អ្នកនាំពាក្យសាលាក្តីខ្មែរក្រហម បានឱ្យដឹងថា អតីតមេកម្មាភិបាលខ្មែរក្រហម លោក អោ អាន បានទទួលមរណភាព កាលពីថ្ងៃទី០៦ ខែវិច្ឆិកានេះ នៅក្នុងស្រុកកំរៀង ខេត្តបាត់ដំបង។
លោក នេត ភក្ត្រា អ្នកនាំពាក្យសាលាក្តីខ្មែរក្រហម មានប្រសាសន៍ថា លោក អោ អាន ជាអតីតមេកម្មាភិបាលខ្មែរក្រហម និងជាអតីតជនសង្ស័យក្នុងសំណុំរឿង០០៤ វគ្គ០២ នៃសាលាក្តីខ្មែរក្រហម បានទទួលមរណភាពក្នុងវ័យ៨៧ឆ្នាំ នៅថ្ងៃទី០៦ ខែវិច្ឆិកា ឆ្នាំ២០២០ ស្ថិតក្នុងស្រុកកំរៀង ខេត្តបាត់ដំបង។
ទោះជាយ៉ាងណា លោក ភក្រ្តា មិនដឹងថា លោក អោ អាន ស្លាប់ដោយសារបញ្ហាអ្វីនោះទេ។
លោក នេត ភក្ត្រា បានបញ្ជាក់បន្ថែមថា សំណុំរឿង០០៤/០២ ប្រឆាំងនឹង អោ អាន បានបិទបញ្ចប់នៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា តាំងពីថ្ងៃទី១០ ខែសីហា ឆ្នាំ២០២០។
សំណុំរឿង អោ អាន ក៏ត្រូវបានសហចៅក្រមស៊ើបអង្កេតចេញដីកាបង្គាប់រួមគ្នា ឱ្យបោះត្រានិងបញ្ចូលសំណុំរឿង០០៤/២ ទៅក្នុងបណ្ណសាររួចហើយដែរ កាលពីថ្ងៃទី១៤ ខែសីហា ឆ្នាំ២០២០។ ចាប់តាំងពីពេលនោះមក អង្គជំនុំជម្រះវិសាមញ្ញក្នុងតុលាការកម្ពុជា លែងមានយុត្តាធិការលើលោក អោ អាន ទៀតហើយ។
លោក អោ អាន រងការចោទថា ប្រព្រឹត្តអំពើប្រល័យពូជសាសន៍លើជនជាតិចាម ឧក្រិដ្ឋកម្មប្រឆាំងមនុស្សជាតិ រវាងថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩។
បទល្មើសដែលលោក អោ អាន ប្រព្រឹត្ត រួមមាន ការធ្វើមនុស្សឃាត ការសម្លាប់រង្គាល ការធ្វើឱ្យទៅជាទាសករ ការដាក់ក្នុងមន្ទីរឃុំឃាំង ការធ្វើទារុណកម្ម ការធ្វើទុក្ខបុកម្នេញមកលើ “ប្រជាជន១៧មេសា” អតីតទាហាន លន់ នល់ កម្មាភិបាលភូមិភាគកណ្តាល (ឧត្តរចាស់) គ្រួសាររបស់ពួកគេ អ្នកក្រោមបង្គាប់របស់ពួកគេ ប្រជាជនមកពីភូមិភាគបូព៌ា ដោយចោទថា “សមាសភាពមិនល្អ” និង “ខ្មាំងផ្ទៃក្នុង” ការធ្វើទុក្ខបុកម្នេញមកលើប្រជាជនចាមនិងប្រជាជន វៀតណាម និងអំពើអមនុស្សធម៌ដទៃទៀត រួមមាន អាពាហ៍ពិពាហ៍ដោយបង្ខំ ការរំលោភលើផ្លូវភេទ ការបាត់ខ្លួនដោយបង្ខំ ការធ្វើបាបរាងកាយ ពលកម្មដោយបង្ខំ និងការឃុំឃាំងក្នុងស្ថានភាពអមនុស្សធម៌ ការរំលោភលើក្រមព្រហ្មទណ្ឌកម្ពុជា ឆ្នាំ១៩៥៦ រួមមាន មនុស្សឃាតដោយចេតនា៕