អាជ្ញាធររាជធានីភ្នំពេញ នៅថ្ងៃសុក្រនេះ បានបំបែកការប្រមូលផ្តុំរបស់ក្រុមប្រជាពលរដ្ឋប្រមាណជិត២០នាក់ដែលព្យាយាមទៅប្រមូលផ្តុំដាក់ញត្តិនៅស្ថានទូតចិនប្រចាំនៅកម្ពុជា ចំថ្ងៃខួប២៩ឆ្នាំនៃកិច្ចព្រមព្រៀងសន្តិភាពទីក្រុងប៉ារីស ក្នុងនោះអាជ្ញាធរបានឃាត់ខ្លួនអ្នកប្រមូលផ្តុំចំនួន៣នាក់។
លោក ស៊ុម សារិទ្ធ អាយុ៥៨ឆ្នាំ រស់នៅស្រុកមេមត់ ខេត្តត្បូងឃ្មុំ ដែលចូលរួមក្នុងការប្រមូលផ្តុំនៅក្បែរស្ថានទូត មានប្រសាសន៍ថា ពួកគាត់មានបំណងដាក់ញត្តិនៅស្ថានទូតចិនប្រចាំនៅកម្ពុជា ដើម្បីស្នើកុំឱ្យមានការដាក់កងទ័ពចិននៅកម្ពុជា និងអំពាវនាវឱ្យរដ្ឋាភិបាលស្តារឡើងវិញនូវលទ្ធិប្រជាធិបតេយ្យនៅកម្ពុជា ស្របពេលខួប២៩ឆ្នាំនៃកិច្ចព្រមព្រៀងសន្តិភាពទីក្រុងប៉ារីស។
លោកថា៖ «ទាមទារឱ្យរដ្ឋាភិបាលបង្កើតលទ្ធិប្រជាធិបតេយ្យនៅកម្ពុជាឡើងវិញ និងប្រឆាំងចិន ដែលមកដាក់ទ័ពនៅកម្ពុជា កាលណាដាក់ទ័ពទៅ វាអាចមានការប្រទូស្តរាយគ្នាទៅ វាពិបាកប្រជាពលរដ្ឋខ្មែរ បានជាខ្ញុំចង់មកហ្នឹងណា […] ប្រជាពលរដ្ឋមកនេះ មិនមែនមកចង់ប្រឆាំងអីទេ គ្រាន់តែចង់មកដាក់ញត្តិ»។
បើតាមក្រុមពលរដ្ឋទាំងនោះ ក្នុងអំឡុងពេលប្រមូលផ្តុំ អាជ្ញាធររាជធានីភ្នំពេញជាច្រើននាក់បានដាក់កម្លាំងរារាំងនិងបានបំបែកការប្រមូលផ្តុំរបស់ពួកគេ ក្នុងនោះបានឃាត់ខ្លួនពលរដ្ឋ៣នាក់ រួមមាន អ្នកស្រី លឹម សាន, លោក សុន និមល និងអ្នកស្រី យ៉យ ស្រីមុំ។
ទោះយ៉ាងណា អាជ្ញាធររាជធានីភ្នំពេញ បានប្រកាសតាមឧគ្ឃោសនាសព្ទ ដោយស្នើឱ្យពលរដ្ឋទាំងនោះរំសាយការតវ៉ា មុននឹងអាជ្ញាធរមានវិធានការរដ្ឋបាលទៅលើពួកគាត់។
អាជ្ញាធររាជធានីភ្នំពេញ បាននិយាយថា៖ «មិនអនុញ្ញាតឱ្យបងប្អូនប្រមូលផ្តុំលើកបដានៅទីនេះទេ សូមរំសាយរយៈពេល៥នាទី បើបងប្អូនមិនរំសាយទេ ខ្ញុំនឹងមាននីតិវិធីតាមរដ្ឋបាល […] កម្លាំងអាជ្ញាធរនឹងមានវិធានការតាមផ្លូវច្បាប់»។
កាលពីថ្ងៃពុធ ទី២១ ខែតុលា ឆ្នាំ២០២០នេះ លោកនាយករដ្ឋមន្ត្រី ហ៊ុន សែន បានព្រមានចាត់វិធានការចំពោះក្រុមដែលចង់ប្រមូលផ្តុំធ្វើបាតុកម្មដាក់ញត្តិនៅស្ថានទូតចិនប្រចាំនៅកម្ពុជា នៅថ្ងៃខួប២៩ឆ្នាំនៃកិច្ចព្រមព្រៀងសន្តិភាពទីក្រុងប៉ារីសនេះ ដោយថា កម្ពុជាកំពុងមានទុក្ខដោយសារគ្រោះទឹកជំនន់និងបញ្ហាជំងឺកូវីដ១៩៕
