អតីតប្រធានគណបក្សសង្គ្រោះជាតិដែលតុលាការរំលាយ លោក កឹម សុខា អះអាងថា ប្រទេសប្រជាធិបតេយ្យដែលលើកស្ទួយគុណតម្លៃសិទ្ធិមនុស្ស បានបង្ហាញកង្វល់ចំពោះស្ថានភាពសិទ្ធិសេរីភាពនិងសុវត្ថិភាពរបស់លោក ខណៈដែលលោកកំពុងស្ថិតក្រោមការឃ្លាំមើលនិងជាប់បម្រាមតុលាការ។
លោក កឹម សុខា បានលើកឡើងក្នុងបណ្តាញសង្គមហ្វេសប៊ុករបស់លោក កាលពីថ្ងៃព្រហស្បតិ៍សប្តាហ៍មុនថា ទោះបីលោកទទួលរងការចោទប្រកាន់មួលបង្កាច់និងការប្រមាថលាបពណ៌ ប៉ុន្តែក៏នៅមានប្រជាពលរដ្ឋនិងបណ្តាប្រទេសប្រជាធិបតេយ្យមួយចំនួន បានបង្ហាញពីការយកចិត្តទុកដាក់ចំពោះសិទ្ធិសេរីភាពនិងសុវត្ថិភាព រួមនឹងសុខភាពរបស់លោកផងដែរ។
លោកបានបញ្ជាក់ថា៖ «ប្រទេសជាមិត្តដែលប្រកាន់យកនូវគោលការណ៍ប្រជាធិបតេយ្យ លើកស្ទួយគុណតម្លៃសិទ្ធិមនុស្ស ដែលនៅតែគោរពផ្តល់តម្លៃដល់ខ្ញុំ ដោយឱ្យមន្ត្រីទូតដែលជាតំណាងប្រទេសរបស់ខ្លួនមកជួបខ្ញុំដល់គេហដ្ឋាន និងអញ្ជើញខ្ញុំទៅស្ថានទូត ដើម្បីសួរសុខទុក្ខ ទទួលទានអាហារ សម្តែងពីកង្វល់ចំពោះស្ថានភាពសិទ្ធិសេរីភាព សុវត្ថិភាពរបស់ខ្ញុំ និងបញ្ជូនវេជ្ជបណ្ឌិតមកជួយពិនិត្យព្យាបាលនិងតាមដានសុខភាពខ្ញុំជាប្រចាំផងដែរ»។
សហមេធាវីលោក កឹម សុខា គឺលោក ចាន់ ចេន ឱ្យដឹងបន្ថែមនៅថ្ងៃចន្ទនេះតាមបណ្តាញសង្គម WhatsApp ថា មន្ត្រីជាន់ខ្ពស់ទូតប្រចាំប្រទេសដែលទៅជួបសួរសុខទុក្ខ និងបញ្ជូនវេជ្ជបណ្ឌិតឱ្យតាមដានសុខភាពកូនក្តីរបស់លោកជាប្រចាំនោះ ជាប្រទេសប្រជាធិបតេយ្យនៅទ្វីបអឺរ៉ុប អាមេរិក និងប្រទេសតំបន់អាស៊ី រួមមាន សហរដ្ឋអាមេរិក បារាំង អាល្លឺម៉ង់ ស្វីស ស៊ុយអែត អូស្ត្រាលី ញូហ្សឺលែន និងជប៉ុន រួមនឹងអង្គការមួយចំនួនទៀត។
លោក កឹម សុខា បានបាត់សិទ្ធិធ្វើនយោបាយជាង៣ឆ្នាំមកហើយ គិតចាប់ពីថ្ងៃដែលសមត្ថកិច្ចឆ្មក់ចូលចាប់ខ្លួនតាមបណ្តឹងរបស់រដ្ឋាភិបាល ដែលចោទថា ឃុបឃិតជាមួយបរទេសចង់ផ្តួលរំលំរដ្ឋាភិបាល៕
