លោកនាយករដ្ឋមន្ត្រី ហ៊ុន សែន ថាលទ្ធផលធ្វើតេស្តរកវីរុសកូវីដ១៩ ជាលើកទី២ របស់លោកនិងភរិយា ព្រមទាំងអ្នកនៅជាមួយលោកទាំងអស់គ្នា គឺអវិជ្ជមាន។
លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសប៊ុករបស់លោកថា នៅថ្ងៃទី៩ ខែវិច្ឆិកានេះ ក្រុមគ្រូពេទ្យបានយកសំណាករបស់លោកនិងភរិយា ព្រមទាំងអ្នកនៅជាមួយ និងអ្នកនៅជាប់លោកទាំងអស់ ទៅធ្វើតេស្តជាលើកទី២ ដោយលទ្ធផលបង្ហាញថា «អវិជ្ជមាន» ទាំងអស់។ លោកនាយករដ្ឋមន្ត្រី ចាត់ទុកការធ្វើតេស្តអវិជ្ជមាន លើកទី២នេះថា ជាលទ្ធផលល្អ ខណៈលោកនឹងបន្តធ្វើតេស្តរកវីរុសកូវីដ១៩ ចំនួន២ដងទៀតនៅពេលខាងមុខ។
លោកបានបញ្ជាក់ថា៖ «លទ្ធផលគឺអវិជ្ជមានទាំងអស់ គឺជាលទ្ធផលល្អសម្រាប់ដំណាក់កាលទី២ ក្នុងចំណោម៤ដំណាក់កាល។ ខ្ញុំត្រូវធ្វើចត្តាឡីស័កបន្តទៀត នឹងរង់ចាំការធ្វើតេស្តជាលើកទី៣ នៅថ្ងៃទី១៤ វិច្ឆិកា និងលើកទី៤ នៅថ្ងៃទី១៨ វិច្ឆិកា»។
លោកនាយករដ្ឋមន្ត្រី បន្តទៀតថា អំឡុងពេលនេះ លោកកំពុងរង់ចាំលទ្ធផលនៃការធ្វើតេស្តអ្នកប៉ះពាល់ដោយផ្ទាល់ឬដោយប្រយោលជិត៩០០នាក់ផ្សេងទៀតផងដែរ។ លោកថា ដើម្បីកម្រិតកុំឱ្យមនុស្សកើនឡើងនោះ តម្រូវឱ្យអ្នកដែលបាននិងកំពុងធ្វើចត្តាឡីស័កកុំចេញទៅជួបជាមួយមនុស្សផ្សេងទៀត។
ដើម្បីបញ្ចៀសករណីនេះ លោកបញ្ជាឱ្យក្រសួងសុខាភិបាល អាជ្ញាធររាជធានីភ្នំពេញ និងខេត្តកណ្តាល ពិនិត្យតាមដានគ្រប់មនុស្សដែលបាននិងកំពុងធ្វើចត្តាឡីស័ក ហើយប្រសិនពួកគាត់អនុវត្តមិនបានត្រឹមត្រូវក្នុងការធ្វើចត្តាឡីស័កតាមផ្ទះទេ ត្រូវឱ្យទៅធ្វើចត្តាឡីស័កតាមទីកន្លែង ដែលរៀបចំដោយក្រសួងសុខាភិបាល ដោយមានការយាមកាមពីកម្លាំងនគរបាលឬកងរាជអាវុធហត្ថឱ្យបានហ្មត់ចត់។
កាលពីថ្ងៃទី៧ ខែវិចិ្ឆកា លោកនាយករដ្ឋមន្ត្រី ហ៊ុន សែន បានបញ្ជាឱ្យអភិបាលសាលារាជធានីភ្នំពេញ និងក្រសួងសុខាភិបាល រួមទាំងស្ថាប័នពាក់ព័ន្ធ ត្រូវយកចិត្តទុកដាក់ ហើយធ្វើការតាមដានចំពោះអ្នកធ្វើចត្តាឡីស័កឱ្យបានម៉ត់ចត់ ដើម្បីបញ្ចៀសហានិភ័យដល់ប្រទេសកម្ពុជា។
លោកថា៖ «អំពាវនាវក្រសួងស្ថាប័ន ដែលគ្រប់គ្រងមន្ត្រី បុគ្គលិក ក៏ដូចជា ស្ថាប័នព័ត៌មានទាំងឡាយដែលគ្រប់គ្រងបុគ្គលិក ត្រូវយកចិត្តទុកដាក់បន្ថែមទៀត តាមដានចំពោះអ្នកដែលធ្វើចត្តាឡីស័កឱ្យបានម៉ត់ចត់ បើមិនដូច្នោះទេ ហានិភ័យនឹងមានខ្ពស់បំផុតសម្រាប់ប្រទេសយើង នៅក្នុងកាលៈទេសៈនេះ។ ចាត់ទុកថា នេះជាបញ្ហាធំនៅក្នុងវិស័យសុខភាពសាធារណៈរបស់យើង ដែលមិនធ្លាប់មានក្នុងរយៈពេលជាង១០ខែកន្លងទៅនេះ»។
ក្រៅពីឱ្យធ្វើការតាមដានហើយ លោក ហ៊ុន សែន ក៏បានឱ្យសាលារាជធានីភ្នំពេញ និងក្រសួងសុខាភិបាល សហការគ្នាជួលសណ្ឋាគារ សុខា ដើម្បីដាក់អ្នកគ្មានលទ្ធភាពក្នុងការធ្វើចត្តាឡីស័កនៅតាមផ្ទះផងដែរ។
ការប្រកាសរបស់លោក ហ៊ុន សែន ធ្វើឡើងបន្ទាប់ពីអង្គរក្សផ្ទាល់របស់រដ្ឋមន្ត្រីការបរទេសហុងគ្រីម្នាក់ បានឆ្លងជំងឺកូវីដ១៩។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា អ្នកគ្មានលទ្ធភាពធ្វើចត្តាឡីស័កនៅផ្ទះ ហើយមកធ្វើចត្តាឡីស័កនៅសណ្ឋាគារ សុខា គិតត្រឹមម៉ោងជាង១រសៀលថ្ងៃចន្ទនេះ លោកស្រីថា មានចំនួន១៥នាក់ និងបច្ចុប្បន្នក្រសួងកំពុងរង់ចាំមើលបន្តទៀត។
លោកស្រីថា៖ «ពីម្សិលមិញល្ងាចហើយ ខ្ញុំទទួលបានព័ត៌មាន ព្រោះទើបចាប់ផ្ដើម អ៊ីចឹងមានបងប្អូនយើងមកបណ្ដើរៗហើយ ។ សម្រាប់ការធ្វើតេស្តលើកទី២នេះ ទុកឱ្យម៉ាស៊ីនធ្វើការសិន មិនអាចយកសំណាកភ្លាម ហើយដឹងលទ្ធផលភ្លាមទេ។ អ៊ីចឹងសូមរង់ចាំនូវការជូនព័ត៌មានបន្តទៀត»។
កាលពីមិ្សលមិញ ក្រសួងសុខាភិបាលចាត់វិធានការបន្ទាន់ជាថ្មី ដោយបិទ KTV ក្លឹបកម្សាន្ត រោងភាពយន្ត និងសារមន្ទីរទូទាំងប្រទេស ដោយមិនកំណត់ពេល ខណៈក្រសួងអប់រំក៏ប្រកាសបិទសាលារៀននៅភ្នំពេញ និងទីរួមខេត្តកណ្តាល រយៈពេល២សប្តាហ៍។
ក្រសួងអប់រំ ក៏បានណែនាំទៅអាណាព្យាបាលសិស្ស និសិ្សត ដែលប៉ះពាល់ផ្ទាល់និងប្រយោលជាមួយរដ្ឋមន្ត្រីការបរទេសហុងគ្រី ត្រូវផ្អាកបញ្ជូនកូនចៅទៅសិក្សារយៈពេល១៤ថ្ងៃ ដើម្បីធ្វើចត្តាឡីស័កនៅផ្ទះរៀងៗខ្លួន ខណៈក្រសួងការងារក៏ផ្អាកការបណ្ដុះបណ្ដាលនៅតាមគ្រឹះស្ថានអប់រំ បណ្ដុះបណ្ដាលបច្ចេកទេស និងវិជ្ជាជីវៈ នៅរាជធានីភ្នំពេញនិងខេត្តកណ្ដាល ២សប្តាហ៍ ដើម្បីទប់ស្កាត់ការឆ្លងជំងឺកូវីដ១៩ចូលក្នុងសហគមន៍។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គីមអេង មានប្រសាសន៍ថា ក្រៅពីការធ្វើតេស្តទៅតាមដំណក់កាលនោះ ក្រសួងសុខាភិបាលនិងស្ថាប័នពាក់ព័ន្ធ ត្រូវធ្វើការផ្សព្វផ្សាយពីវិធានការការពារឱ្យម៉ឺងម៉ាត់ដល់ប្រជាពលរដ្ឋទូទៅ ទោះបីពួកគេមិនបានប៉ះពាល់អ្នកផ្ទុកជំងឺក៏ដោយ។
លោកថា៖ «ត្រូវតែបង្កើនការផ្សព្វផ្សាយឱ្យបានសកម្មបន្ថែមទៀត ព្រោះយើងនៅក្នុងកាលៈទេសៈនេះ ត្រូវតែប្រុងប្រយ័ត្ន ហើយបង្ការជាមួយគ្នាទាំងអស់ ពីព្រោះ មិនដឹងថា ការដែលយើងខំប្រមូលឱ្យធ្វើចត្តាឡីស័កហ្នឹង បានទាំងអស់គ្នាឬយ៉ាងណា។ ម្យ៉ាងវិញទៀត ក៏យើងមានការព្រួយបារម្ភអ្នកធ្វើចត្តាឡីស័កហ្នឹង គាត់អាចគោរពបានទៀងទាត់ទេ បើគាត់មិនអាចគោរពបានទៀងទាត់ទេ អាហ្នឹងមានហានិភ័យខ្លាំងដែរ។ អ៊ីចឹងត្រូវមានយន្តការតាមដានអ្នកធ្វើចត្តាឡីស័ក ត្រូវលើកទឹកចិត្តគាត់យ៉ាងម៉េចឱ្យមានការប្រុងប្រយ័ត្នដែរ និងយកចិត្តទុកដាក់ក្នុងរយៈពេលដាក់ឱ្យនៅដាច់ដោយឡែកហ្នឹង»។
រដ្ឋមន្ត្រីការបរទេសហុងគ្រី លោក ភីធើ ស៊ីចាតូ ត្រូវបានធ្វើតេស្តរកឃើញផ្ទុកកូវីដ១៩ បន្ទាប់ពីចាកចេញពីប្រទេសកម្ពុជា ទៅបន្តដំណើរទស្សនកិច្ចរបស់លោកនៅប្រទេសថៃ កាលពីថ្ងៃទី៣ ខែវិច្ឆិកា ក្រោយពីបញ្ចប់ការបំពេញទស្សនកិច្ចនៅកម្ពុជា។
ដំណើរទស្សនកិច្ចនៅកម្ពុជា រដ្ឋមន្ត្រីការបរទេសហុងគ្រី បានជួបជាមួយលោកនាយករដ្ឋមន្ត្រី ហ៊ុន សែន រដ្ឋមន្ត្រី រួមទាំងមន្ត្រី អ្នកសារព័ត៌មាន និងសិស្សនិស្សិត ជាដើម។ បើតាមក្រសួងសុខាភិបាល រកឃើញអ្នកប៉ះពាល់រដ្ឋមន្ត្រីការបរទេសហុងគ្រី សរុប៩៤៤នាក់ ។
គិតត្រឹមថ្ងៃទី០៩ ខែវិច្ឆិកា ឆ្នាំ២០២០នេះ កម្ពុជារកឃើញអ្នកឆ្លងកូវីដ១៩ ចំនួន២៩៧នាក់ ក្នុងនោះព្យាបាលជាសះស្បើយ២៨៨នាក់ និងកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ៩នាក់៕