មន្ត្រីជាន់ខ្ពស់រដ្ឋាភិបាល បានបញ្ជាក់ថា ប្រមុខរាជរដ្ឋាភិបាលមិនដែលនិយាយជាមួយប្រទេសចិនឬប្រទេសណាមួយ ស្តីពីការប្រើប្រាស់កំពង់ផែនិងវាលយន្តហោះកម្ពុជា សម្រាប់យោធាបរទេសនោះទេ។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានស្រង់ប្រសាសន៍របស់លោកនាយករដ្ឋមន្ត្រី ហ៊ុន សែន ដែលបានថ្លែងក្នុងកិច្ចប្រជុំគណៈរដ្ឋមន្ត្រី នៅថ្ងៃនេះ មកផ្សព្វផ្សាយក្នុងបណ្តាញសង្គមរបស់លោកថា៖
«ខ្ញុំ [លោកនាយករដ្ឋមន្ត្រី ហ៊ុន សែន] មិនដែលនិយាយជាមួយចិនឬជាមួយប្រទេសណាមួយ ស្តីពីបម្រើបម្រាស់កំពង់ផែ វាលយន្តហោះកម្ពុជា សម្រាប់យោធាបរទេស ហើយរដ្ឋធម្មនុញ្ញក៏មិនអនុញ្ញាតឱ្យដែរ»។
ការបញ្ជាក់របស់ប្រមុខរាជរដ្ឋាភិបាល បានធ្វើឡើងស្របពេលក្រុមប្រជាពលរដ្ឋប្រមាណជិត២០នាក់ បាននាំគ្នាប្រមូលផ្តុំដាក់ញត្តិនៅស្ថានទូតបរទេសមួយចំនួនប្រចាំនៅកម្ពុជា ក្នុងនោះមានស្ថានទូតចិនផងដែរ ដោយពួកគេស្នើសុំកុំឱ្យមានការបោះទីតាំងទ័ពចិននៅក្នុងទឹកដីខេត្តព្រះសីហនុ និងខេត្តកោះកុង។
កាលពីថ្ងៃទី៧ ខែតុលា លោកនាយករដ្ឋមន្ត្រី ហ៊ុន សែន ធ្លាប់បានបញ្ជាក់ហើយថា កំពង់ផែយោធារាម ខេត្តព្រះសីហនុ ជាកំពង់ផែផ្តាច់មុខរបស់កម្ពុជា ហើយកម្ពុជាក៏មិនបានប្រគល់កំពង់ផែនេះឱ្យចិនប្រើប្រាស់ផ្តាច់មុខដូចការចោទប្រកាន់នោះដែរ។ លោកបន្តថា ប្រសិនបើប្រទេសណាមួយដែលចង់ចូលចតនៅកំពង់ផែយោធានេះ ត្រូវសុំការអនុញ្ញាតពីកម្ពុជាជាមុនសិន។
លោកនាយករដ្ឋមន្ត្រី ហ៊ុន សែន បានថ្លែងថា៖ «យើងមានកំពង់ផែយោធា អាហ្នឹងកំពង់ផែចម្បាំង អញ្ចឹងត្រូវសុំការអនុញ្ញាត មិនមែនគ្រាន់តែចិនមួយមានសិទ្ធិប្រើប្រាស់នោះទេ ប្រទេសដទៃដែលសុំការអនុញ្ញាតមកចូលចត ចាក់ប្រេង ឬឡើងគោក ដើម្បីសមយុទ្ធជាមួយនឹងកម្ពុជាឬធ្វើកិច្ចការអ្វីមួយជាមួយនឹងកម្ពុជា យើងស្វាគមន៍ៗ»។
យោងតាមមាត្រា៥៣ នៃរដ្ឋធម្មនុញ្ញព្រះរាជាណាចក្រកម្ពុជា បានបញ្ជាក់ថា ព្រះរាជាណាចក្រកម្ពុជា ប្រកាន់ខ្ជាប់ជានិច្ចនូវនយោបាយអព្យាក្រឹត្យអចិន្ត្រៃយ៍ និងមិនចូលបក្សសម្ព័ន្ធ […] ព្រះរាជាណាចក្រកម្ពុជា មិនចងសម្ព័ន្ធយោធាឬចូលក្នុងកិច្ចព្រមព្រៀងយោធាណាមួយដែលមិនស្របនឹងអព្យាក្រឹត្យភាពរបស់ខ្លួនឡើយ។ ព្រះរាជាណាចក្រកម្ពុជា មិនអនុញ្ញាតឱ្យមានមូលដ្ឋានយោធាបរទេសនៅលើទឹកដីរបស់ខ្លួន ហើយក៏មិនអនុញ្ញាតឱ្យមានមូលដ្ឋានយោធារបស់ខ្លួននៅបរទេសដែរ លើកលែងតែក្នុងក្របខណ្ឌនៃសំណូមពររបស់អង្គការសហប្រជាជាតិ៕
