រដ្ឋាភិបាលបានសម្រេចអនុញ្ញាតឱ្យចុះបញ្ជីកម្មករក្រៅប្រព័ន្ធ ដើម្បីទទួលបានការធានារ៉ាប់រងសុខភាពនិងអត្ថប្រយោជន៍ផ្សេងទៀតដែលផ្ដល់ជូនដោយរដ្ឋ។
ក្នុងសេចក្ដីណែនាំរបស់ខ្លួនកាលពីថ្ងៃម្សិលមិញនេះ ក្រសួងការងារ និងបណ្ដុះបណ្ដាលវិជ្ជាជីវៈ បានជូនដំណឹងទៅសមាគមនិងអង្គការវិជ្ជាជីវៈនានាដែលគ្រប់គ្រងលើសមាជិករបស់ខ្លួនជាកម្មករក្រៅប្រព័ន្ធ អំពីរបៀបចុះឈ្មោះដើម្បីទទួលបានបណ្ណសមធម៌ចេញដោយបេឡាជាតិសន្តិសុខសង្គម (ប.ស.ស)។
ក្រៅពីទទួលបានការព្យាបាលដោយមិនគិតកម្រៃហើយនោះ ក្រសួងអះអាងថា ស្ត្រីដែលជាកម្មករក្រៅប្រព័ន្ធ ក៏ទទួលបានការផ្ដល់ប្រាក់ឧបត្ថម្ភបន្ថែមនៅពេលពួកគាត់សម្រាលកូន។
ក្រសួងការងារបញ្ជាក់ថា សមាគមដែលមានអាជ្ញាបណ្ណទទួលស្គាល់ពីក្រសួងមហាផ្ទៃ ហើយអង្គការវិជ្ជាជីវៈដែលមានវិញ្ញាបនបត្រចុះបញ្ជីអង្គការវិជ្ជាជីវៈចេញពីក្រសួងការងារ អាចចុះឈ្មោះកម្មករនិយោជិតរបស់ខ្លួនក្នុងបេឡាជាតិសន្តិសុខសង្គម។
ក្រៅពីទទួលស្គាល់ពីក្រសួងមហាផ្ទៃនិងក្រសួងការងារនោះ កម្មករនិយោជិតក្រៅប្រព័ន្ធដែលជាសមាជិកសមាគមនិងអង្គការវិជ្ជាជីវៈ ត្រូវមានអត្តសញ្ញាណបណ្ណសញ្ជាតិខ្មែរនិងលិខិតបញ្ជាក់អំពីមុខរបរ រួមទាំងទីលំនៅបច្ចុប្បន្នដែលចេញដោយអាជ្ញាធររាជធានី-ខេត្តផងដែរ។
វីអូឌីបានព្យាយាមសុំការអត្ថាធិប្បាយបន្ថែមពីអ្នកនាំពាក្យក្រសួងការងារ លោក ហេង សួរ ជុំវិញចំនួនកម្មករក្រៅប្រព័ន្ធដែលបានចុះបញ្ជីនៅបេឡាជាតិសន្តិសុខ ប៉ុន្តែគិតមកដល់ពេលនេះ លោកមិនទាន់ឆ្លើយតបនៅឡើយ។
អគ្គលេខាធិការសហព័ន្ធសហជីពកម្មករសំណង់ និងព្រៃឈើកម្ពុជា លោក យ៉ាន់ ធី សាទរចំពោះសេចក្ដីណែនាំរបស់ក្រសួង ប៉ុន្តែលោកស្នើឱ្យក្រសួងបញ្ជាក់ចំណុចដែលក្រសួងតម្រូវឱ្យកម្មករនិយោជិតក្រៅប្រព័ន្ធបញ្ជាក់អំពីមុខរបរនិងលំនៅឋានបច្ចុប្បន្នដែលចេញដោយអាជ្ញាធររាជធានី-ខេត្តឱ្យបានច្បាស់។
លោក យ៉ាន់ ធី ប្រាប់ថា៖ «បើសិនជាឱ្យគាត់ទៅបញ្ជាក់នៅខេត្តទៀត អាហ្នឹងយើងអាស្រ័យលើការសាកសួររបស់កម្មករថា តើគាត់អាចទៅបញ្ជាក់ពីភូមិឃុំគាត់បានទៀតអត់? មួយទៀតខ្ញុំបារម្ភថា ក្រសួងការងារគាត់ចេញសេចក្ដីជូនដំណឹងមក ខាងយើងសមាគម អង្គការ ក្រុមហ៊ុន យើងទទួលយកបាន ប៉ុន្តែអាជ្ញាធរមូលដ្ឋានគាត់ទទួលបានអត់? ហើយអាជ្ញាធរមូលដ្ឋានគាត់មានទម្រង់និងបែបបទសម្រាប់លិខិតបញ្ជាក់ ហើយគាត់សហការធ្វើឱ្យកម្មករអត់? អាហ្នឹងរឿងមួយទៀត ព្រួយបារម្ភដែរ»។
លោក យ៉ាន់ ធី បានឱ្យដឹងថា សហព័ន្ធសហជីពរបស់លោកមានសមាជិកជិត១ម៉ឺននាក់ (៩ ៨៩៧) ក្នុងនោះស្ត្រីចំនួន៣ ៦៤៦នាក់ ហើយអ្នកដែលបានចុះក្នុងបេឡាសន្តិសុខសង្គមរួចហើយ មានប្រហែល២ ០០០នាក់ ខណៈសមាជិកប្រហែល៨ ០០០នាក់ទៀត លោកថា កំពុងប្រមូលឯកសារដើម្បីធ្វើការចុះក្នុងបេឡាជាតិសន្តិសុខសង្គម។
លោក ជឹម វី អាយុ៥២ឆ្នាំ ដែលជាកម្មករវាយពុម្ពនៅការដ្ឋានសាងសង់មួយកន្លែង ស្ថិតនៅក្នុងសង្កាត់ព្រែកឯង ក្នុងខណ្ឌច្បារអំពៅ ប្រាប់វីអូឌីថា រូបគាត់និងប្រពន្ធចង់បានបេឡាសន្តិសុខសង្គម ហើយបានចុះឈ្មោះជាកម្មករក្រៅប្រព័ន្ធរួចរាល់ហើយ។ កម្មករដែលមានប្រភពកំណើតមកខេត្តកំពង់ចាមរូបនេះ សង្ឃឹមថា នឹងអាចទទួលបានការព្យាបាលឥតគិតថ្លៃនៅពេលដែលគាត់មានគ្រោះថ្នាក់ ដើម្បីកាត់បន្ថយការចំណាយជាដើម។
លោក ជឹម វី ប្រាប់ថា៖ «អ៊ីចឹងបានខ្ញុំប្រឹងចូលជាសមាជិកដែរ ព្រោះចង់បាន [បេឡាសន្តិសុខសង្គម]។ អាហ្នឹង គ្រាន់តែវាអត់ទាន់បាន។ ខ្ញុំចង់ឱ្យកម្មករសំណង់ទាំងអស់គ្នាបានអាហ្នឹង[បេឡាសន្តិសុខសង្គម] ព្រោះធូរ។ គ្រោះថ្នាក់អី យើងមើលមិនឃើញទេ ហើយកាត់បន្ថយលុយខ្លះដល់ពេលយើងមានគ្រោះថ្នាក់ដេកពេទ្យដេកអីហ្នឹង»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ហៅកាត់ថា IDEA លោក វន់ ពៅ ស្វាគមន៍សេចក្ដីណែនាំក្រសួង ប៉ុន្តែលោកថា កម្មករក្រៅប្រព័ន្ធអាចប្រឈមមុខនឹងការលំបាកក្នុងការស្វែងរកការបញ្ជាក់ពីអាជ្ញាធរមូលដ្ឋានសម្រាប់ដំណើរការចុះបញ្ជីនេះ។
លោក វន់ ពៅ ប្រាប់ថា៖ «វាជាឧបសគ្គមួយដែលស្រុកយើងមិនទាន់មានក្រសួងឬស្ថាប័នណាបញ្ជាក់អ្នកធ្វើការទាំងអស់ហ្នឹង ត្រូវបញ្ជាក់ពីបណ្ណមុខរបរឱ្យគាត់ទេ អ៊ីចឹងហើយនេះជាការលំបាកចុះបញ្ជី បើសិនតម្រូវអ៊ីចឹងមែន។ មួយទៀត ទាក់ទងកម្មករក្រៅប្រព័ន្ធគាត់មកពីខេត្ត ចំណាកស្រុកមកទីប្រជុំជន អ៊ីចឹងយើងមិនដឹងថា ពេលចុះបញ្ជីទៅ អជ្ញាធរអាចសម្រួលបញ្ជាក់ធ្វើលិខិតស្នាក់នៅឱ្យគាត់បានអត់។ ដូចអ្នកអេតចាយ អ្នកប្រកបរបរមួយចំនួនគាត់ជួលតែផ្ទះគេ អ៊ីចឹងតើគេបញ្ជាក់ឱ្យអត់?»។
វីអូឌីបានស្វែងរកការបកស្រាយបន្ថែមពីអ្នកនាំពាក្យបេឡាជាតិសន្តិសុខសង្គម លោក ជាវ ប៊ុនរិទ្ធ ដែរ ប៉ុន្តែអ្នកទទួលទូរសព្ទប្រាប់ថា លោកបានទុកទូរសព្ទនៅផ្ទះហើយចាកចេញទៅហាត់ប្រាណហើយ។
លោក វន់ ពៅ បន្តថា បច្ចុប្បន្ន សមាគមលោកមានសមាជិកប្រហែល១៥ ០០០នាក់ ក្នុងនោះកម្មករផ្នែកដឹកជញ្ជូនមានចំនួនប្រហែល៤ ០០០នាក់ បានទទួលបណ្ណ ប.ស.ស រួចហើយ។
លោកបញ្ជាក់ថា ក្រោយពីក្រសួងចេញសេចក្ដីណែនាំនេះ លោកនឹងប្រមូលកម្មករក្រៅប្រព័ន្ធជាច្រើនពាន់នាក់ទៀតឱ្យធ្វើការចុះបញ្ជីក្នុងបេឡាសន្តិសុខសង្គម ដើម្បីទទួលបានបណ្ណមូលនិធិសមធម៌សុខាភិបាល។
លោក វន់ ពៅ និយាយបន្ថែមថា៖ «បណ្ណសមធម៌ចុះបេឡាសន្តិសុខសង្គមមែន ប៉ុន្តែមិនទទួលបានអត្ថប្រយោជន៍ដូច ប.ស.ស បង់លុយទេ គឺអត្ថប្រយោជន៍វាបានសម្រាកព្យាបាលនៅមន្ទីរពេទ្យរដ្ឋទេ។ យើងទៅពេទ្យរដ្ឋ អត់បង់លុយទេ ព្យាបាលជំងឺអី ស្ត្រីឆ្លង[ឆ្លងទន្លេ]អត់អស់លុយទេ ហើយគេបើកលុយឱ្យ៤០ម៉ឺនរៀលទៀត តែអាហ្នឹងសម្រាប់តែមន្ទីរពេទ្យរដ្ឋទេ»៕