ក្រសួងសាធារណការ និងដឹកជញ្ជូន ណែនាំដល់ម្ចាស់សេវាកម្មដឹកជញ្ជូនអ្នកដំណើរនិងប្រជាពលរដ្ឋទាំងអស់ ការពារខ្លួននិងអនុវត្តវិធានការការពារការរាតត្បាតជំងឺកូវីដ១៩ ក្នុងឱកាសថ្ងៃឈប់សម្រាកព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។
សេចក្តីណែនាំរបស់ក្រសួង នៅថ្ងៃទី២៨ ខែតុលា ម្សិលមិញ បានលើកឡើងដោយណែនាំដល់សមាគមដឹកជញ្ជូនអ្នកដំណើរ ម្ចាស់ក្រុមហ៊ុន ម្ចាស់យានយន្តធ្វើអាជីវកម្មដឹកជញ្ជូនអ្នកដំណើរ អ្នកបើកបរ និងអ្នកបម្រើភ្ញៀវលើរថយន្តដឹកអ្នកដំណើរ ព្រមទាំងប្រជាពលរដ្ឋ អនុវត្តឱ្យបានខ្ជាប់ខ្ជួនទៅតាមគោលការណ៍ណែនាំនិងវិធានការការពារខ្លួនពីជំងឺកូវីដ១៩។
ក្រសួងបានបន្តថា វិធានការទាំងនោះ រួមមាន ត្រូវចៀសវាងប្រើប្រាស់មធ្យោបាយសាធារណៈដែលមានផ្ទុកមនុស្សច្រើន ប៉ុន្តែបើករណីចាំបាច់ធ្វើដំណើរតាមមធ្យោបាយសាធារណៈ ត្រូវពាក់ម៉ាក់ជានិច្ច និងត្រូវរក្សាគម្លាតសុវត្ថិភាព ព្រមទាំងត្រូវមានទឹកអាល់កុលឬជែលលាងដៃ។
ក្រសួងបញ្ជាក់ថា៖ «ចៀសវាងការធ្វើដំណើរប្រសិនបើមានអាការក្តៅខ្លួន ក្អក ឬពិបាកដកដង្ហើម ឬមានបញ្ហាសុខភាព»។
ក្រសួងក៏បានណែនាំដល់អ្នកបើកបរ ត្រូវសម្អាតយានយន្តរបស់ខ្លួនជាប្រចាំ ឱ្យអ្នកដំណើរពាក់ម៉ាស់ បើកបង្អួចរថយន្ត និងត្រូវមានទឹកអាល់កុលឬជែលឱ្យអ្នកដំណើរ ហើយបើមានរោគសញ្ញាគ្រុនផ្តាសាយ ក្តៅខ្លួន ឈឺបំពង់ក ពិបាកដកដង្ហើម ជាដើម ត្រូវផ្អាកការបើកបរជាបណ្តោះអាសន្ននិងត្រូវទៅមន្ទីរពេទ្យដើម្បីពិនិត្យសុខភាព។
តាមប្រតិទិន នៅថ្ងៃទី២៩ ខែតុលានេះ ជាថ្ងៃព្រះរាជពិធីគ្រងព្រះបរមរាជសម្បត្តិ ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងថ្ងៃទី៣០ ខែតុលា ដល់ថ្ងៃទី០១ ខែវិច្ឆិកា ជាថ្ងៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក៕