អាជ្ញាធរខណ្ឌពោធិ៍សែនជ័យ អះអាងថា មានផ្ទះប្រមាណ១ ៤០០ល្វែង ក្នុងបុរីពិភពថ្មី២ ភូមិត្រពាំងថ្លឹង សង្កាត់ចោមចៅទី១ បានសង់សំណង់បន្ថែមរំលោភលើប្រព័ន្ធលូនិងចិញ្ចើមផ្លូវសាធារណៈ ដែលតម្រូវឱ្យម្ចាស់ផ្ទះធ្វើការរុះរើចេញជាបន្ទាន់ក្នុងរយៈពេល១០ថ្ងៃ រាប់ចាប់ពីថ្ងៃជូនដំណឹង។
ក្នុងសេចក្តីជូនដំណឹងរបស់រដ្ឋបាលខណ្ឌពោធិ៍សែនជ័យ ចុះថ្ងៃទី២៨ ខែតុលា ឆ្នាំ២០២០ លើកឡើងថា ពលរដ្ឋនិងអាជីវករមួយចំនួនបានសង់របងផ្ទះនិងសំណង់ផ្សេងៗដោយខុសច្បាប់ បង្កឱ្យមានការកកស្ទះចរន្តបង្ហូរទឹក និងប៉ះពាល់សោភ័ណភាពសុវត្ថិភាពសាធារណៈ។
មន្រ្តីជំនាញផ្នែកទំនាក់ទំនងសំណង់នៃរដ្ឋបាលខណ្ឌពោធិ៍សែនជ័យ លោក ហុក សុទិត្យា ប្រាប់ វីអូឌី ឱ្យដឹងនៅថ្ងៃចន្ទនេះថា ក្នុងបុរីពិភពថ្មីត្រពាំងថ្លឹង មានផ្ទះល្វែងប្រមាណជាង២ពាន់ផ្ទះ ក្នុងនោះមានជិត៧០ភាគរយ ឬស្មើប្រមាណ១ ៤០០ខ្នង សង់សំណង់បន្ថែមដោយខុសច្បាប់ ក្នុងនោះផ្ទះ៤០ភាគរយដែលភាគច្រើនជាផ្ទះកែង សង់ប៉ះលើគម្របរ៉ឺហ្គែលូ (ថ្នក់លូសម្រាប់ស្ទាក់សំរាម) ដែលនាំឱ្យអាជ្ញាធរពិបាកដំណើរការស្តារប្រព័ន្ធបង្ហូរទឹកចូលប្រឡាយ។
លោក សុទិត្យា ប្រាប់ថា៖ «ឥលូវនេះ យើងកាយអស់ហើយនៅខាងមុខប្រឡាយទាំងអស់។ នៅពេលខ្លះវានៅយឺត អ៊ីចឹងមិនចង់ឱ្យបងប្អូនប្រជាពលរដ្ឋទៅឆ្នាំក្រោយទៀត គាត់មានការជន់លិចទៀត អ៊ីចឹងសុំឱ្យគាត់ [រុះរើសំណង់ចេញ] សុំពីមុខរ៉ឺហ្គែលូ ដើម្បីឱ្យងាយស្រួលដល់អាជ្ញាធរយើងសម្រាប់ចុះទៅស្តារ»។
អភិបាលខណ្ឌពោធិ៍សែនជ័យ លោក ហែម ដារិទ្ធ លើកឡើងថា បច្ចុប្បន្ន មានប្រជាពលរដ្ឋប្រមាណ២០ភាគរយហើយកំពុងធ្វើការរុះរើតាមសេចក្តីជូនដំណឹងរបស់អាជ្ញាធរ ហើយមានមួយចំនួនបានស្នើសុំពន្យារពេល ដោយសំណង់របស់ពួកគាត់មានជាប់កុងត្រាជួល។ ទោះយ៉ាងណា លោកថា ការស្នើសុំពន្យារពេលត្រូវឆ្លងកាត់ការពិភាក្សានិងចុះកិច្ចសន្យាជាមុន បើមិនដូច្នេះទេ អាជ្ញាធរនឹងចាត់វិធានការទៅតាមការជូនដំណឹង។
លោកមានប្រសាសន៍ថា៖ «ការងារចំពោះមុខរបស់យើង សំខាន់បំផុតគឺការកាយនិងពង្រីកប្រឡាយ និងបើករ៉ឺហ្គែ ដើម្បីធ្វើយ៉ាងម៉េចឱ្យចរន្តទឹកហូរបានខ្លាំង។ ការងាររុះរើពាក់ព័ន្ធកន្លែងណាចាំបាច់យើងត្រូវតែធ្វើ កន្លែងណាមិនទាន់ចាំបាច់ គឺយើងពន្យារពេលឱ្យគាត់បាន»។
លោក ស៊ិន វុត្ថា អាយុ៤៧ឆ្នាំ ជាម្ចាស់ផ្ទះលក់គ្រឿងទេសនិងដូរលុយក្នុងបុរីពិភពថ្មីត្រពាំងថ្លឹង បានលើកឡើងថា ចំណែកសំណង់នៅមុខផ្ទះរបស់លោក បានសង់ឡើងតាំងពីមុនការពង្រីកផ្លូវមកម៉្លេះ តែយ៉ាងណា លោកនៅតែយល់ព្រមតាមអាជ្ញាធរ បើទោះជាកន្លែងប្រកបអាជីវកម្មរបស់លោកត្រូវរួមតូច។
លោកនិយាយថា៖ «កន្លែងដែលខ្ញុំធ្វើហ្នឹង វាអត់មានលូឆ្លងពីខាងក្រោមទេ។ តែខ្ញុំយល់ឃើញថា បើសិនជាយើងរវល់តែតវ៉ាច្រើនពេក វាខាតការងារ ខាតពេលវេលា យើងរកស៊ីដដែលៗ ហើយយើងត្រូវតែរុះហើយ បើតាមផ្លូវច្បាប់ ម្ចាស់ផ្ទះយើងដឹងខ្លួន យើងត្រូវតែរុះហើយ»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ គាំទ្រចំពោះវិធានការរបស់អាជ្ញាធរ ដោយលោកមើលឃើញថា ពលរដ្ឋក្នុងបុរីបានសាងសង់សំយ៉ាប របងផ្ទះ និងសំណង់រឹងមាំផ្សេងៗទៀតជាបន្តបន្ទាប់ជាច្រើនឆ្នាំមកហើយ ហើយខ្លះថែមទាំងមិនស្តាប់ការណែនាំរបស់អាជ្ញាធរដែនដី ដោយសម្អាងថា ខ្លួនមានខ្នងបង្អែកធំទៀតផង។
លោក សន ជ័យ មានប្រសាសន៍ថា៖ «គឺជាឥរិយាបថខុសឆ្គងដែលពលរដ្ឋដែលបានប្រព្រឹត្តត្រូវតែទទួលស្គាល់ថា វាជារឿងមិនត្រឹមត្រូវ។ មិនត្រឹមត្រូវតាមផ្លូវច្បាប់ផង មិនត្រឹមត្រូវតាមផ្លូវសីលធម៌សង្គមផង។ ហើយពួកគេចេះតែនាំគ្នាយោគយល់ ប៉ុន្តែខ្លួនឯងហ្នឹង ពួកគេខ្លះហ្នឹងមិនបានយោគយល់ទៅដល់ប្រយោជន៍រួមទេ»។
កាលពីអំឡុងខែតុលា ឆ្នាំ២០២០នេះ រាជធានី-ខេត្តចំនួន២០ បានជួបប្រទះនូវជំនន់ទឹកភ្លៀង ដែលធ្វើឱ្យលំនៅឋានប្រជាពលរដ្ឋរាប់ពាន់ខ្នងបានរងការជន់លិច ក្នុងនោះនៅរាជធានីភ្នំពេញ ផ្ទះប្រជាពលរដ្ឋជាច្រើនខ្នងនៅក្នុងបុរីមួយចំនួនក្នុងខណ្ឌពោធិ៍សែនជ័យ និងខណ្ឌដង្កោ រាជធានីភ្នំពេញ បានជន់លិចខ្លាំងផងដែរ៕
