លោកនាយករដ្ឋមន្ត្រី ហ៊ុន សែន ប្រកាសថា បើទោះជាព្រះរាជពិធីបុណ្យអុំទូកនៅឆ្នាំនេះ មិនមានពិធីប្រណាំងទូកនៅរាជធានីភ្នំពេញ ប៉ុន្តែពិធីអកអំបុកនិងសំពះព្រះខែនៅតាមផ្ទះ និងការឈប់សម្រាកនៅមានដដែល។
នៅក្នុងពិធីបើកការដ្ឋានសាងសង់ស្ពានចំនួនពីរនៅខណ្ឌច្បារអំពៅ រាជធានីភ្នំពេញ នៅព្រឹកថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានថ្លែងថា ឆ្នាំនេះ រាជរដ្ឋាភិបាលសម្រេចផ្អាកប្រារព្ធព្រះរាជពិធីបុណ្យអុំទូក អកអំបុក និងសំពះព្រះខែ ដែលនឹងប្រព្រឹត្តទៅចាប់ពីថ្ងៃទី៣០ ខែតុលា ដល់ថ្ងៃទី១ ខែវិច្ឆិកា ដោយសារបញ្ហាវិបត្តិជំងឺកូវីដ១៩។
លោកបន្តថា៖ «តែគ្រាន់តែសូមបញ្ជាក់នៅទីនេះបន្តិច យើងគ្រាន់តែមិនចាត់តាំងអុំទូកតែប៉ុណ្ណោះ ប៉ុន្តែរឿងសំពះព្រះខែនៅតាមផ្ទះ អកអំបុកនៅតាមផ្ទះ គឺនៅតែធ្វើ មន្ត្រីរាជការរបស់យើង កម្មករ-កម្មការិនី ត្រូវទទួលបានការឈប់សម្រាក ក៏នៅតែទទួលបានការឈប់សម្រាកដដែល»។
ប្រធានអចិន្ត្រៃយ៍នៃគណៈកម្មាធិការជាតិរៀបចំបុណ្យជាតិនិងអន្តរជាតិ លោក ប៊ូ ជុំសេរី មានប្រសាសន៍កាលពីថ្ងៃទី១៣ ខែសីហា ថា ដើមចមដែលនាំឱ្យរដ្ឋាភិបាលផ្អាកប្រារព្ធព្រះរាជពិធីបុណ្យអុំទូកនេះ ដោយសារតែរដ្ឋាភិបាលមានការបារម្ភចំពោះការឆ្លងរាលដាលនៃជំងឺកូវីដ១៩ ព្រោះតែព្រះរាជពិធីបុណ្យនេះ នឹងមានមនុស្សប្រមូលផ្តុំច្រើននៅរាជធានីភ្នំពេញ ដែលអាចមានហានិភ័យខ្ពស់ក្នុងការឆ្លង។
លោកថា៖ «បងប្អូនមកពី២៥រាជធានី-ខេត្តក្រុង មនុស្សរាប់សែនរាប់លាននាក់ ជួបជុំគ្នានៅមុខវាំង និយាយរួមមានហានិភ័យខ្ពស់ យើងធ្វើទៅ អាចប្រឈមនឹងការរីករាលដាលនៃជំងឺកូវីដខ្លាំង យល់ឃើញអ៊ីចឹងហើយ បានរាជរដ្ឋាភិបាលសម្រេចផ្អាក»។
កន្លងមក រដ្ឋាភិបាលក៏ធ្លាប់បានផ្អាកព្រះរាជពិធីប្រណាំងទូកនៅដងទន្លេសាបមុខព្រះបរមរាជវាំង រាជធានីភ្នំពេញ នេះជាច្រើនដងផងដែរ ដោយសារមូលហេតុផ្សេងៗ ដូចជា អំឡុងពេលសម្តេចព្រះបរមរតនកោដ្ឋ នរោត្តម សីហនុ យាងសោយទិវង្គត និងពេលមានវិបត្តិទឹកជំនន់ជាដើម៕