នាយករដ្ឋមន្ត្រីបញ្ជាទៅរដ្ឋមន្ត្រីក្រសួងចំនួន៤ ឱ្យចុះស្តារហេដ្ឋារចនាសម្ព័ន្ធផ្លូវថ្នល់ ប្រព័ន្ធធារាសាស្ត្រ និងផ្នែកកសិកម្មដល់ប្រជាពលរដ្ឋ ក្រោយកម្ពុជារងគ្រោះដោយជំនន់ទឹកភ្លៀង។
ការបញ្ជារបស់នាយករដ្ឋមន្ត្រី បានធ្វើឡើងក្នុងពិធីបើកការដ្ឋានសាងសង់ស្ពានបេតុងឆ្លងកាត់ទន្លេបាសាក់ តភ្ជាប់ពីទីក្រុងកោះពេជ្រ ទៅទីក្រុងរណបកោះនរា និងពីកោះនរា ទៅផ្លូវជាតិលេខ១ ក្នុងខណ្ឌច្បារអំពៅ រាជធានីភ្នំពេញ នៅព្រឹកថ្ងៃទី២៦ ខែតុលា ឆ្នាំ២០២០នេះ។
លោកនាយករដ្ឋមន្ត្រី ហ៊ុន សែន បានថ្លែងថា ក្រោយជំនន់ទឹកភ្លៀង ផ្លូវថ្នល់ ស្ពាន ប្រឡាយ ទំនប់ទឹកមួយចំនួន បានរងការបែកបាក់ខូចខាត ខណៈដំណាំស្រូវនិងដំណាំកសិកម្មផ្សេងៗជាច្រើនទៀតរបស់ប្រជាកសិករ ក៏ត្រូវបានជន់លិចខូចខាតផងដែរ។
ករណីនេះ លោកបានបញ្ជាទៅរដ្ឋមន្ត្រីក្រសួងកសិកម្ម ក្រសួងសាធារណការ ក្រសួងធនធានទឹក និងក្រសួងអភិវឌ្ឍន៍ជនបទ ត្រូវចាត់រដ្ឋលេខាធិការនិងអនុរដ្ឋលេខាធិការរបស់ក្រសួងនីមួយៗ ចុះទៅអន្តរាគមន៍ដោះស្រាយបញ្ហាទាំងនេះជាបន្ទាន់ ដើម្បីជួយដល់ប្រជាពលរដ្ឋ។
លោកថា៖ «សភាពការណ៍មិនធម្មតា នីតិវិធីក៏មិនធម្មតា កុំរង់ចាំ! មន្ទីរកសិកម្មក្តី មន្ទីរអភិវឌ្ឍន៍ក្តី វាយតម្លៃពីខាងក្រោម ឥលូវនេះក្រសួងមួយចំនួនមានរដ្ឋលេខាធិការ អនុរដ្ឋលេខាធិការច្រើនណាស់ អ៊ីចឹងត្រូវចុះទៅ ហើយក្រសួងសេដ្ឋកិច្ចចុះទៅជាមួយប្រឹក្សាភ្លាមៗ ចុះភ្លាម! ដើម្បីជួសជុល»។
លោកនាយករដ្ឋមន្ត្រី បន្ថែមថា៖ «កន្លែងដែលទឹកហូរដាច់ ត្រូវធ្វើភ្លាម អាហ្នឹងជាចំណុចចង្អុលការរបស់ខ្ញុំ ដើម្បីឱ្យប្រជាពលរដ្ឋទទួលផលពីសកម្មភាពរបស់យើងដោយឆាប់រហ័ស ហើយខ្ញុំនឹងចាំមើល បើសិនជាកន្លែងណាយឺត ខ្ញុំនឹងចុះទៅកន្លែងហ្នឹង ចាំមើលរដ្ឋមន្ត្រីធ្វើមុខម៉េច ដូចថា [បើមាន] ស្ពានជនបទខូច ហើយប្រជាជនស្រែកមល ខ្ញុំចុះទៅ ហើយរដ្ឋមន្ត្រីរត់តាមក្រោយ អាហ្នឹងរឿងហើយ»។
លោកនាយករដ្ឋមន្ត្រី ហ៊ុន សែន ក៏បានណែនាំឱ្យក្រសួងកសិកម្ម ចុះពិនិត្យនិងចែកពូជស្រូវ ពូជដំណាំ និងពូជបន្លែជាបន្ទាន់ ដល់ប្រជាកសិករទាំងឡាយណាដែលស្រូវនិងដំណាំរបស់ពួកគាត់ខូចដោយសារជំនន់ទឹកភ្លៀងផងដែរ។
លោកថា៖ «សូមឱ្យមន្ត្រីរបស់យើងធ្វើសកម្មភាព ដឹងហើយឆ្នាំនេះ នាយករដ្ឋមន្ត្រីចេញអន្តរាគមន៍ដោយផ្ទាល់ទៅលើមុខព្រួញដែលជួបប្រទះដោយសារជំនន់»។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងកាលពីថ្ងៃម្សិលមិញថា គិតពីថ្ងៃទី០១ ខែកញ្ញា រហូតដល់ថ្ងៃទី២៤ ខែតុលា ឆ្នាំ២០២០នេះ ប្រជាពលរដ្ឋ៤០នាក់ បានស្លាប់ដោយសារជំនន់ទឹកភ្លៀង និងប៉ះពាល់ដំណាំនិងទ្រព្យសម្បត្តិប្រជាជនក្នុង២០រាជធានី-ខេត្ត។
រាជធានី-ខេត្តទាំងនោះរួមមាន ខេត្តពោធិ៍សាត់ ប៉ៃលិន បន្ទាយមានជ័យ ភ្នំពេញ បាត់ដំបង ស្វាយរៀង ត្បូងឃ្មុំ ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និងកំពង់ធំ។
របាយការណ៍បានឱ្យដឹងទៀតថា ប្រជាពលរដ្ឋប្រមាណ១៣៦ ៤៤២គ្រួសារ ជម្លៀសប្រជាពលរដ្ឋបាន១១ ៨៣៨គ្រួសារ ប៉ះពាល់ផ្ទះប្រមាណ១២០ ៤១៨ខ្នង សាលារៀនលិចទឹកប្រមាណ៩២៥កន្លែង វត្តលិចទឹកប្រមាណ៣០៥កន្លែង ស្រូវលិចទឹកប្រមាណ២៧ម៉ឺនហិកតា និងដំណាំរួមផ្សំលិចទឹកជិត៩ម៉ឺនហិកតា រួមទាំងបង្កឱ្យខូចហេដ្ឋារចនាសម្ព័ន្ធជាច្រើនទៀត៕