ក្រសួងការងារ និងបណ្តុះបណ្តាលវិជ្ជាជីវៈ ជូនដំណឹងពីការឈប់សម្រាកដោយមានប្រាក់ឈ្នួលរយៈពេល៤ថ្ងៃ សម្រាប់ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។
សេចក្តីជូនដំណឹងរបស់ក្រសួង នៅថ្ងៃទី២៦ ខែតុលា ឆ្នាំ២០២០នេះ បានលើកឡើងថា ម្ចាស់ឬនាយករោងចក្រសហគ្រាសទាំងអស់ ដែលស្ថិតក្នុងដែនអនុវត្តន៍ច្បាប់ស្តីពីការងារ ត្រូវអនុញ្ញាតឱ្យកម្មករនិយោជិតទាំងអស់ឈប់សម្រាកដោយមានប្រាក់ឈ្នួលក្នុងព្រះរាជពិធីបុណ្យអុំទូក រយៈពេល៤ថ្ងៃ គឺចាប់ពីថ្ងៃទី៣០ ខែតុលា ដល់ថ្ងៃទី២ ខែវិច្ឆិកា (ថ្ងៃទី០២ ខែវិច្ឆិកា ជំនួសឱ្យថ្ងៃទី១ ដែលត្រូវចំថ្ងៃអាទិត្យ)។
ក្រសួងបន្តថា ចំពោះរោងចក្រសហគ្រាសទាំងឡាយណាដែលកម្មវត្ថុអាជីវកម្មមានចរិតលក្ខណៈសកល ត្រូវប្រព្រឹត្តទៅជាប្រចាំ មិនអាចបញ្ឈប់សកម្មភាពបាន ឬធ្វើឱ្យខូចដំណើរការរបស់រោងចក្រសហគ្រាសនោះ ម្ចាស់ឬនាយករោងចក្រត្រូវរៀបចំបែងចែកឱ្យកម្មករបានឈប់សម្រាកទៅតាមថ្ងៃបុណ្យដោយផ្លាស់ប្តូរវេនគ្នា។
ក្រសួងបន្តទៀតថា ក្នុងករណីមានការព្រមព្រៀងរវាងកម្មករនិយោជិតនិងនិយោជក ឬមានចែងក្នុងបទបញ្ជាផ្ទៃក្នុងរបស់រោងចក្រសហគ្រាស ឬអនុសញ្ញារួម ការឈប់សម្រាករបស់កម្មករនិយោជិត អាចអនុវត្តនៅពេលណាមួយផ្សេងទៀតដែលខុសពីថ្ងៃឈប់សម្រាកបុណ្យ ដូចមានកំណត់ក្នុងប្រកាសរបស់ក្រសួង។
ក្រសួងបានបញ្ជាក់ថា៖ «កម្មករនិយោជិតដែលធ្វើការថ្ងៃឈប់បុណ្យនេះ មានសិទ្ធិទទួលនូវប្រាក់បំណាច់បន្ថែម ដែលមានចំនួនស្មើនឹងប្រាក់ឈ្នួលថ្ងៃធ្វើការធម្មតា»៕
