រដ្ឋាភិបាលសហរដ្ឋអាមេរិក បានផ្តល់ជំនួយជាស្បៀងអាហារដល់ប្រជាពលរដ្ឋដែលរងគ្រោះដោយសារជំនន់ទឹកភ្លៀង ជាង២ ៥០០គ្រួសារ នៅខេត្តពោធិ៍សាត់។
ការផ្តល់ជំនួយនេះ ធ្វើឡើងក្រោមការគាំទ្រថវិកាពីទីភ្នាក់ងារជំនួយអាមេរិក USAID និងត្រូវបានចែកចាយតាមរយៈកម្មវិធីស្បៀងអាហារពិភពលោក (WFP) នៃអង្គការសហប្រជាជាតិ។
យោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជា នៅថ្ងៃទី០២ ខែវិច្ឆិកា ឆ្នាំ២០២០នេះ បានលើកឡើងថា ប្រទេសកម្ពុជាកំពុងទទួលរងគ្រោះទឹកជំនន់ខ្លាំងបំផុត ក្នុងរយៈពេល២០ឆ្នាំមកនេះ ពិសេសនៅតាមតំបន់ដែលមិនបានត្រៀមចំពោះទឹកជំនន់ដ៏គំហុកនេះ។
សេចក្តីប្រកាសព័ត៌មានដដែល បន្តថា អង្គការ WFP បានចែកជំនួយស្បៀងអាហារកាលពីថ្ងៃទី២៨ ខែតុលា ទៅដល់គ្រួសាររងគ្រោះធ្ងន់ធ្ងរដោយទឹកជំនន់ចំនួន២ ៥៦០គ្រួសារ នៅក្នុងក្រុង-ស្រុកចំនួន៣ រួមមាន ក្រុងពោធិ៍សាត់ ស្រុកបាកាន និងស្រុកភ្នំក្រវាញ នៃខេត្តពោធិ៍សាត់។
សេចក្តីប្រកាសព័ត៌មានបន្ថែមថា គ្រួសារទាំងនោះត្រូវបានជ្រើសរើសដោយឆ្លងតាមការសម្របសម្រួលជាមួយអាជ្ញាធរខេត្ត ស្រុក និងឃុំ។ អង្គការ WFP បានផ្តល់អាទិភាពទៅលើគ្រួសារដែលស្ថិតក្នុងស្ថានភាពងាយរងគ្រោះ ដោយរួមទាំងគ្រួសារដែលត្រូវបានចុះបញ្ជីនៃកម្មវិធីជំនួយសម្រាប់ភាពក្រីក្ររបស់រដ្ឋាភិបាលនិងគ្រួសារដែលមានស្រ្តីជាមេគ្រួសារ ខណៈទឹកជំនន់បានធ្វើឱ្យចំណូល និងស្បៀងនៅសល់ក្នុងគ្រួសារពួកគេដែលមានតិចស្រាប់នោះ កាន់តែមានចំនួនតិចទៅៗ។
បើតាមសេចក្តីប្រកាសព័ត៌មាន ទីភ្នាក់ងារជំនួយអាមេរិក USAID បានផ្តល់ថវិកាចំនួនជាង៧លានដុល្លារ សម្រាប់ការឆ្លើយតប ការត្រៀមរៀបចំសម្រាប់គ្រោះមហន្តរាយ និងការកាត់បន្ថយហានិភ័យនៅកម្ពុជា គិតតាំងពីឆ្នាំ២០០០មក។
តាមរយៈគម្រោងស្តីពីភាពជាដៃគូរវាងសហរដ្ឋអាមេរិកនិងតំបន់ទន្លេមេគង្គ សហរដ្ឋអាមេរិកថែមទាំងកំពុងតែពង្រឹងលក្ខណៈសម្រាប់ការឆ្លើយតបនិងការត្រៀមរៀបចំសម្រាប់គ្រោះមហន្តរាយនៅក្នុងមូលដ្ឋាន នៅទូទាំងប្រទេសទាំង៥ក្នុងតំបន់ទន្លេមេគង្គក្រោម ក្នុងនោះក៏មានប្រទេសកម្ពុជាផងដែរ៕