ក្រសួងមហាផ្ទៃ ស្នើក្រសួងធម្មការ និងសាសនា បញ្ឈប់ការចុះបញ្ជីសមាគមនិងអង្គការមិនមែនរដ្ឋាភិបាលក្នុងស្រុកគ្រប់ប្រភេទ ខណៈការងារចុះបញ្ជីនេះស្ថិតក្រោមការគ្រប់គ្រងរបស់ក្រសួងមហាផ្ទៃ។
យោងតាមលិខិតរបស់រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ស ខេង ផ្ញើជូនក្រសួងធម្មការ និងសាសនា ចុះថ្ងៃទី០៩ ខែតុលា ឆ្នាំ២០២០ និងត្រូវបានផ្សព្វផ្សាយកាលពីថ្ងៃម្សិលមិញ បានលើកឡើងថា កន្លងមក ក្រសួងធម្មការ បានសម្រេចចុះបញ្ជីសមាគមនិងអង្គការមិនមែនរដ្ឋាភិបាល មានចរិតសាសនា និងបានតម្កល់ទុកលក្ខន្តិកៈរបស់អង្គការ-សមាគមទាំងនោះ។
លិខិតក្រសួងមហាផ្ទៃ បានបន្តថា ករណីនេះជាការអនុវត្តផ្ទុយនឹងបទបញ្ញត្តិនៃច្បាប់ស្តីពីសមាគមនិងអង្គការមិនមែនរដ្ឋាភិបាល។
លិខិតក្រសួងមហាផ្ទៃ បានស្នើដល់ក្រសួងធម្មការ និងសាសនា បញ្ឈប់ការចុះបញ្ជីសមាគមនិងអង្គការមិនមែនរដ្ឋាភិបាលក្នុងស្រុកគ្រប់ប្រភេទ និងត្រូវណែនាំដល់សមាគមនិងអង្គការដែលបានចុះបញ្ជីរួចនៅក្រសួងធម្មការ ឱ្យទៅចុះបញ្ជីនៅក្រសួងមហាផ្ទៃវិញ ដើម្បីធានាការអនុវត្តច្បាប់ស្តីពីសមាគមនិងអង្គការមិនមែនរដ្ឋាភិបាលឱ្យមានភាពរលូន៕