មជ្ឈមណ្ឌលសិទ្ធិមនុស្សកម្ពុជា អំពាវនាវដល់រដ្ឋាភិបាលកម្ពុជា ដោះលែងអ្នកសារព័ត៌មាននិងអ្នកការពារសិទ្ធិមនុស្សទាំងអស់ ដែលពួកគេត្រូវបានចាប់ខ្លួនឬកាត់ទោសដោយសារការប្រើប្រាស់នូវសិទ្ធិមូលដ្ឋានរបស់ពួកគេចំពោះសេរីភាពនៃការបញ្ចេញមតិ។
ការអំពាវនាវនេះ បានធ្វើឡើងស្របពេលទិវាអន្តរជាតិដើម្បីបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន ថ្ងៃទី២ ខែវិច្ឆិកា ឆ្នាំ២០២០។
សេចក្តីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា (ម.ស.ម.ក) កាលពីថ្ងៃអាទិត្យម្សិលមិញ បានលើកឡើងថា ចាប់តាំងពីឆ្នាំ១៩៩៤ យ៉ាងហោចណាស់មានអ្នកសារព័ត៌មានចំនួន១៣នាក់ ត្រូវបានសម្លាប់អំឡុងពេលបំពេញការងាររបស់ពួកគេ។
ម.ស.ម.ក បន្តថា ការស្លាប់របស់អ្នកសារព័ត៌មានចំនួន១២នាក់ កើតឡើងក្នុងខណៈដែលពួកគេធ្វើសេចក្តីរាយការណ៍ព័ត៌មាន ដែលបង្កហានិភ័យដោយផ្ទាល់ដល់បុគ្គលមានអំណាចនៅកម្ពុជា។
ម.ស.ម.ក បន្ថែមថា ទោះបីក្នុងរយៈពេល៤ឆ្នាំមកនេះ មិនមានករណីឃាតកម្មក្រៅប្រព័ន្ធតុលាការទៅលើអ្នកសារព័ត៌មានឬអ្នកការពារសិទ្ធិមនុស្សក៏ដោយ តែក្នុងឆ្នាំ២០២០នេះ មានអ្នកសារព័ត៌មានម្នាក់បានស្លាប់ដែលបណ្តាលឱ្យមានការសង្ស័យថា ជាឃាតកម្មក្រៅប្រព័ន្ធតុលាការ ហើយករណីនេះ មិនមានការស៊ើបអង្កេតបន្តទៀតទេ ដោយសារតែអាជ្ញាធរសន្មតថាជាករណីគ្រោះថ្នាក់ចរាចរណ៍។
ម.ស.ម.ក បានអំពាវនាវថា៖ «សូមអំពាវនាវឱ្យរដ្ឋាភិបាលកម្ពុជា ចាត់វិធានការជាក់លាក់ជាបន្ទាន់ ដើម្បីធានាឱ្យមានការស៊ើបអង្កេតឱ្យបានម៉ត់ចត់ ឯករាជ្យ និងតម្លាភាពទៅលើករណីឧក្រិដ្ឋកម្មទាំងអស់ដែលប្រឆាំងនឹងអ្នកសារព័ត៌មាននិងអ្នកការពារសិទ្ធិមនុស្ស»។
សេចក្តីថ្លែងការណ៍របស់ ម.ស.ម.ក បានលើកឡើងដែរថា ថ្មីៗនេះ ប្រព័ន្ធផ្សព្វផ្សាយឯករាជ្យដែលត្រូវបានគេយល់ថាបានរិះគន់រដ្ឋាភិបាល ត្រូវបានបង្ខំឱ្យបិទការិយាល័យ ខណៈអ្នកសារព័ត៌មានតែងត្រូវបានដៅមុខសញ្ញាទុកតាមរយៈការប្រើប្រាស់អំពើហិង្សាឬការយាយីតាមប្រព័ន្ធតុលាការជាដើម ដែលធ្វើឱ្យសេរីភាពសារព័ត៌មានកំពុងស្ថិតនៅក្រោមការគំរាមកំហែងនៅកម្ពុជា។
ម.ស.ម.ក បានអំពាវនាវបន្ថែមថា៖ «សូមអំពាវនាវឱ្យរាជរដ្ឋាភិបាលកម្ពុជា ដោះលែងអ្នកសារព័ត៌មាននិងអ្នកការពារសិទ្ធិមនុស្សទាំងអស់ដោយឥតលក្ខខណ្ឌ ដែលពួកគេត្រូវបានចាប់ខ្លួនឬកាត់ទោសដោយសារការប្រើប្រាស់នូវសិទ្ធិមូលដ្ឋានរបស់ពួកគេចំពោះសេរីភាពនៃការបញ្ចេញមតិ»។
