មេដឹកនាំអតីតបក្សប្រឆាំងដែលត្រូវបានរំលាយ លោក កឹម សុខា ផ្ញើសារក្រើនរំឭកកុំឱ្យមើលបំណាំគ្នា ឬយកជម្លោះធ្វើជាឧបសគ្គរារាំងដល់ការចូលរួមជួយសង្គ្រោះប្រជាពលរដ្ឋដែលរងគ្រោះដោយជំនន់ទឹកភ្លៀង។
លោក កឹម សុខា ថ្លែងតាមបណ្តាញសង្គមហ្វេសប៊ុករបស់លោក កាលពីថ្ងៃចន្ទនិងថ្ងៃអង្គារនេះថា លោកនិងសហការី បានយកស្រូវពូជទម្ងន់៤តោន ចែកជូនកសិករចំនួន១០០គ្រួសារនៅខេត្តកំពង់ឆ្នាំង ដោយសារស្រូវរបស់ពួកគាត់រលួយអស់ដោយសារទឹកលិច។ លោកក៏បានថ្លែងអរគុណដល់សប្បុរសជនក្នុងប្រទេសនិងក្រៅប្រទេស ដែលបានបន្តផ្តល់ជំនួយនិងពូជដំណាំជូនកសិករខ្មែរដែលខ្វះខាត។
លោកបន្តថា៖ «សេចក្តីត្រូវការរបស់មនុស្សអាចមិនចេះចប់ តែសេចក្តីត្រូវការដើម្បីរស់គឺជាការចាំបាច់ ដែលយើងជាមនុស្សត្រូវតែរួបរួមគ្នាដើម្បីជួយសង្គ្រោះ ទោះបីតិចឬច្រើនក្តី ដោយមិនគួរមើលបំណាំគ្នាឬយកជម្លោះមកធ្វើជាឧបសគ្គឡើយ»។
មេដឹកនាំអតីតបក្សប្រឆាំងដែលកំពុងស្ថិតក្រោមការត្រួតពិនិត្យរបស់តុលាការ បានបញ្ជាក់ទៀតថា លោកនឹងព្យាយាមធ្វើតាមលទ្ធភាពនិងដោយអហិង្សា ទោះបីលោកមិនទាន់មានសិទ្ធិសេរីភាពពេញលេញក៏ដោយ។
អ្នកស្រី ធឿន ថា រស់នៅភូមិបាក់រទេះ ឃុំព្រែកហ្លួង ស្រុកឯកភ្នំ ខេត្តបាត់ដំបង ដែលជួបគ្រោះទឹកជំនន់ មានប្រសាសន៍ថា ពួកគាត់មានក្តីត្រេកអរនៅពេលទទួលបានអំណោយជាស្បៀងអាហារពីសប្បុរសជននានា ដោយសារស្បៀងទាំងនោះអាចជួយឱ្យក្រុមគ្រួសាររបស់គាត់អាចរស់បានយ៉ាងតិច២សប្តាហ៍ ខណៈដែលពួកគាត់នៅមិនទាន់អាចចេញទៅប្រកបមុខរបររកស៊ីបានវិញនៅឡើយ។
អ្នកស្រីថា៖ «បានគេជួយមក អរយកតែមែនទែន! អររំភើបរហូតស្រក់ទឹកភ្នែក គ្មានអីអរជាងដូចគេឱ្យយើង ពេលយើងអត់ទេ»។
ស្ត្រីអាយុ៦០ឆ្នាំ ដែលមានកូន៧នាក់និងចៅ៤នាក់នៅក្នុងបន្ទុក បាននិយាយទៀតថា អ្នកភូមិពេលនេះកំពុងជួបបញ្ហាជីវភាព និងខ្លះទៀតរកប្រាក់លែងបានសម្រាប់សងត្រឡប់ទៅធនាគារវិញ ដោយសារតែគ្រោះជំនន់ទឹកភ្លៀង។
ក្នុងពេលចុះចែកអំណោយដល់ប្រជាពលរដ្ឋរងគ្រោះដោយជំនន់ទឹកភ្លៀងនៅខេត្តបន្ទាយមានជ័យ កាលពីសប្តាហ៍មុន លោកនាយករដ្ឋមន្ត្រី ហ៊ុន សែន បានថ្លែងលើកទឹកចិត្តឱ្យអ្នកនយោបាយចុះជួយអ្នករងគ្រោះដោយជំនន់ទឹកភ្លៀង ដូចគ្នានឹងសកម្មភាពរបស់រដ្ឋាភិបាលដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកសាររបស់មេដឹកនាំបក្សប្រឆាំងនេះថា ជាសេរីភាពបញ្ចេញមតិដែលលោកសុំមិនវាយតម្លៃទេ។
មន្ត្រីគ្រប់គ្រងកម្មវិធីនៅមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក ហេង គឹមហុង មានប្រសាសន៍ថា ក្នុងកាលៈទេសៈដែលកម្ពុជាជួបគ្រោះមហន្តរាយជំនន់ទឹកភ្លៀងនិងវិបត្តិជំងឺកូវីដ១៩នេះ ជាពេលវេលាដ៏មានសារៈសំខាន់ ដែលអ្នកមានធនធានត្រូវបរិច្ចាគដើម្បីចូលរួមចំណែកជួយអ្នករងគ្រោះ និងជាកាតព្វកិច្ចរបស់អ្នកនយោបាយដែលត្រូវរួមគ្នាដោះស្រាយបញ្ហាសង្គម។
លោកថា៖ «បើសិនជាយើងឈរលើសាមគ្គីធម៌និងសាមគ្គីភាព ក្នុងនាមប្រជាជនកម្ពុជា អ្នកមានធនធានត្រូវតែចូលរួមដើម្បីបង្ហាញឱ្យឃើញថា នេះជាវប្បធម៌ជួយគ្នារវាងខ្មែរនិងខ្មែរ ដែលត្រូវដោះស្រាយបញ្ហា មិនមែនជាឱកាសកេងប្រវ័ញ្ចរឿងរ៉ាវនយោបាយណាមួយនោះទេ»។
អ្នកឃ្លាំមើលរូបនេះនិយាយទៀតថា នៅពេលដែលអ្នកមានធនធានហ៊ានបរិច្ចាគ អ្នកនយោបាយសហការគ្នាដោះស្រាយបញ្ហាសង្គមដោយមិនរើសអើងនិន្នាការនយោបាយ នោះមានន័យថា ជាដំណើរឈានទៅរកការដោះស្រាយគ្រប់បញ្ហាទាំងអស់ រួមទាំងបញ្ហានយោបាយ។
លោក កឹម សុខា បានបាត់បង់សិទ្ធិធ្វើនយោបាយជាង៣ឆ្នាំមកហើយ គិតពីថ្ងៃចាប់ខ្លួនតាមបណ្តឹងរបស់រដ្ឋាភិបាល ដែលចោទថា ឃុបឃិតជាមួយបរទេសចង់ផ្តួលរំលំរដ្ឋាភិបាល។
ទោះយ៉ាងណា មួយរយៈចុងក្រោយនេះ លោកនិងសហការី បានចុះចែកអំណោយដល់ជនរងគ្រោះដោយសារជំនន់ទឹកភ្លៀងនៅខេត្តពោធិ៍សាត់ ព្រះសីហនុ បាត់ដំបង កំពង់ឆ្នាំង បន្ទាយមានជ័យ និងរាជធានីភ្នំពេញ។
ប៉ុន្តែកាលពីថ្ងៃទី១៥ ខែតុលាថ្មីៗនេះ លោក កឹម សុខា និងក្រុមការងារ ត្រូវបានអាជ្ញាធរស្រុកមង្គលបុរី ខេត្តបន្ទាយមានជ័យ រារាំងម្តងដែរ ពេលដែលលោកព្យាយាមចែកស្បៀងអាហារដល់ពលរដ្ឋដែលរងគ្រោះដោយទឹកជំនន់នៅតំបន់នោះ។ ការរារាំងនោះបានអនុញ្ញាតឡើងវិញ ក្រោយពីនាយករដ្ឋមន្ត្រី អន្តរាគមន៍តាមទូរសព្ទទៅអាជ្ញាធរពាក់ព័ន្ធ ឱ្យសហការជាមួយគណបក្សនយោបាយនានាដែលចុះជួយអ្នករងគ្រោះដោយជំនន់ទឹកភ្លៀង៕