សមត្ថកិច្ចខេត្តព្រៃវែង បានឱ្យដឹងថា អគ្គិភ័យដែលឆេះផ្សារកំពង់ពពិល ស្ថិតនៅស្រុកពារាំង បានបណ្តាលឱ្យខូចខាតអស់៧៥តូប និងទ្រព្យសម្បត្តិ ដោយគិតជាទឹកប្រាក់អស់ប្រមាណជាង១លានដុល្លារ។
ស្នងការរងនៃស្នងការដ្ឋាននគរបាលខេត្តព្រៃវែង ទទួលបន្ទុកផ្នែកអគ្គិភ័យ លោក រស់ ភឿន បានប្រាប់វីអូឌីនៅថ្ងៃនេះថា បើតាមព័ត៌មានបឋម អគ្គិភ័យបានឆេះផ្សារកំពង់ពពិល កាលពីម៉ោងប្រមាណជាង៩យប់ រហូតដល់ម៉ោង១២និង៣០នាទីរំលងអធ្រាត្រ ឈានចូលថ្ងៃទី០៥ ខែវិច្ឆិកា ឆ្នាំ២០២០ បណ្តាលឱ្យខូចខាតតូបអស់៧៥តូប និងខូចខាតទ្រព្យសម្បត្តិផ្សេងៗ គិតជាទឹកប្រាក់អស់ប្រហែលជាង១លានដុល្លារ។
ស្នងការរូបនោះបញ្ជាក់ថា ដើមចមដែលនាំឱ្យអគ្គិភ័យឆេះនោះ ទំនងជាទុស្សេខ្សែភ្លើង។ ប៉ុន្តែលោកថា ក្រុមការងារជំនាញកំពុងធ្វើការស្រាវជ្រាវបន្ថែមទៀតជុំវិញបញ្ហានេះ និងបូកសរុបរបាយការណ៍ដើម្បីស្រង់ស្ថិតិនៃទំហំដែលខូចខាតពិតប្រាកដ ដើម្បីជូនដំណឹងទៅសាធារណជនឱ្យបានដឹងពីរឿងនេះ។
លោក រស់ ភឿន ឱ្យដឹងទៀតថា អគ្គិភ័យនេះ សមត្ថកិច្ចបានសហការជាមួយស្ថាប័នពាក់ព័ន្ធ រួមមាន កម្លាំងអាជ្ញាធរខេត្តព្រៃវែងនិងខេត្តកណ្តាល បានរួមគ្នាចុះអន្តរាគមន៍បន្ទាន់ រហូតដល់អាចពន្លត់ទាំងស្រុងដោយប្រើប្រាស់ឡានទឹកអស់ចំនួន២១គ្រឿង រួមទាំងឡានទឹករបស់ក្រុមហ៊ុន OCIC មកពីរាជធានីភ្នំពេញ៕
