អាជ្ញាធរខណ្ឌពោធិ៍សែនជ័យ ដាក់ឱសានវាទរយៈពេល១០ថ្ងៃ ឱ្យប្រជាពលរដ្ឋរស់នៅក្នុងទីតាំងបុរីពិភពថ្មីត្រពាំងថ្លឹង ខណ្ឌពោធិ៍សែនជ័យ រុះរើសំយ៉ាបផ្ទះនិងសំណង់ផ្សេងៗដែលសង់រំលោភលើប្រព័ន្ធលូបង្ហូរទឹកនិងចិញ្ចើមផ្លូវសាធារណៈ។
សេចក្តីជូនដំណឹងរបស់រដ្ឋបាលខណ្ឌពោធិ៍សែនជ័យ ចុះថ្ងៃទី២៨ ខែតុលា ឆ្នាំ២០២០ បានលើកឡើងថា កន្លងមក មានប្រជាពលរដ្ឋនិងអាជីវករមួយចំនួនបានសាងសង់សំយ៉ាបផ្ទះនិងសំណង់ផ្សេងៗ រំលោភលើប្រព័ន្ធលូបង្ហូរទឹកនិងចិញ្ចើមផ្លូវសាធារណៈ ស្ថិតនៅទីតាំងបុរីពិភពថ្មី(ត្រពាំងថ្លឹង) សង្កាត់ចោមចៅទី១ ខណ្ឌពោធិ៍សែនជ័យ បណ្តាលឱ្យមានការកកស្ទះចរន្តទឹកនិងប៉ះពាល់ដល់សោភ័ណភាពសុវត្ថិភាពសាធារណៈ។
ករណីនេះ រដ្ឋបាលខណ្ឌ បានស្នើដល់ប្រជាពលរដ្ឋនិងអាជីវករដែលមានលំនៅដ្ឋាន សំយ៉ាបផ្ទះ របង ការដាក់តាំងស្លាកយីហោ ប៉ាណូខុសច្បាប់ និងសំណង់ផ្សេងៗ ដែលបានសាងសង់រំលោភលើប្រព័ន្ធលូបង្ហូរទឹកនិងចិញ្ចើមផ្លូវសាធារណៈ ត្រូវរុះរើចេញឱ្យផុតក្នុងរយៈពេល១០ថ្ងៃ ដោយគិតចាប់ពីថ្ងៃជូនដំណឹងនេះតទៅ៕
