ក្រសួងអប់រំ យុវជន និងកីឡា ប្រកាសពីការបើកដំណើរការគ្រឹះស្ថានសិក្សាសាធារណៈទាំងអស់ឡើងវិញ ក្នុងដំណាក់កាលទី៣ ដែលចាប់ផ្ដើមពីថ្ងៃទី០២ ខែវិច្ឆិកា រហូតដល់ដំណាច់ខែធ្នូ ឆ្នាំ២០២០។
ក្នុងសេចក្ដីណែនាំរបស់ក្រសួងអប់រំ នៅថ្ងៃទី២៧ ខែតុលា ឆ្នាំ២០២០នេះ បានលើកឡើងថា ក្រោយពីបានការអនុញ្ញាតពីប្រមុខរាជរដ្ឋាភិបាល ក្រសួងអនុញ្ញាតឱ្យគ្រឹះស្ថានសិក្សាសាធារណៈ (សាលារដ្ឋ) ទាំងអស់ បើកដំណើរការឡើងវិញ ក្នុងដំណាក់កាលទី៣ ដោយអនុវត្តតាមគោលការណ៍ប្រតិបត្តិស្តង់ដារ (SOP) ក្នុងស្មារតីបន្តបង្ការ ការពារ និងទប់ស្កាត់ការរីករាលដាលនៃជំងឺកូវីដ១៩។
ក្រសួងបានបន្តថា ការអនុវត្តឆមាសទី២ នៃឆ្នាំសិក្សា២០១៩-២០២០ គិតចាប់ពីថ្ងៃទី០៧ ខែកញ្ញា ដល់ដំណាច់ខែធ្នូ ឆ្នាំ២០២០។
ក្រសួងក៏បានណែនាំដល់គ្រប់គ្រឹះស្ថានមត្តេយ្យសិក្សានិងកន្លែងផ្ដល់សេវាអប់រំកុមារតូច ត្រូវបើកដំណើរការបង្រៀននិងរៀនពេញលេញគ្រប់កម្រិតថ្នាក់ ចំនួន៥ថ្ងៃក្នុងមួយសប្ដាហ៍ ដោយកំណត់ចំនួនកុមារមិនឱ្យលើសពី២៥នាក់ក្នុងមួយថ្នាក់។
សម្រាប់គ្រឹះស្ថានបឋមសិក្សា ក្រសួងបានណែនាំឱ្យអនុវត្តការបង្រៀននិងរៀនលើមុខវិជ្ជាសិក្សាគោលពីរគឺ ភាសាខ្មែរនិងគណិតវិទ្យា និងអនុវត្តការបង្រៀននិងរៀនចំនួន៣ថ្ងៃក្នុងមួយសប្តាហ៍ ដោយបែងចែកសិស្សជាពីរក្រុមក្នុងមួយថ្នាក់ និងមិនលើសពី៣០នាក់ក្នុងមួយក្រុម។
ក្រសួងបានបន្ថែមថា ចំពោះការអនុវត្តកម្មវិធីសិក្សាសម្រាប់គ្រឹះស្ថានមធ្យមសិក្សា ថ្នាក់ទី៩និងទី១២ ត្រូវបន្ដអនុវត្តដូចដំណាក់កាលទី២ ខណៈថ្នាក់ទី៧ ទី៨ ទី១០ និងទី១១ ត្រូវអនុវត្តការបង្រៀននិងរៀន៣ថ្ងៃក្នុងមួយសប្ដាហ៍ ដែលក្នុងមួយបន្ទប់មានសិស្សមិនឱ្យលើសពី៣០នាក់ និងអនុវត្តការសិក្សាបែបចម្រុះ ដោយផ្ដោតលើមុខវិជ្ជាសិក្សាគោលយ៉ាងតិច៦មុខវិជ្ជា ស្របតាមស្ថានភាពជាក់ស្ដែងនៃចំនួនបន្ទប់រៀននិងចំនួនគ្រូ។
ចំពោះការផ្តល់សេវាផ្សេងៗ ដូចជា សេវារថយន្តដឹកសិស្ស បណ្តាល័យ សកម្មភាពអប់រំកាយនិងកីឡា សកម្មភាពសិល្បៈ និងអាហារដ្ឋានវិញ ក្រសួងក៏បានអនុញ្ញាតឱ្យគ្រឹះស្ថានសិក្សាសាធារណៈអាចដំណើរការឡើងវិញបានដែរ៕