ក្រសួងអប់រំ យុវជន និងកីឡា ណែនាំដល់គ្រឹះស្ថានសិក្សាក្នុងខេត្តដែលមានពាក់ព័ន្ធនឹងព្រឹត្តិការណ៍ថ្ងៃ០៣វិច្ឆិកា ពង្រឹងវិធានការទប់ស្កាត់ការរីករាលដាលនៃជំងឺកូវីដ១៩។
សេចក្តីជូនដំណឹងរបស់រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន នៅថ្ងៃអង្គារនេះ បានលើកឡើងថា ដើម្បីចៀសវាងការឆ្លងជំងឺកូវីដ១៩ ចូលក្នុងសាលារៀននិងរីករាលដាលក្នុងសហគមន៍ ក្រោយព្រឹត្តិការណ៍៣វិច្ឆិកា ក្រសួងស្នើដល់គណៈគ្រប់គ្រងសាលា ត្រូវរាយការណ៍ជាបន្ទាន់ទៅអាជ្ញាធរខេត្ត អំពីវត្តមាននៃការជួបប្រាស្រ័យទាក់ទងដោយផ្ទាល់ឬដោយប្រយោលរបស់បុគ្គលិកអប់រំ ឬសិស្សានុសិស្សជាមួយបុគ្គលិកដែលបានប៉ះពាល់ក្នុងព្រឹត្តិការណ៍ថ្ងៃ៣វិច្ឆិកា។
ក្រសួងបន្តថា គណៈគ្រប់គ្រងសាលាត្រូវបូកសរុបរបាយការណ៍ ស្តីពី ចំនួនបុគ្គលិកអប់រំឬសិស្សដែលសង្ស័យថា បានចូលរួមប្រជុំឬប្រាស្រ័យទាក់ទង និងត្រូវស្នើសុំយោបល់ពីអាជ្ញាធរខេត្ត និងវាយតម្លៃលទ្ធភាពផ្អាកការសិក្សា១៤ថ្ងៃ។
ក្រៅពីនោះ ក្រសួងបានណែនាំដល់បុគ្គលិកអប់រំ ដែលមានការប៉ះពាល់ដោយផ្ទាល់ឬដោយប្រយោល ត្រូវរាយការណ៍ជាបន្ទាន់ទៅអាជ្ញាធរអប់រំតាមលំដាប់ថ្នាក់ និងអនុវត្តវិធានការចត្តាឡីស័កឱ្យបានត្រឹមត្រូវបំផុត។
បើតាមអ្នកនាំពាក្យក្រសួងអប់រំ យុវជន និងកីឡា លោក រស់ សុវាចា គិតត្រឹមយប់ថ្ងៃទី០៩ ខែវិច្ឆិកា ឆ្នាំ២០២០ ក្រសួងបានរកឃើញគ្រឹះស្ថានសិក្សាឯកជន និងទីតាំងអង្គភាពផ្សេងទៀត ចំនួន១២ ដែលជាប់ពាក់ព័ន្ធអ្នកប៉ះពាល់ក្នុងព្រឹត្តិការណ៍ ០៣ វិច្ឆិកា៕
