មន្រ្តីអ្នកនាំពាក្យក្រសួងអប់រំថា កាលបរិច្ឆេទថ្ងៃប្រឡងថ្នាក់ទី៩និងទី១២ និងការដាក់ពិន្ទុវិញ្ញាសាប្រឡងនៅរក្សាដដែល បើទោះជាមានការបារម្ភសមត្ថភាពសិស្ស និងការព្រមានពីហានិភ័យនៃការឆ្លងកូវីដ១៩ក្នុងសហគមន៍ ផ្តើមចេញពីព្រឹត្តិការណ៍ថ្ងៃទី៣ ខែវិច្ឆិកា។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា ប្រាប់ VOD នៅថ្ងៃនេះថា មកទល់ថ្ងៃនេះ ក្រសួងមិនមានគម្រោងផ្លាស់ប្តូរឬលើកពេលប្រឡងមធ្យមសិក្សាទុតិយភូមិឬថ្នាក់ទី១២ ដែលកំណត់យកថ្ងៃទី២១និង២២ ខែធ្នូ និងមធ្យមសិក្សាបឋមភូមិឬថ្នាក់ទី៩ ដែលកំណត់យកថ្ងៃទី៣០ ខែវិច្ឆិកា។
លោកបន្ថែមថា ក្រសួងអប់រំក៏មិនមានគម្រោងបន្ធូរបន្ថយកម្រិតវិញ្ញាសាប្រឡងនោះដែរ ដោយសារខ្លួនបានរៀបចំកម្មវិធីសិក្សាតាមប្រព័ន្ធអនឡាញជំនួសឱ្យការសិក្សាក្នុងថ្នាក់ ហើយជំរុញឱ្យសិស្សខំប្រឹងសិក្សាដោយខ្លួនឯងក្នុងកាលៈទេសៈនៃការគំរាមកំហែងនៃមេរោគរាតត្បាតសកល។ យ៉ាងណា លោកថា ខាងក្រសួងនឹងធ្វើការជូនដំណឹងជាមុន បើមានហេតុផលសមស្របនិងទៅតាមស្ថានការណ៍ជាក់ស្តែង។
លោក រស់ សុវាចា ថ្លែងថា៖ «ក្រសួងអប់រំ យុវជន និងកីឡា នឹងជម្រាបជូនព័ត៌មានពាក់ព័ន្ធនៅពេលក្រោយ ទៅតាមលទ្ធផលនៃការប្រឡងជាក់ស្តែង»។
កាលពីសប្តាហ៍មុន ក្រសួងអប់រំ យុវជន និងកីឡា បានប្រកាសបិទសាលាទាំងអស់ក្នុងរាជធានីភ្នំពេញ និងក្រុងតាខ្មៅរយៈពេល២សប្តាហ៍ បន្ទាប់ពីរកឃើញករណីមន្រ្តីការបរទេសហុងគ្រីដែលបានមកធ្វើទស្សនកិច្ចនៅថ្ងៃទី៣ ខែវិច្ឆិកា មានជំងឺកូវីដ១៩ និងបានប៉ះដោយផ្ទាល់និងប្រយោលទៅលើមនុស្សយ៉ាងហោចជិត១ ២០០នាក់។
ប្រធានសមាគមគ្រូបង្រៀនឯករាជ្យកម្ពុជា អ្នកស្រី អ៊ុក ឆាយ៉ាវី លើកឡើងថា វិធានការបិទសាលាដើម្បីបង្ការនិងទប់ស្កាត់ការចម្លងជំងឺកូវីដ១៩ របស់ក្រសួង គឺជារឿងត្រឹមត្រូវ ដើម្បីការពារសុខភាពសាធារណជនពីការគំរាមកំហែងរបស់វីរុសនេះ។ យ៉ាងណា អ្នកស្រីថា វិធានការនេះបានប៉ះពាល់ដល់គុណភាពអប់រំរបស់សិស្សធ្ងន់ធ្ងរ ដោយសារការបង្រៀនពីចម្ងាយនិងនៅក្នុងថ្នាក់ផ្ទាល់ មានប្រសិទ្ធភាពខុសគ្នា។
អ្នកស្រី ឆាយ៉ាវី មានប្រសាសន៍ថា៖ «យើងឃើញថា អ្វីដែលគាត់ទទួលបានគឺខ្សោយ ខ្សោយមែនទែន ដោយសារគាត់សិក្សាមិនដិតដល់ ហើយទី២ទៀត យើងឃើញហើយថា កូវីដកើតឡើងធ្វើឱ្យជីវភាពគ្រួសាររបស់ពួកគាត់កាន់តែធ្លាក់ចុះដុនដាប អ៊ីចឹងការស្វះស្វែងរបស់ពួកគាត់ហ្នឹងក៏នៅមានកម្រិតដែរ»។
ប្រធានបច្ចេកទេសផ្នែកគណិតវិទ្យានៃវិទ្យាល័យ ជាស៊ីម បឹងកេងកង លោកសាស្រ្តាចារ្យ វ៉ាន់ សាវ៉េត លើកឡើងថា ការបង្រៀនតាមប្រព័ន្ធអនឡាញ សិស្សអាចចាប់បានការពន្យល់របស់គ្រូទាបជាងការបង្រៀនជាក់ស្តែង ដែលគ្រូនិងសិស្សអាចចោទសួរនិងឆ្លើយបានដោយក្បោះក្បាយ។ លោកបន្ថែមថា បញ្ហានេះប៉ះពាល់ដល់សិស្សដែលខ្សោយស្រាប់ឬដែលមិនខំប្រឹងប្រែងធ្ងន់ធ្ងរជាងគេ។
លោកសាស្រ្តាចារ្យ សាវ៉េត ប្រាប់ថា៖ «បើយើងបង្រៀនតាមជាក់ស្តែងផ្ទាល់ជាមួយគ្នា យើងបង្រៀន១០០ សិស្សយ៉ាងហោចណាស់ចាប់បាន៧០ភាគរយដែរ ហើយបើបង្រៀនតាមអនឡាញ សិស្សដែលមិនសូវរៀនបានតែ៣០ភាគរយ បាន៤០ភាគរយ បើសិស្សគាត់ពូកែ អាចបាន៥០ភាគរយជាងអ៊ីចឹង»។
មន្រ្តីរដ្ឋបាលនៃសាលា Start Up Community អ្នកនាង វួច គីម លើកឡើងថា សាលារបស់អ្នកនាងបានបិទទ្វារទាំងស្រុងនៅពេលនេះ ទៅតាមសំណើរបស់ក្រសួងអប់រំ ហើយបន្តបង្រៀនសិស្សដែលមានជាង៣០០នាក់តាមប្រព័ន្ធវីដេអូ ក្នុងនោះមាន៥០ភាគរយជាសិស្សថ្នាក់ទី១២ និង២៥ភាគរយជាសិស្សថ្នាក់ទី៩។
បុគ្គលិករដ្ឋបាលរូបនេះ ឱ្យដឹងថា មានមាតាបិតាសិស្សថ្នាក់ទី៩និងទី១២ជាច្រើន បានស្នើខាងសាលាឱ្យបើកបង្រៀនសិស្សក្នុងថ្នាក់ឡើងវិញ ដោយសារការបង្រៀនតាមប្រព័ន្ធអនឡាញ កូនៗរបស់ពួកគាត់ចាប់មិនសូវបាន ខណៈកាលបរិច្ឆេទប្រឡងឈានជិតចូលមកដល់។
អ្នកនាង គីម ប្រាប់ថា៖ «ថ្មីៗហ្នឹង ក៏មានអាណាព្យាបាលសិស្សដែលគាត់ត្រូវប្រឡងខែក្រោយ គាត់ទាមទារបង្រៀននៅក្នុងថ្នាក់ ទាមទារប្រញេបប្រញាប់ ហើយគាត់បារម្ភខ្លាចកូនគាត់ប្រឡងអត់ជាប់អ៊ីចឹង។ គាត់ខ្លាចខាតឆ្នាំកូនគាត់»។
នៅក្នុងសេចក្តីប្រកាសចុះថ្ងៃទី០២ ខែកញ្ញា ក្រសួងអប់រំបានប្រកាសពន្យារពេលកាលបរិច្ឆេទនៃថ្ងៃប្រលងបឋមសិក្សាបឋមភូមិនិងមធ្យមសិក្សាតុទិយភូមិ ដែលជារៀងរាល់ឆ្នាំប្រព្រឹត្តឡើងនៅអំឡុងខែកក្កដានិងសីហា ទៅថ្ងៃទី៣០ ខែវិច្ឆិកា និង ថ្ងៃទី២១និង២២ ខែធ្នូ ដើម្បីទុកពេលដល់ការរៀបចំការប្រឡងប្រព្រឹត្តទៅដោយរលូននិងមានគុណភាពស្របតាមគោលការណ៍របស់ក្រសួង៕
