ក្រសួងទេសចរណ៍ឱ្យដឹងថា រយៈពេល៩ខែឆ្នាំនេះ អាជីវកម្មទេសចរណ៍ជិត៣ពាន់ទីតាំងបានបិទនិងព្យួរ ដែលធ្វើឱ្យប៉ះពាល់ដល់បុគ្គលិកជាង៥ម៉ឺននាក់បាត់បង់ការងារ។
រដ្ឋលេខាធិការក្រសួងទេសចរណ៍ លោក សុង តុងហាប់ ត្រូវបានស្រង់ប្រសាសន៍មកផ្សព្វផ្សាយក្នុងទំព័រហ្វេសប៊ុករបស់ក្រសួងនៅថ្ងៃសុក្រនេះថា គិតត្រឹមដំណាច់ខែកញ្ញា ឆ្នាំ២០២០ អាជីវកម្មទេសចរណ៍សរុបចំនួន២ ៨៣៨ទីតាំង ស្មើនឹង២៩,៦៣% នៃអាជីវកម្មសរុបបានបិទ/ព្យួរ ដែលធ្វើឱ្យប៉ះពាល់ដល់បុគ្គលិកសរុប៥០ ៩៩៦នាក់។
លោកបន្តថា ក្នុងចំណោមអាជីវកម្មទេសចរណ៍ដែលបានបិទ/ព្យួរនោះ សម្រាប់ខេត្តសៀមរាប មាន៦៥៨ទីតាំង ដែលបានបិទ/ព្យួរ បណ្តាលឱ្យបុគ្គលិកសរុប១៤ ៧០២នាក់បាត់បង់ការងារ។
លោក សុង តុងហាប់ បានបញ្ជាក់ថា៖ «វិបត្តិជំងឺកូវីដ-១៩ បានប៉ះពាល់ដល់វិស័យសេដ្ឋកិច្ចសកល ពិសេសវិស័យទេសចរណ៍និងការធ្វើដំណើរ ក្នុងនោះ វិស័យទេសចរណ៍កម្ពុជាក្នុងឆ្នាំ២០២០ ត្រូវបានព្យាករថា នឹងមានកំណើនអវិជ្ជមានក្នុងរង្វង់៨០% សម្រាប់ទេសចរអន្តរជាតិ និង៥០% សម្រាប់ទេសចរណ៍ផ្ទៃក្នុង ជាមួយនឹងការបាត់បង់ចំណូលប្រមាណ៣ពាន់លានដុល្លារអាមេរិក»។
ការថ្លែងរបស់រដ្ឋលេខាធិការក្រសួងរូបនេះ បានធ្វើឡើងនៅក្នុងសិក្ខាសាលា ស្តីពី ប្រតិបត្តិការអាជីវកម្មទេសចរណ៍ក្នុងដំណាក់កាលកូវីដ-១៩ “វិធានសុវត្ថិភាពទេសចរណ៍ និងយន្តការលើកទឹកចិត្ត” នៅខេត្តសៀមរាប នៅថ្ងៃទី០៦ ខែវិច្ឆិកា ឆ្នាំ២០២០។
ក្រសួងទេសចរណ៍បានបញ្ជាក់ថា ដើម្បីត្រៀមខ្លួនស្តារវិស័យទេសចរណ៍ទ្បើងវិញ ក្រសួងនឹងរៀបចំដាក់ឆ្លងរាជរដ្ឋាភិបាលនូវឯកសារយុទ្ធសាស្រ្តសំខាន់ៗ រួមមាន ផែនទីចង្អុលផ្លូវស្តីពីការស្តារនិងលើកស្ទួយវិស័យទេសចរណ៍កម្ពុជា ឆ្នាំ២០២០-២០២៥, ផែនការមេសម្រាប់ការអភិវឌ្ឍវិស័យទេសចរណ៍ខេត្តសៀមរាប ខេត្តមណ្ឌលគិរី និងខេត្តកែប ឆ្នាំ២០២០-២០៣៥ និងផែនការយុទ្ធសាស្រ្តជាតិអភិវឌ្ឍន៍ទេសចរណ៍ ឆ្នាំ២០២១-២០៣០។
ក្រសួងបន្តថា ដើម្បីដោះស្រាយនិងទ្រទ្រង់ស្ថានភាពអាជីវកម្មទេសចរណ៍ក្នុងដំណាក់កាលកូវីដ-១៩ រាជរដ្ឋាភិបាលបានដាក់ចេញជាបន្តបន្ទាប់នូវវិធានការ ដើម្បីបន្តគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចជាតិ បានចំនួន០៦ជុំ រួមមាន វិធានការពន្ធដារ វិធានការគាំពារកម្មករ-និយោជិត និងវិធានការលើកលែងកម្រៃនៃការបន្តអាជ្ញាបណ្ណទេសចរណ៍គ្រប់ប្រភេទនៅទូទំាងប្រទេសសម្រាប់ឆ្នាំ២០២១។
លោក សុង តុងហាប់ បានគូសបញ្ជាក់ថា ក្រៅពីវិធានការគ្រប់គ្រងនិងគាំពាររបស់រាជរដ្ឋាភិបាល ក្រសួងក៏បានដាក់ចេញនូវសកម្មភាពអាទិភាព ដើម្បីស្តារនិងបង្កើតមុខមាត់ថ្មីជូនវិស័យទេសចរណ៍កម្ពុជាផងដែរ ដូចជា សកម្មភាពជំរុញទេសចរណ៍ក្នុងស្រុក ការដាក់ឱ្យអនុវត្តវិធានសុវត្ថិភាពទេសចរណ៍ និងការសិក្សាលទ្ធភាពដាក់ចេញទម្រង់នៃការធ្វើដំណើរនិងទេសចរណ៍សុវត្ថិភាព (Travel Bubble or One way closed-loop charter Planes) ដែលអាចជាពន្លឺថ្មីមួយសម្រាប់ការងើបទ្បើងវិញនៃវិស័យទេសចរណ៍កម្ពុជា៕