គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ប្រជាពលរដ្ឋដែលបានស្លាប់ក្នុងជំនន់ទឹកភ្លៀង បានកើនដល់ជិត៤០នាក់ ក្នុងនោះខេត្តបន្ទាយមានជ័យ មានតួលេខអ្នកស្លាប់ច្រើនជាងគេ។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា គិតពីថ្ងៃទី០១ ខែកញ្ញា រហូតដល់ថ្ងៃទី២២ ខែតុលា ឆ្នាំ២០២០នេះ ប្រជាពលរដ្ឋ៣៩នាក់ បានស្លាប់ ដោយសារគ្រោះជំនន់ទឹកភ្លៀង នៅក្នុងខេត្តចំនួន៧ផ្សេងគ្នា។
ខេត្តទាំងនោះរួមមាន ខេត្តពោធិ៍សាត់ ៦នាក់, បន្ទាយមានជ័យ ២២នាក់, ប៉ៃលិន ១នាក់, ព្រះសីហនុ ២នាក់, កំពង់ធំ ៦នាក់, ស្ទឹងត្រែង ១នាក់ និងកំពង់ឆ្នាំង ១នាក់។
របាយការណ៍ ក៏បានឱ្យដឹងទៀតថា ជំនន់ទឹកភ្លៀងនេះ ធ្វើឱ្យប៉ះពាល់សរុប១៩រាជធានី-ខេត្ត ស្មើនឹង១១០ក្រុង-ស្រុក-ខណ្ឌ និងប៉ះពាល់ប្រជាពលរដ្ឋប្រមាណ១២០ ៧៨៥គ្រួសារ ស្មើនឹង៤៨៣ ១៤០នាក់ ប៉ះពាល់ផ្ទះ១១១ ៣៥៤ខ្នង សាលារៀនលិចទឹក៧០៧កន្លែង ស្រូវលិចទឹកជាង២៣ម៉ឺនហិកតា និងដំណាំរួមផ្សំជាង៨ម៉ឺនហិកតា រួមទាំងបង្កឱ្យខូចហេដ្ឋារចនាសម្ព័ន្ធជាច្រើនទៀត។
លោកនាយករដ្ឋមន្ត្រី ហ៊ុន សែន បានបញ្ជាក់ថា គិតមកដល់ព្រឹកថ្ងៃម្សិលមិញ ថវិកាបានមកពីសប្បុរសជននានាដែលបានចូលរួមបរិច្ចាគជួយដល់ពលរដ្ឋដែលរងគ្រោះដោយសារជំនន់ទឹកភ្លៀង បានប្រមាណ៨លានដុល្លារ ខណៈបច្ចុប្បន្ននេះ នៅតែមានសប្បុរសជនបន្តជួយបរិច្ចាគជូនរដ្ឋាភិបាលជាបន្តបន្ទាប់ទៀត៕
