ក្រសួងទេសចរណ៍ឱ្យដឹងថា ក្នុងរយៈពេល៩ខែ ឆ្នាំ២០២០នេះ កម្ពុជាទទួលបានភ្ញៀវអន្តរជាតិជាង១លាននាក់ និងភ្ញៀវទេសចរផ្ទៃក្នុងជាង៧លាននាក់ ដែលអត្រានេះមានការថយចុះជាងឆ្នាំមុន ដោយសាររងផលប៉ះពាល់ខ្លាំងពីវិបត្តិជំងឺកូវីដ១៩។
របាយការណ៍ដែលបានផ្សព្វផ្សាយលើទំព័រហ្វេសប៊ុករបស់ក្រសួងទេសចរណ៍កាលពីថ្ងៃចន្ទម្សិលមិញ បានលើកឡើងថា ក្នុងរយៈពេល៩ខែឆ្នាំនេះ ភ្ញៀវទេសចរអន្តរជាតិមកទស្សនាកម្ពុជាមានត្រឹមតែ១ ២៤៧ ៦៨០នាក់ ថយចុះ ៧៤,១% និងទេសចរផ្ទៃក្នុងមានចំនួន៧ ២៨៤ ៤០៩នាក់ ថយចុះ ៥១,៩% បើធៀបនឹងរយៈពេលដូចគ្នាកាលពីឆ្នាំមុន។
ក្រសួងបន្តថា ក្នុងដំណាក់កាលវិបត្តិកូវីដ-១៩ ចាប់ពីខែមេសា ដល់ខែកញ្ញា និន្នាការទេសចរណ៍មានការប្រែប្រួលយ៉ាងខ្លាំង ក្នុងនោះទេសចរសម្រាកលំហែកម្សាន្តមាន ៤៣,៤% ទេសចរធុរកិច្ចនិងការទូតមាន ៥៤,៤% និងផ្សេងៗ ២,៣% ខណៈកាលពីឆ្នាំ២០១៩ ទេសចរសម្រាកលំហែកម្សាន្តមានរហូតដល់ ៧៦,២% ទេសចរធុរកិច្ចនិងការទូតមាន ២០,៧% និងប្រភេទផ្សេងៗ ៣,១%។
ក្រសួងទេសចរណ៍ក៏បានស្រង់លទ្ធផលវាយតម្លៃរបស់អ្នកជំនាញទេសចរណ៍ដែរថា ស្ថានភាពទេសចរណ៍កម្ពុជានឹងវិលត្រលប់មកប្រក្រតីភាពឡើងវិញ តាមសេណារីយ៉ូចំនួន២ រួមមាន សេណារីយ៉ូទី១ ប្រើរយៈពេល៣ឆ្នាំ (២០២០-២០២៣) និងសេណារីយ៉ូទី២ ប្រើរយៈពេល៥ឆ្នាំ (២០២០-២០២៥)។
តាមការព្យាករនៅឆ្នាំ២០២០ ក្រសួងថា កម្ពុជានឹងទទួលទេសចរអន្តរជាតិប្រមាណ១,៣២លាននាក់ ថយចុះ ៨០% ធៀបនឹងឆ្នាំ២០១៩។ ចំពោះភ្ញៀវទេសចរផ្ទៃក្នុងវិញ ក្រសួងបានប៉ាន់ប្រមាណថា អាចនឹងមានចំនួន៩លាននាក់ ថយចុះ ២០% ធៀបនឹងឆ្នាំ២០១៩ ខណៈទេសចរផ្ទៃក្នុងនឹងវិលមកប្រក្រតីភាពឡើងវិញក្នុងរយៈពេល៣ឆ្នាំ ពោលគឺឆ្នាំ២០២៣ កម្ពុជានឹងទទួលបាន១១លាននាក់៕