លោកនាយករដ្ឋមន្ត្រី ហ៊ុន សែន បង្ហើបពីបំណងប្រើច្បាប់ដែលអាចនឹងបិទប្រទេសផ្នែកខ្លះ ដើម្បីទប់ស្កាត់ការរីករាលដាលជំងឺកូវីដ១៩ ខណៈលោកបានស្តីបន្ទោសមន្ត្រីមួយចំនួនថា មិនបានធ្វើចត្តាឡីស័កឬដាក់ខ្លួនឱ្យនៅដាច់ដោយឡែកឱ្យបានត្រឹមត្រូវតាមការណែនាំរបស់ក្រសួងសុខាភិបាល។
គិតត្រឹមព្រឹកថ្ងៃអង្គារនេះ មនុស្ស៤នាក់ត្រូវបានក្រសួងសុខាភិបាលជូនដំណឹងពីការរកឃើញថា បានឆ្លងជំងឺកូវីដ១៩ ឆ្លងពីរដ្ឋមន្ត្រីការបរទេសហុងគ្រី ដែលមកទស្សនកិច្ចនៅកម្ពុជា នាថ្ងៃទី៣ ខែវិច្ឆិកា ខណៈមនុស្ស១ ១៦៦នាក់ រកឃើញថា បានប៉ះពាល់ផ្ទាល់និងប្រយោល និងកំពុងស្ថិតក្រោមការតាមដាន។
លោកនាយករដ្ឋមន្ត្រី ហ៊ុន សែន ដែលកំពុងធ្វើចត្តាឡីស័កដែរនោះ កាលពីថ្ងៃម្សិលមិញ បានចេញសារក្រើនរំឭកជាថ្មីទៅមន្ត្រីដែលពាក់ព័ន្ធឱ្យដាក់ខ្លួននៅដាច់ដោយឡែកឱ្យបានត្រឹមត្រូវ ដើម្បីបញ្ចៀសការឆ្លងរីករាលដាលជំងឺកូវីដ១៩ចូលសហគមន៍។
ក្នុងសារអំពាវនាវលើកទី៣នេះ លោកនាយករដ្ឋមន្ត្រីបានស្តីបន្ទោសមន្ត្រីខ្លះថា ធ្វើចត្តាឡីស័កមិនបានត្រឹមត្រូវ និងថា ខ្លះទៀតបានទៅចូលរួមពិធីផ្សេងៗនៅរាជធានីភ្នំពេញ ខេត្តកណ្តាល និងខ្លះធ្វើដំណើរទៅខេត្តព្រះសីហនុ កែប កំពត តាកែវ និងពោធិ៍សាត់ ជាដើម ដែលធ្វើឱ្យកើនឡើងនៃចំនួនអ្នកប៉ះពាល់ បង្កជាការព្រួយបារម្ភពីលទ្ធភាពឆ្លងចូលសហគមន៍។
លោកថា៖ «ការអំពាវនាវរបស់ខ្ញុំនេះ ធ្វើនៅមុនពេលដែលខ្ញុំកំពុងតែគិតថា តើត្រូវប្រកាសបិទទីក្រុងភ្នំពេញឬផ្នែកណាមួយនៅក្នុងប្រទេសឬទេ ព្រោះច្បាប់ក្នុងគ្រាមានអាសន្នមានក្នុងដៃរួចហើយ»។
«ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន» ត្រូវបានប្រកាសឱ្យប្រើកាលពីថ្ងៃទី២៩ ខែមេសា ឆ្នាំនេះ។ ច្បាប់នេះបានប្រគល់សិទ្ធិអំណាចទៅរដ្ឋាភិបាល អាចប្រើអាជ្ញាសឹកបាន ក្រៅពីកម្រិតសិទ្ធិដើរហើរ សិទ្ធិប្រកបមុខរបរ និងសិទ្ធិជួបជុំ ជាដើម។
ទោសប្បញ្ញត្តិវិញ ជាប់ពន្ធនាគាររហូត១០ឆ្នាំ បើរដ្ឋាភិបាលចាត់ទុកថា អ្នកនោះមានចេតនាធ្វើឱ្យចលាចលឬប៉ះពាល់ដល់សន្តិសុខជាតិ។
យ៉ាងណា លោកនាយករដ្ឋមន្ត្រី ហ៊ុន សែន ថ្លែងថា លោកមិនចង់ប្រើច្បាប់នេះទេ ដោយថា វាប៉ះពាល់សិទ្ធិពលរដ្ឋច្រើនទៀតដែលមិនជាប់ពាក់ព័ន្ធ។
លោកថា៖ «ដូច្នេះ ខ្ញុំសូមស្នើដោយទទូច សុំឱ្យរំលត់សភាពការណ៍នេះ យ៉ាងយូរបីសប្តាហ៍ខាងមុខ។ ដើម្បីរំលត់សភាពការណ៍ ដែលហៅថា “៣វិច្ឆិកា” នេះបាន ទាមទារឱ្យធ្វើចត្តាឡីស័កឱ្យបានហ្មត់ចត់បំផុត បើមិនដូច្នោះទេ មហន្តរាយនឹងកើតមានសម្រាប់ប្រទេសយើង មិនខុសពីប្រទេសដទៃដែលកំពុងតែឆ្លងកាត់នូវរោគរាតត្បាតទូទាំងប្រទេសដែលត្រួតត្រាមិនបាន»។
ក្រសួងសុខាភិបាល នៅថ្ងៃអង្គារនេះដែរ បានចេញសារព្រមានចាត់វិធានការផ្លូវច្បាប់លើបុគ្គលដែលធ្វើចត្តាឡីស័កមិនបានត្រឹមត្រូវតាមសេចក្តីណែនាំរបស់ខ្លួន ក្រៅពីទោសព្រហ្មទណ្ឌ និងត្រូវពិន័យជាប្រាក់រហូតដល់១លានរៀល។
ក្រសួងថា៖ «បុគ្គលដែលមិនអនុវត្តតាមវិធានការសុខាភិបាលក្នុងការធ្វើចត្តាឡីស័ក ត្រូវទទួលពិន័យអន្តរការណ៍ជាទឹកប្រាក់ពី ២០០ ០០០រៀល ដល់ ១ ០០០ ០០០រៀល និងត្រូវផ្តន្ទាទោសតាមច្បាប់ព្រហ្មទណ្ឌជាធរមាន តាមមាត្រា៨ នៃអនុក្រឹត្យលេខ១២៩ អនក្រ.បក ចុះថ្ងៃទី១៧ ខែកញ្ញា ឆ្នាំ២០១៥ ព្រមទាំងតម្រូវឱ្យអនុវត្តវិធានការសុខាភិបាល»។
ក្រោយផ្ទុះជំងឺឆ្លងនេះ រដ្ឋាភិបាលបានប្រកាសឱ្យបិទគ្រឹះស្ថានសិក្សា រោងភាពយន្ត ក្លឹបកម្សាន្ត និងសារមន្ទីរជាថ្មីវិញ នៅក្នុងរាជធានីភ្នំពេញនិងខេត្តកណ្តាល ជាបណ្តោះអាសន្នរយៈពេល២សប្តាហ៍ ដើម្បីចូលរួមទប់ស្កាត់ការរីករាលដាលជំងឺនេះ។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ មានប្រសាសន៍ថា បើបញ្ហានេះរីករាលដាលរហូតដល់រដ្ឋាភិបាលដាក់ប្រទេសក្នុងស្ថានភាពអាសន្នមែននោះ អ្នកដែលស្លាប់មុនគេគឺក្រុមពលរដ្ឋដែលមានមុខរបររត់ម៉ូតូឌុប កង់បី អ្នកលក់ដូរតាមចិញ្ចើមផ្លូវ រួមទាំងកម្មករដែលបាត់បង់ការងារ។
លោកថា៖ «បើសិនរដ្ឋាភិបាលដាក់ប្រទេសក្នុងភាពអាសន្នមែន វាគ្រោះថ្នាក់ធ្ងន់ធ្ងរណាស់សម្រាប់អ្នកសេដ្ឋកិច្ចក្រៅប្រព័ន្ធ ព្រោះគាត់រកមួយថ្ងៃទទួលទានមួយថ្ងៃ ហើយបើដាក់មែន មិនដឹងរស់យ៉ាងម៉េចទេ? មានតែដាច់បាយស្លាប់តែម្តង ព្រោះនៅក្នុងស្ថានភាពកូវីដ១៩ តាំងពីឆ្លងចូលប្រទេសកម្ពុជាមក ពួកក្រៅប្រព័ន្ធមិនដែលបានការឧបត្ថម្ភអីពីរដ្ឋាភិបាលទេ ហើយបើដាក់ទៀត មានតែដាច់បាយស្លាប់»។
ប្រធានសមាគមមួយនេះ អំពាវនាវទៅស្ថាប័នពាក់ព័ន្ធចាត់វិធានការឱ្យមានប្រសិទ្ធភាព ដើម្បីបញ្ចៀសផលប៉ះពាល់ដល់អ្នកដែលមានមុខរបរតូចតាចនិងមានប្រាក់ចំណូលទាប។
បើតាមលោក វន់ ពៅ អ្នកប្រកបមុខរបរសេដ្ឋកិច្ចក្រៅប្រព័ន្ធ មានជាង៨៨ភាគរយនៃកម្លាំងពលកម្មសរុប គិតជាប្រជាពលរដ្ឋមានជាង៨លាននាក់ ចំណូលមធ្យមប្រមាណ៣ម៉ឺនរៀលក្នុង១ថ្ងៃ និងអ្នកដែលជាប់បំណុលធនាគារនិងគ្រឹះស្ថានមីក្រូហិរញ្ញវត្ថុ ជាង៩៥ភាគរយ។
យ៉ាងណា លោកនាយករដ្ឋមន្ត្រី ហ៊ុន សែន ក៏បានចេញបញ្ជាផងដែរទៅអាជ្ញាធរ នគរបាលជាតិ កងរាជអាវុធហត្ថលើផ្ទៃប្រទេស និងកងយោធពលខេមរភូមិន្ទ ឱ្យត្រៀមបញ្ចេញកម្លាំងដាក់ពង្រាយនៅតាមមណ្ឌលចត្តាឡីស័ក ដើម្បីពង្រឹងប្រសិទ្ធភាពសេចក្តីណែនាំរបស់ក្រសួងសុខាភិបាល និងទប់ស្កាត់ការរីករាលដាលនៃជំងឺឆ្លងដ៏កាចសាហាវនេះ៕