គណៈកម្មាធិការជាតិសុវត្ថិភាពចរាចរណ៍ផ្លូវគោក អំពាវនាវដល់អ្នកប្រើប្រាស់ផ្លូវ ឱ្យគោរពច្បាប់ចរាចរណ៍និងបើកបរដោយការប្រុងប្រយ័ត្ន ដើម្បីចូលរួមកាត់បន្ថយអត្រាគ្រោះថ្នាក់ចរាចរណ៍ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។
ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ប្រព្រឹត្តទៅចាប់ពីថ្ងៃទី៣០ ខែតុលា ដល់ថ្ងៃទី០១ ខែវិច្ឆិកា ដែលអំឡុងពេលនេះ មានប្រជាពលរដ្ឋមួយចំនួនបានធ្វើដំណើរទៅស្រុកកំណើតនិងទៅកម្សាន្តនៅតំបន់ទេសចរណ៍នានាក្នុងប្រទេស។
សេចក្តីអំពាវនាវរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ចុះថ្ងៃទី២៨ ខែតុលា ឆ្នាំ២០២០ បានក្រើនរំឭកដល់អ្នកប្រើប្រាស់ផ្លូវ ត្រូវគោរពច្បាប់ចរាចរណ៍ ដោយមិនត្រូវបើកបរលើសល្បឿនកំណត់ មិនត្រូវបើកបរក្រោមឥទ្ធិពលគ្រឿងស្រវឹងនិងងងុយគេង មិនត្រូវបត់ឬវ៉ាជែងក្នុងភាពប្រថុយប្រថានឬប្រើប្រាស់ទូរសព្ទ និងមិនត្រូវផ្ទុកអ្នកដំណើរឬទំនិញលើសច្បាប់កំណត់។
គណៈកម្មាធិការជាតិ ក៏បានណែនាំដល់អ្នកប្រើប្រាស់ផ្លូវ ត្រូវពាក់មួកសុវត្ថិភាពឬខ្សែក្រវាត់សុវត្ថិភាព គោរពសិទ្ធិអាទិភាព គោរពសញ្ញាចរាចរណ៍ និងប្រកាន់ស្តាំជានិច្ច ជាពិសេសត្រូវត្រួតពិនិត្យលក្ខណៈបច្ចេកទេសយានយន្ត និងបើកបរក្នុងស្មារតីប្រុងប្រយ័ត្ន។
បើតាមគណៈកម្មាធិការជាតិសុវត្ថិភាពចរាចរណ៍ផ្លូវគោក ក្នុងរយៈពេល៩ខែឆ្នាំ២០២០នេះ អត្រាគ្រោះថ្នាក់ចរាចរណ៍ផ្លូវគោក មានការថយចុះ២៣% អ្នកស្លាប់ថយ១៧% និងរបួសថយ ២២% បើធៀបនឹងរយៈពេលដូចគ្នា កាលពីឆ្នាំមុន។ គណៈកម្មាធិការជាតិ បន្តថា ភាគច្រើននៃជនរងគ្រោះចំនួន៧៣% ជាអ្នកជិះទោចក្រយានយន្តមិនពាក់មួកសុវត្ថិភាព៕
