មន្ត្រីអាជ្ញាធរជាតិអប្សរា បានប្រមូលយកកុលាលភាជន៍និងវត្ថុបុរាណមួយចំនួនដែលរកឃើញពីការស្តារប្រឡាយនៅបរិវេណប្រាសាទព្រះខ័ន ក្នុងតំបន់រមណីយដ្ឋានអង្គរ ខេត្តសៀមរាប ទៅរក្សាទុក ដើម្បីសម្អាតនិងជួសជុល។
មន្ត្រីនាយកដ្ឋានគ្រប់គ្រងទឹកនៃអាជ្ញាធរជាតិអប្សរា លោក ញ៉ែម រស្មី ត្រូវបានអាជ្ញាធរជាតិអប្សរា ស្រង់ប្រសាសន៍ថា កុលាលភាជន៍ចំនួន១៩ ថ្មដុសថ្នាំចំនួន២ អង្រែកិនថ្នាំ១ និងបំណែកកុលាលភាជន៍ចំនួន៣០ ដែលបានពីការស្តារប្រឡាយនៅបរិវេណថ្នាលបណ្តុះកូនឈើប្រាសាទព្រះខ័ននោះ ត្រូវបានអាជ្ញាធរជាតិអប្សរាយកមករក្សាទុកដើម្បីជួសជុល កាលពីថ្ងៃម្សិលមិញ។
លោកបន្តថា កុលាលភាជន៍និងថ្មកិនថ្មាំ ដែលរកឃើញដ៏ច្រើននេះ ជីកបាននៅខែមីនា ឆ្នាំ២០២០ នៅពេលក្រុមការងារស្តារប្រឡាយចំនួន១ ៧០០ម៉ែត្រនៃបរិវេណប្រាសាទព្រះខ័ន។
លោកបញ្ជាក់ថា៖ «វត្ថុបុរាណទាំងអស់នេះ ស្ថិតនៅរាយប៉ាយពីគ្នាក្នុងជម្រៅ១ម៉ែត្រជាង។ ក្រោយប្រទះឃើញ ក្រុមការងារក៏បានរក្សាទុកវត្ថុបុរាណទាំងអស់ រហូតដល់បញ្ចប់ការស្តារប្រឡាយទើបប្រគល់ជូនមជ្ឈមណ្ឌលស្រាវជ្រាវ និងតម្កល់ឯកសារអង្គរ យកទៅអភិរក្ស ដោយមានការដឹងឮពីនគរបាលបេតិកភណ្ឌជាសាក្សី»។
បើតាមអាជ្ញាធរជាតិអប្សរា ចំពោះកិច្ចអភិរក្សវត្ថុបុរាណទាំងអស់នេះ ស្ថាប័ននឹងយកទៅរក្សាទុក ដើម្បីចុះបញ្ជីសារពើភណ្ឌវត្ថុសិល្បៈ ដុសសម្អាត រួមទាំងជួសជុលឱ្យផុតពីហានិភ័យទុកជាសម្បត្តិជាតិ ពិសេសសម្រាប់សិក្សាស្រាវជ្រាវពីប្រវត្តិបន្ថែមទៀត៕
