មន្ត្រីជាន់ខ្ពស់របស់សហរដ្ឋអាមេរិកលើកឡើងថា ការវិនិយោគរបស់ចិននៅលើពិភពលោកគឺជាការវិនិយោគបែបអន្ទាក់បំណុល ហើយបានជំរុញឱ្យស្រីលង្កាបញ្ជាក់ជំហរថា ជ្រើសរើសយកចិនឬអាមេរិកជាដៃគូអភិវឌ្ឍន៍សេដ្ឋកិច្ច។
រដ្ឋមន្រ្តីក្រសួងការបរទេសសហរដ្ឋអាមេរិក លោក Mike Pompeo នឹងធ្វើទស្សនកិច្ចនៅប្រទេសស្រីលង្កានៅសប្តាហ៍ក្រោយ ដែលជាផ្នែកមួយនៃការទស្សនកិច្ចដ៏ធំទូលាយ ហើយបន្ទាប់ពីស្រីលង្កា នឹងបន្តដំណើរទស្សនកិច្ចទៅប្រទេសឥណ្ឌា ម៉ាល់ឌីវ និងឥណ្ឌូនេស៊ីជាមួយនឹងគោលដៅសំខាន់ដែលរំពឹងថា នឹងទទួលបានការគាំទ្រក្នុងការទប់ឥទ្ធិពលប្រទេសចិន។
ទស្សនកិច្ចរបស់លោក Pompeo កើតឡើងមួយសប្តាហ៍មុនការបោះឆ្នោតនាថ្ងៃទី៣ ខែវិច្ឆិកា ដែលជាចំណុចគន្លឹះមួយនៃយុទ្ធនាការឃោសនារបស់ប្រធានាធិបតី ដូណាល់ ត្រាំ។
លោក ដូណាល់ ត្រាំ បានបន្ទោសថា ចិនធ្វើឱ្យឆ្លងរាលដាលមេរោគកូវីដ១៩ បណ្តាលឱ្យស្លាប់ពលរដ្ឋអាមេរិកអស់២២១ ០០០នាក់ និងស្លាប់ទូទាំងពិភពលោកជាង១លាន១សែននាក់។
លោក Pompeo និងមន្ត្រីជាន់ខ្ពស់ដទៃទៀតរបស់សហរដ្ឋអាមេរិក បានបន្តនិយាយរិះគន់ចិនថា ធ្វើការទូតដាក់ឱ្យជាប់បំណុល ហើយរាល់ការវិនិយោគបន្សល់ទុកបំណុលធ្ងន់ធ្ងរដល់ប្រទេសក្រីក្រ។
មន្ត្រីការទូតអាមេរិកមួយរូបថ្លែងប្រាប់ទីភ្នាក់ងារព័ត៌មានរ៉យទ័រថា ក្នុងដំណើរទស្សនកិច្ចនៅសប្តាហ៍ក្រោយនេះ អាមេរិកនឹងបញ្ជាក់ជំហរជាមួយស្រីលង្កាថា តើចិនឬអាមេរិកដែលស្រីលង្កាជ្រើសរើសយកជាដៃគូសេដ្ឋកិច្ច។
លោក Dean Thompson អនុរដ្ឋលេខាធិការរងនៃការិយាល័យទទួលបន្ទុកកិច្ចការអាស៊ីខាងត្បូងនិងអាស៊ីកណ្តាល ថ្លែងថា អាមេរិកនឹងលើកទឹកចិត្តឱ្យស្រីលង្កាពិនិត្យឡើងវិញពីការអភិវឌ្ឍសេដ្ឋកិច្ចប្រកបដោយតម្លាភាពនិងស្ថិរភាព ដែលផ្ទុយពីការអភិវឌ្ឍបែបផុយស្រួយនិងទន្ទាក់បំណុល។
លោកបន្តថា ករណីនេះ វាពិបាកសម្រាប់ស្រីលង្កាជ្រើសរើស ប៉ុន្តែវាមានសារៈសំខាន់ក្នុងការអភិវឌ្ឍសេដ្ឋកិច្ចដែលមានស្ថិរភាពវែងឆ្ងាយនិងមានលក្ខណៈឯករាជ្យ។
គួរបញ្ជាក់ថា នៅឆ្នាំ២០១៧ ស្រីលង្កាបានចុះហត្ថលេខាផ្ទេរការគ្រប់គ្រងកំពង់ផែនិងដីនៅក្បែរៗនោះ ឱ្យទៅចិនគ្រប់គ្រងដោយសារតែបញ្ហាបំណុល។ ករណីនេះ បានធ្វើឱ្យអាមេរិកនិងឥណ្ឌាមានការព្រួយបារម្ភ៕
