លោកនាយករដ្ឋមន្ត្រី ហ៊ុន សែន នៅថ្ងៃនេះ បញ្ជាក់ថា នឹងមិនមានការបិទប្រទេស ឬរាជធានី-ខេត្ត ឬតំបន់ណាមួយ ដូចពាក្យចចាមអារ៉ាមដែលបានផ្សព្វផ្សាយតាមបណ្តាញសង្គមនោះទេ ខណៈមន្ត្រីរដ្ឋាភិបាលថា នឹងចាត់វិធានការផ្លូវច្បាប់ចំពោះអ្នកដែលផ្សព្វផ្សាយព័ត៌មានមិនពិត ដែលបង្កឱ្យមានចលាចលសង្គមនេះ។
លោកនាយករដ្ឋមន្ត្រី ហ៊ុន សែន បានលើកឡើងក្នុងទំព័រហ្វេសប៊ុករបស់លោក នៅថ្ងៃទី១២ ខែវិច្ឆិកា ឆ្នាំ២០២០នេះថា មានមនុស្សអាក្រក់មួយចំនួនបានបំផុសពាក្យចចាមអារ៉ាមថា រាជរដ្ឋាភិបាលនឹងបិទរាជធានីភ្នំពេញ និងហាមឃាត់ការធ្វើដំណើរពីខេត្តមួយទៅកាន់ខេត្តមួយទៀត។
លោកបានគូសបញ្ជាក់ថា៖ «ការឃោសនាអកុសលរបស់ពួកអាក្រក់ទាំងនេះ សំដៅធ្វើឱ្យប្រទេសមានចលាចល ទំនិញឡើងថ្លៃ ប្រជាជនរស់នៅមិនបានស្ងប់ចិត្ត ដើម្បីពួកគេកេងចំណេញខាងនយោបាយតែប៉ុណ្ណោះ»។
លោកនាយករដ្ឋមន្ត្រី បានបន្ថែមថា ការប្រយុទ្ធជាមួយជំងឺកូវីដ១៩នៅពេលនេះ គឺត្រូវការពារខ្លួនតាមការណែនាំរបស់ក្រសួងសុខាភិបាល ដូចជា ពាក់ម៉ាស់ លាងដៃ មិនប្រមូលផ្តុំ និងការរក្សាគម្លាតសុវត្ថិភាព ជាដើម។
ការលើកឡើងរបស់លោកនាយករដ្ឋមន្ត្រី បានធ្វើឡើងក្រោយពីមានសារជាសំឡេងដែលត្រូវបានគេចែកចាយតាមបណ្តាញសង្គមហ្វេសប៊ុកថា៖
«លិខិតចេញពីគណៈរដ្ឋមន្រ្តីចូលទៅរាជវាំង សុំហត្ថលេខាពីសម្តេច សីហមុនី ដើម្បីបិទក្រុង។»
សារជាសំឡេងដែលជាព័ត៌មានមិនពិតនេះ ត្រូវបានគេចែកចាយតាមបណ្តាញសង្គម ស្របពេលដែលក្រសួងសុខាភិបាលរកឃើញមន្ត្រី៤នាក់បានឆ្លងកូវីដ១៩ និងមានមនុស្សជិត២ ៥០០នាក់ទៀតគិតត្រឹមថ្ងៃព្រហស្បតិ៍នេះ កំពុងស្ថិតក្នុងការតាមដានសុខភាព ក្រោយប៉ះពាល់ផ្ទាល់និងប្រយោលជាមួយរដ្ឋមន្ត្រីក្រសួងការបរទេសហុងគ្រី ដែលមកទស្សនកិច្ចនៅកម្ពុជា កាលពីថ្ងៃទី៣ ខែវិច្ឆិកា។
ប្រធានក្រុមអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ប្រាប់ VOD ថា រដ្ឋាភិបាលនិងអង្គភាពប្រឆាំងព័ត៌មានក្លែងក្លាយ បានជួយគ្នារួចហើយ ដើម្បីចាត់វិធានការនេះចំពោះអ្នកដែលចែកចាយព័ត៌មានមិនពិតទាំងនេះ។
លោកថា៖ «យើងមានអង្គភាពប្រឆាំងនឹងព័ត៌មានក្លែងក្លាយ ព្រោះអាហ្នឹងវាធ្វើឱ្យប៉ះពាល់ដល់សណ្តាប់ធ្នាប់សាធារណៈ ហើយនិងសន្តិសុខជាតិ។ យើងចាត់វិធានការតាមផ្លូវច្បាប់ យើងមានពន្ធនាគារ យើងបានទំនាក់ទំនងគ្នា [អង្គភាពប្រឆាំងនឹងព័ត៌មានក្លែងក្លាយ] ហើយ»។
បុគ្គលិកគ្រប់គ្រងកម្មវិធីនៅមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក ហេង គឹមហុង មានប្រសាសន៍ថា រដ្ឋាភិបាលគួរប្រើវិធានការអប់រំ ជាជាងប្រើវិធានការច្បាប់ ដោយថារឿងនេះវាបានកើតឡើងក្រោយនាយករដ្ឋមន្ត្រីព្រមានថា អាចនឹងមានការបិទប្រទេសផ្នែកណាមួយ បើសិនព្រឹត្តិការណ៍៣វិច្ឆិកា កាន់តែមានអ្នកប៉ះពាល់និងអ្នកឆ្លងកើនឡើង។
លោកថា៖ «ពេលខ្ លះប្រជាពលរដ្ឋគាត់ឮសំឡេងបែបនេះ ហើយលោកមិនបានទទួលបានព័ត៌មានជាក់លាក់បន្ថែម ហើយគួបផ្សំនឹងបណ្តាញសារព័ត៌មានមួយចំនួនសរសេរព័ត៌មានហាក់ដូចជាមិនមានជាក់ស្តែងនិយមផងដែរនោះ ធ្វើឱ្យប្រជាពលរដ្ឋលោកមានការភ័យខ្លាច។ ក្នុងនាមរដ្ឋបាលសាធារណៈ រដ្ឋាភិបាលគួរតែពន្យល់ឬក៏បកស្រាយឱ្យប្រជាពលរដ្ឋស្រឡះចិត្ត ជាជាងគំរាមប្រជាពលរដ្ឋក្នុងការចាត់វិធានការណាមួយ»។
យ៉ាងណា លោកផ្តល់ជាយោបល់ថា ដើម្បីបញ្ចៀសវិធានការច្បាប់ទាំងមិនដឹងខ្លួន អ្នកប្រើប្រាស់បណ្តាញសង្គមគួរស្វែងយល់ផងដែរពីប្រភពព័ត៌មានឱ្យបានច្បាស់លាស់ ថាប្រព័ន្ធព័ត៌មាននោះមានវិជ្ជាជីវៈឬផ្លូវការទេ មុនធ្វើការចែករំលែកបន្ត។
ឧត្តមស្នងការសិទ្ធិមនុស្សអង្គការសហប្រជាជាតិ លោកស្រី មីសែ្សល បាស្សេឡេត ( Michelle Bachelet) ធ្លាប់និយាយថា លោកស្រីមានការព្រួយបារម្ភចំពោះវិធានការដែលរដ្ឋាភិបាលធ្វើការទប់ស្កាត់ព័ត៌មានក្លែងក្លាយ ដែលជំរុញឱ្យមានការចាប់ខ្លួនអ្នករិះគន់ ចោទពីបទឧក្រិដ្ឋរៀបចំផែនការប្រឆាំងរដ្ឋាភិបាល ដោយគ្រាន់តែពួកគេបង្ហាញកង្វល់ទាក់ទិននឹងជំងឺកូវីដ១៩។
តាមរយៈសេចក្តីប្រកាសព័ត៌មានពីទីក្រុងហ្សឺណែវ ចុះថ្ងៃទី៣ ខែមិថុនា ឆ្នាំ២០២០នេះ លោកស្រីថា ប្រទេសកម្ពុជា មានមនុស្សប្រមាណ៣០នាក់ត្រូវបានចាប់ខ្លួន ក្នុងនោះ១០នាក់ជាប់ពាក់ព័ន្ធនឹងអតីតគណបក្សសង្គ្រោះជាតិដែលតុលាការបានរំលាយចោលទៅហើយនោះ៕
