ខែតុលា ឆ្នាំ២០២០នេះ លោកនាយករដ្ឋមន្ត្រី ហ៊ុន សែន បានបង្ហាញការសោកស្តាយនិងចូលរួមរំលែកទុក្ខចំពោះគ្រួសារសពជនរងគ្រោះដែលបានស្លាប់ដោយគ្រោះទឹកជំនន់ទាំង៣៦នាក់ ក្នុងនោះ នៅខេត្តបន្ទាយមានជ័យមានអ្នកស្លាប់រហូតដល់ទៅ១៩នាក់ ខណៈពលរដ្ឋដែលរងផលប៉ះពាល់ក្នុងខេត្តនេះកើនដល់ជាង៣ម៉ឺនគ្រួសារ។
យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា គិតចាប់ពីថ្ងៃទី០១ ខែកញ្ញា ដល់ថ្ងៃទី២០ ខែតុលា ឆ្នាំ២០២០ រាជធានី-ខេត្តចំនួន១៩របស់កម្ពុជា បានរងការប៉ះពាល់ដោយសារជំនន់ទឹកភ្លៀង។
របាយការណ៍បន្តថា ជំនន់ទឹកភ្លៀងក៏បានបង្កផលប៉ះពាល់ដល់ប្រជាពលរដ្ឋជាង១០ម៉ឺនគ្រួសារ ខណៈប្រជាពលរដ្ឋជាង១ម៉ឺនគ្រួសារ ត្រូវបានជម្លៀសទៅកាន់ទីទួលសុវត្ថិភាព និងប៉ះពាល់ដល់ផ្ទះសម្បែងនិងហេដ្ឋារចនាសម្ព័ន្ធជាច្រើនទៀត។
បើតាមគណៈកម្មាធិការជាតិគ្រប់គ្រងគ្រោះមហន្តរាយ រាជធានី-ខេត្តទាំង១៩ដែលរងផលប៉ះពាល់ដោយជំនន់ទឹកភ្លៀង រួមមាន រាជធានីភ្នំពេញ ខេត្តពោធិ៍សាត់ ប៉ៃលិន បន្ទាយមានជ័យ បាត់ដំបង ស្វាយរៀង ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និងខេត្តកំពង់ធំ៕
