មេដឹកនាំវៀតណាមបន្តរក្សាភាពស្ងប់ស្ងាត់ដោយមិនបានប្រើវោហារសាស្ត្រវាយប្រហារប្រទេសឬក្រុមណាមួយទេ ដោយប្រើពេលស្ងប់ស្ងាត់នេះពង្រឹងខ្លួនទាំងផ្នែកសេដ្ឋកិច្ចនិងផ្នែកកងទ័ព។
វៀតណាមជាប្រទេសកាន់របបកុម្មុយនីស្ត ប៉ុន្តែមេដឹកនាំនៃប្រទេសនេះរក្សាភាពទន់ភ្លន់ក្នុងការពង្រឹងទំនាក់ទំនងទាំងជាមួយប្រទេសកុម្មុយនីស្តនិងប្រទេសកាន់របបសេរី សូម្បីតែអតីតសត្រូវដូចជាសហរដ្ឋអាមេរិក និងសត្រូវបច្ចុប្បន្នដូចជាចិនជាដើមនោះ ក៏មេដឹកនាំវៀតណាមនៅតែញញឹម ចាប់រលាក់ដៃ ឬឱបគ្នា ដូចមិនមានអ្វីកើតឡើងសោះ។
កម្រឃើញប្រធានាធិបតីឬនាយករដ្ឋមន្ត្រីវៀតណាម ប្រតិកម្មដំឡើងសំឡេងវាយប្រហារប្រទេសឬក្រុមណាមួយ ហើយអួតអាងដំឡើងខ្លួនឯងនោះទេ។ ក្នុងស្ថានភាពនេះ វៀតណាមពង្រីកសេដ្ឋកិច្ចដោយបើកចំហនិងពង្រឹងកម្លាំងទ័ពដោយរក្សាភាពស្ងប់ស្ងាត់។
រដ្ឋាភិបាលវៀតណាមបានបង្ហាញក្តីសង្ឃឹមថា ចាប់ពីដើមខែសីហា ឆ្នាំ២០២០ ជាពេលដែលចាប់ផ្តើមអនុវត្តកិច្ចព្រមព្រៀងពាណិជ្ជកម្មមិនជាប់ពន្ធជាមួយអឺរ៉ុប នឹងទទួលបានការវិនិយោគកើនឡើង ជួយទាំងសេដ្ឋកិច្ចជាតិនិងបង្កើតការងារឱ្យពលរដ្ឋ។
នៅក្នុងកិច្ចព្រមព្រៀងពាណិជ្ជកម្មសេរីរវាងវៀតណាមនិងសហភាពអឺរ៉ុប (EVFTA) ដែលកាត់បន្ថយពន្ធនៃការនាំទំនិញឆ្លងដែនភាគីទាំងពីរបានរហូតដល់៩៩ភាគរយនោះ គឺចាប់ផ្តើមអនុវត្តពីថ្ងៃទី១ ខែសីហា ឆ្នាំ២០២០។ កិច្ចព្រមព្រៀងនេះមានសុពលភាពអនុវត្តបានរយៈពេល១០ឆ្នាំ។
ប្រភេទទំនិញដែលវៀតណាមចាប់ផ្តើមនាំចេញទៅកាន់សហភាពអឺរ៉ុប រួមមាន ទូរសព្ទដៃ គ្រឿងអេឡិចត្រូនិច សម្លៀកបំពាក់ ទ្រនាប់ជើង និងផលិតផលកសិកម្ម។ ផលិតផលកសិកម្មផ្តោតពិសេសលើអង្ករ គ្រឿងសមុទ្រ និងកាហ្វេ។
វៀតណាមសង្ឃឹមទទួលបានអ្នកវិនិយោគកើនឡើងចាប់ពីខែសីហា
វៀតណាមបានក្លាយជាប្រទេសដែលមានអត្រាកំណើនសេដ្ឋកិច្ចខ្ពស់ជាងនៅតំបន់អាស៊ាននៅឆ្នាំ២០២០ ហើយក្លាយជាប្រទេសមានអត្រាកំណើនខ្ពស់ជាងគេនៅតំបន់អាស៊ីនៅឆ្នាំ២០២១។
ធនាគារសាជីវកម្មហុងកុង-សៀងហៃ (HSBC) បានចេញរបាយការណ៍ថ្មីៗនេះ បង្ហាញថា បើទោះជាស្ថិតនៅក្នុងស្ថានភាពដែលប្រឈមដោយសារមេរោគកូវីដ១៩ តែនៅពាក់កណ្តាលឆ្នាំ២០២០នេះ សេដ្ឋកិច្ចវៀតណាមនៅតែរក្សាអត្រាកំណើនបានចំនួន១,៨ភាគរយ។ បើគិតលទ្ធផលជារួម នៅឆ្នាំ២០២០ វៀតណាមនឹងមានអត្រាកំណើនសេដ្ឋកិច្ចដល់២,៦ភាគរយ ដែលចំនួននេះខ្ពស់ជាងគេនៅតំបន់អាស៊ាន។
របាយការណ៍ដដែលបញ្ជាក់ថា នៅឆ្នាំ២០២១ វៀតណាមនឹងទទួលបានអត្រាកំណើនសេដ្ឋកិច្ច ចំនួន៨,១ភាគរយ ដែលចំនួននេះខ្ពស់ជាងគេបើប្រៀបធៀបជាមួយអត្រាកំណើនសេដ្ឋកិច្ចរបស់ប្រទេសផ្សេងៗទៀតនៅតំបន់អាស៊ី។
រដ្ឋាភិបាលរបស់ប្រទេសវៀតណាមក៏បានខិតខំក្នុងការទប់ស្កាត់នូវការឆ្លងរីករាលដាលនៃជំងឺកូវីដ១៩ ដើម្បីជាចំណែកដ៏សំខាន់មួយក្នុងការចូលរួមធ្វើឱ្យប្រទេសនេះមានកំណើនសេដ្ឋកិច្ចកាន់តែខ្លាំង។
ធនាគារ HSBC បានបន្ថែមថា ដោយមានភាពជោគជ័យក្នុងការទប់ស្កាត់បាននូវជំងឺកូវីដ១៩ ប្រទេសវៀតណាមត្រូវបានចាត់ទុកថា ជាប្រទេសមួយក្នុងចំណោមប្រទេសអាស៊ានទាំងអស់ ដែលមានសក្ដានុពលនៃកំណើនសេដ្ឋកិច្ចខ្ពស់ជាងគេនៅក្នុងឆ្នាំ២០២០។
វៀតណាមមានអត្រាកំណើនសេដ្ឋកិច្ចខ្ពស់ជាងគេនៅអាស៊ីក្នុងឆ្នាំ២០២១
អ្នកវិភាគជាន់ខ្ពស់នៅសាកលវិទ្យាល័យ Perth USAsia Centre លោក Kyle Springer លើកឡើងថា វៀតណាមនឹងក្លាយជាដៃគូសំខាន់បំផុតរបស់អូស្ត្រាលីក្នុងការពង្រីកពាណិជ្ជកម្មផ្គត់ផ្គង់តម្រូវការនៅលើពិភពលោក ក្រោយការឆ្លងរាលដាលមេរោគកូវីដ១៩បានបញ្ចប់។
ការអះអាងរបស់លោក Kyle Springer ដែលបង្ហាញពីសក្តានុពលរបស់វៀតណាមក្លាយជាដៃគូសំខាន់របស់អូស្ត្រាលី និងក្លាយជាគោលដៅវិនិយោគរបស់ប្រទេសផ្សេងៗទៀតនោះ ដោយផ្អែកលើហេតុផលចំនួន៤ រួមមាន វៀតណាមមានតម្លៃពលកម្មទាប មានមនុស្សពេញកម្លាំងពលកម្មច្រើន ការអប់រំត្រូវកម្រិតស្តង់ដារអន្តរជាតិ និងចំណុចចុងក្រោយ រដ្ឋាភិបាលមានគោលនយោបាយលើកទឹកចិត្តដល់អ្នកវិនិយោគ។
ក្នុងចំណោមពលរដ្ឋវៀតណាមជិត១០០លាននាក់ មានប្រមាណ៥៥លាននាក់ ជាក្រុមមនុស្សពេញកម្លាំង ហើយសកម្មក្នុងការបំពេញការងារ។
បើពិនិត្យលើការចំណាយផ្នែកកងទ័ព វៀតណាមចាប់ផ្តើមបង្កើនការចំណាយខ្ពស់ គឺចាប់ពីឆ្នាំ២០២០ដល់២០២៤ វៀតណាមបង្កើនការចំណាយប្រចាំឆ្នាំរបស់ខ្លួនរហូតដល់ជិត១០ភាគរយ។
តាមរបាយការណ៍របស់ researchandmarkets គម្រោងថវិកាចំណាយប្រចាំឆ្នាំលើវិស័យការពារជាតិរបស់វៀតណាម សម្រាប់ចន្លោះឆ្នាំ២០២០ ដល់២០២៤ កើនឡើងដល់៩,៤៣ភាគរយ ស្មើនឹង៧,៩ប៊ីលានដុល្លារ នៅឆ្នាំ២០២៤។
តាមការស្រាវជ្រាវរបស់ស្ថាប័នដដែលនេះបញ្ជាក់ថា នៅឆ្នាំ២០២០ វៀតណាមចំណាយថវិកាលើវិស័យការពារជាតិ ចំនួន៥,៥ប៊ីលានដុល្លារ ហើយការចំណាយនេះកើនឡើងរហូតនៅឆ្នាំ២០២១, ២០២២, ២០២៣ ហើយឆ្នាំ២០២៤ ការចំណាយកើនឡើងដល់៧,៩ប៊ីលានដុល្លារ។
ថវិកាចំណាយទាំងនេះ វៀតណាមយកទៅប្រើប្រាស់ដើម្បីបង្កើនមធ្យោបាយដឹកជញ្ជូនផ្លូវគោក នាវាចម្បាំង នាវាយាមល្បាត យន្តហោះយាមល្បាតដែនទឹក និងឧបករណ៍ឃ្លាំមើលឬស៊ើបការណ៍។
បើយើងពិនិត្យមើលលើការចំណាយរបស់វៀតណាមលើកងទ័ព៤ឆ្នាំមុន គឺពីឆ្នាំ២០១៥ ដល់២០១៩ ការចំណាយកើនឡើងតែ៧,៣៤ភាគរយប៉ុណ្ណោះ។ វៀតណាមបង្កើនការចំណាយលើកងទ័ពនេះ ស្របពេលដែលចិនក៏កំពុងបង្កើនការចំណាយលើផ្នែកកងទ័ព ហើយចិនក៏បានធ្វើសមយុទ្ធបន្តបន្ទាប់ដែរ ពិសេសការធ្វើសមយុទ្ធនៅសមុទ្រចិនខាងត្បូង ជាកន្លែងដែលចិនកំពុងមានជម្លោះជាមួយវៀតណាមនិងប្រទេសផ្សេងៗទៀត។
វៀតណាមក្រៅពីមិនសប្បាយចិត្តជាមួយចិនក្នុងករណីដែលចិនដណ្តើមគ្រប់គ្រងដែនទឹកនៅសមុទ្រចិនខាងត្បូងដែលមានភោគទ្រព្យមហាសាលនោះ វៀតណាមក៏មិនសប្បាយចិត្តករណីដែលចិនបានប្រើប្រាស់ឥទ្ធិពលសេដ្ឋកិច្ចអូសទាញកម្ពុជានិងឡាវដែលជាប្រទេសស្និទ្ធស្នាលរបស់ខ្លួនផងដែរ។
តាមអត្ថបទវិភាគរបស់ The Diplomat លើកឡើងថា ការឈ្នះសង្គ្រាមវៀតណាមនៅឆ្នាំ១៩៧៥ គឺវៀតណាមឈ្នះសហរដ្ឋអាមេរិកនោះ ដោយសារតែវៀតណាមប្រើយុទ្ធសាស្ត្រពិសេស ទាញការគាំទ្រពីប្រទេសជិតខាងគឺកម្ពុជានិងឡាវ ប៉ុន្តែថា ពេលនេះគឺមិត្តទាំង២របស់វៀតណាមនេះហាក់រំកិលខ្លួនកាន់តែស្និទ្ធជាមួយចិនដោយសារហេតុផលសេដ្ឋកិច្ច៕
