មន្ត្រីខេត្តព្រះសីហនុ បានឱ្យដឹងថា អាជ្ញាធរខេត្តនេះបានសម្រេចផ្អាកដំណើរការរយៈពេលពីរសប្ដាហ៍នូវសាលារៀនមួយចំនួននៅឃុំចំនួន៤ ស្ថិតក្នុងស្រុកព្រៃនប់ ដោយបារម្ភខ្លាចការឆ្លងរីករាលដាលនៃវីរុសកូរ៉ូណា។
ករណីអាជ្ញាធរខេត្តព្រះសីហនុសម្រេចបិទសាលារៀនមួយចំនួននៅស្រុកព្រៃនប់បណ្តោះអាសន្ននេះ គឺធ្វើឡើងក្រោយពេលអនុរដ្ឋលេខាធិការទីស្តីការគណៈរដ្ឋមន្ត្រី លោក ដួង តារា ដែលកំពុងស្ថិតក្នុងភារកិច្ចធ្វើចត្ថាឡឺស័កដោយសារបានចូលរួមជំនួបជាមួយរដ្ឋមន្ត្រីការបរទេសហុងគ្រីកាលពីថ្ងៃទី៣ ខែវិច្ឆិកា ហើយបានទៅជួបជាមួយប្រជាពលរដ្ឋនៅឃុំចំនួន៤ ក្នុងស្រុកព្រៃនប់កាលពីថ្ងៃអាទិត្យចុងសប្ដាហ៍កន្លងមកនេះ។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ ប្រាប់វីអូឌីនៅថ្ងៃអង្គារនេះថា អាជ្ញាធរខេត្តព្រះសីហនុសម្រេចឱ្យសាលារៀនមួយចំនួនផ្អាកដំណើរការបង្រៀននិងរៀនបណ្តោះអាសន្ននេះ គឺដើម្បីការពារខ្លាចមានការឆ្លងជំងឺកូវីដ១៩ ដល់ទៅសហគមន៍ ដោយសារពេលដែលលោក ដួង តារា ចុះទៅខេត្តព្រះសីហនុនោះ គឺលោកមិនទាន់បានធ្វើចត្តាឡីស័កចប់នៅឡើយ។
អ្នកនាំពាក្យរូបនេះបន្តថា តាមរបាយការណ៍បឋម គឺអាជ្ញាធរខេត្តបានរកឃើញមនុស្ស៧០នាក់ បានជួបប្រាស្រ័យទាក់ទងដោយផ្ទាល់និងប្រយោលជាមួយលោក ដួង តារា ក្នុងនោះមាន១៣នាក់ជួបផ្ទាល់ និង៥៧នាក់ជួបដោយប្រយោល។ លោកថា មនុស្ស៧០នាក់ដែលជួបជាមួយលោក ដួង តារា មានទាំងចាស់និងក្មេង ហើយកំពុងធ្វើចត្តាឡីស័កនៅសណ្ឋាគារមួយកន្លែងនៅក្នុងក្រុងព្រះសីហនុ។
លោក ឃាង ភារម្យ បន្តថា ពេលនេះ អាជ្ញាធរបានយកសំណាកពលរដ្ឋ៥៥នាក់ទៅពិនិត្យហើយ និងឱ្យសាលាមួយចំនួននៅឃុំរាម ឃុំព្រៃនប់ ឃុំអូរឧកញ៉ាហេង និងទួលទទឹង ផ្អាកការបង្រៀនរយៈពេល១៤ថ្ងៃ ដោយបារម្ភខ្លាចមានការឆ្លងដល់សិស្ស។
លោក ឃាង ភារម្យ ប្រាប់ថា៖ «ខ្ញុំសុំបញ្ជាក់ថា ឯកឧត្តម ដួង តារា មិនមែនជាអ្នកជំងឺកូវីដទេ មានន័យថា លោកបានធ្វើតេស្តអវិជ្ជមានចំនួនពីរដង ហើយអវិជ្ជមាន។ ប៉ុន្តែទោះបីជាយ៉ាងណាក៏ដោយ ដើម្បីយើងធានាបាននូវសុវត្ថិភាព គឺយើងត្រូវតែធ្វើចត្តាឡីស័កទៅលើអ្នកដែលមានការពាក់ព័ន្ធហ្នឹង។ នេះខ្ញុំសូមបញ្ជាក់អញ្ចឹង កុំឱ្យនាំគ្នាឆោឡោចលាចល»។
លោក ឃាង ភារម្យ បន្ថែមទៀតថា អាជ្ញាធរកំពុងស្វែងរកអ្នកពាក់ព័ន្ធផ្សេងទៀតមកធ្វើចត្តាឡីស័កឬឱ្យនៅដាច់ដោយឡែក ដើម្បីធានាសុវត្ថិភាពជូនប្រជាពលរដ្ឋ។
ក្រសួងសុខាភិបាលឱ្យដឹងថា អ្នកប៉ះពាល់ក្នុងព្រឹត្តិការណ៍ ៣វិច្ឆិកា សរុបជិត១ ២០០នាក់ ក្នុងនោះមានអ្នកឆ្លងជំងឺកូវីដចំនួន៤នាក់ និងអវិជ្ជមានចំនួន១ ១៤០នាក់ ខណៈវត្ថុសំណាកចំនួន២៣នាក់ទៀត នឹងត្រូវបន្តវិភាគនៅថ្ងៃនេះ៕